ريفيو عن باليت الشدو من هدى بيوتي الاصدار الثاني Huda Beauty desert dusk pallette

مرحبا بنات كيف حالكم

اليوم حابة اكلمكم عن باليت الايشادو من هدى بيوتي

هذا الباليت الثاني لها، قبل سنة تقريباً نزلت اول باليت ايشادو لها وكتبت عنه بالمدونة وقتها، وهذا الجديد

نزل قبل شهر تقريبا في سيفورا برا ومن وقتها وانا اجربه وتحمست اكتب عنه بالمدونة هنا خاصة بعد مانزل عندنا فروع سيفورا سعره ٢٥٠ وعلى الموقع sehora.sa

اولاً الباكجنق او التعليب مميز كالعادة ومرتبط بإسم الاصدار اللي يوحي بألوان الصحراء والغروب ، المرة هذي التعليب افضل من الاصدار السابق وافخم من الخارج والاحلى انه مرايته فيه ،

الالوان هنا متنوعة اكثر بين درجات الأحمر والبنفسجي بحيث تناسب كل البشرات،، غير الباليت السابق اللي كان درجات البني والترابي 

وهذي السواتشز من الموقع

بالنسبة للتركيبة منوعة بين الالوان المطفية او المات

والوان الشيمر shimmer اللي تكون بلمعة خفيفة 

والقلتر glitter اللي تكون حبيباتها اثقل ودايم اقول للبنات الوان اللمعة افضل نحطها بطرف الاصبع افضل من الفرشاة ويكون شكلها ارتب ع العين،، 

بالنسبة لجودة الشدوات او الكواليتي اعتبره ممتاز لان الألوان صبغتها قوية وتبين بسرعة ومتنوعة بحيث تخدمك في لوكات كثيرة، وماتتناثر بشكل مزعج الا بعض درجات اللمعة بشكل بسيط وممكن تنظفينها بالفرشاة كآخر خطوة، وشخصياً اعتبره افضل من باليتات ثانية جربتها، 

اللي تبي تجربه او تشوف التستر موجود بفروع سيفورا واللي جربته ياليت تقول لي رايها وشكراً لمتابعتكم

اشوفكم على خير :) 

Fenty beauty foundation ريفيو عن فاونديشن فنتي بيوتي

مساء الخير بنات،،

بكتب لكم اليوم عن تجربتي مع فاونديشن فنتي بيوتي من ريانا،، قبل فترة نزلت ريانا لاين بإسمها في سيفورا وسوا ضجة كبيرة في عالم الميك اب،، وأكثر شي تحمست اجربه هو الفاونديشن اللي نزل عندنا في موقع سيفورا السعودية sephpra.sa 

اكثر شي ترددت فيه قبل اطلب اني اعرف الدرجة المناسبة لي مع العلم ان الفاونديشن نزل ب ٤٠ درجة بين الأندرتون الوردي والاصفر والمحايد،سعره ١٥٠ وهذا العدد يعتبر كبير من ناحية درجات الفاونديشن وتعتبر اكثر براند منزلة هذا الكم من تعدد الدرجات وهذا شي يحسب لها، 

بعد ماشفت ريفيوز كثير عنه وسواتشز وكثير لاحظوا انه بعد كم ساعة ممكن يتأكسد او يغمق لونه استقريت على درجة 210 محايد وطلبتها عن طريق الموقع مثل ماذكرت،

بالنسبة للتعليب بسيط ويوحي بالفخامة عجبني ان فيها بمب او ضغاط بس مشكلته انه العلبة زجاجية لازم ننتبه لهذي النقطة،،

نجي لوصف الفاونديشن وتركيبته:

مذكور ان تغطيته مات او مطفي، ولونق وير يعني يدوم ساعات طويلة وتغطيته متوسطة الى فل،،

بالنسبة لي استخدمت البيوتي بلندر في دمجه، لاحظت انه تغطية متوسطة وانا شخصيا مااحب ازيد طبقات الفاونديشن بس ممكن تدمجينه بفرشاة لو حابة تغطية كاملة،،ولاحظت انه ينشف بسرعة فلازم تنتبهين لهذي النقطة وتدمجينه بسرعة،، من ناحية انه يتأكسد كنت متخوفة من هالنقطة عشان كذا اخذت افتح مني بشي بسيط عشان اتفاداها،،

بعد ماأوزعه احب اثبته ببودرة شفافة من لورا مارسيه، مستحيل اخلي الفاونديشن بدون تثبيت حتى لو كان مطفي خاصة تحت العين،، اذا كانت بشرتك جافة لازم مرطب قبل وماتحتاجين باودر بعد الأساس بس تحت العين عشان مايخطط الكونسيلر،، 

بشرتي تعتبر مختلطة بعد كم ساعة لاحظت التي زون بدت تلمع شي بسيط مو اوفر،، وهذي طبيعة بشرتي بس بشكل عام ثباته ممتاز مقارنة بكريمات أساس ثانية،،

بشكل عام حبيته واحس انه مناسب من ناحية التغطية والسعر،، واكيد راح استخدمه اكثر 

اللي جربته تكتب لي رايها 

وشكرا لمتابعتكم 

انستقرامي@norah_world11

مجموعة علاج المسام من كيلز kiehls rare earth products

مساء الخير بنات كيف حالكم،،
اليوم ان شاء الله بقولكم تجربتي مع مجموعة لعلاج المسام من كيلز ، المجموعة اللي اشتريتها عبارة عن غسول وماسك وتونر كلها من مستخلصات الطين الأبيض معروف انه يخفف دهون البشرة ويشد المسام ،،

في البداية بقولكم عن نوع بشرتي مثل ماذكرت في بوستات سابقة بشرتي دهنية فيها مسام وحبوب ممكن تزيد من فترة لفترة حسب تغيرات الجو والتغيرات الهرمونية،،
نجي للمجموعة طبعا هي ماتجي مع بعض ممكن تشترين كل منتج لحاله بس انا حبيت اجربهم سوا، الغسول ماصورته معهم للأسف لانه خلص من زمان ورميت العلبة بس حطيت لكم صورته من موقع كيلز، عموماً هو غسول من الطين الابيض قوامه كريمي مذكور انه يشد المسام انا احب استخدمه يوميا اول مااصحى اغسل فيه وجهي ولأنه يعتبر قوي شوي وينشف البشرة لازم مرطب بعده،، الغسول قوامه كريمي ومعه حبيبات بسيطة المفروض انه يسوي تقشير بسيط ويمكن عشان كذا احسه ينشف شوي بس شخصياً انا ناسبني،

بالنسبة للتونر استخدمه يوميا قبل النوم بعد تنظيف البشرة وقبل المرطب، يشيل بقايا الميك اب والدهون وينظف، تركيبة التونر غريبة بتلاحظون انها عبارة عن سائل وباودر تحت لازم ترجون العلبة قبل الإستخدام وتاخذون منه بالقطنة وتمسحون به على الوجه والرقبة، وفي بوستات جاية ان شاء الله راح اتكلم عن انواع التونر وايش فايدته للبشرة بالتفصيل،
نجي للماسك اللي اقدر اقول انه اكثر منتج حبيته وفادني شخصياً عبارة عن ماسك طيني لونه رمادي فاتح استخدمه مرة كل اسبوع الى اسبوعين،  احطه على بشرة نظيفة لحد ماينشف مثل اي ماسك وبعدها اغسله بموية فاترة، بعد الاستخدام لاحظت انه يخفف الدهون ويشد المسام بدون ماينشف بزيادة، واللي بشرتها تدهن مع الفاونديشن ممكن تستخدمه قبل اي مناسبة بيكون شكل الفاونديشن ثابت ومات اكثر،
بشكل عام انا احب اجرب اي منتج مخصص للبشرة الدهنية اللي فيها بثور ومسام، وحسيت ان استخدامي لهذي المنتجات نفع معاي وممكن اشتريها مرة ثانية ومثل كل مرة اقول مافي علاج سحري لمشاكل البشرة يعني حتى لو لقيتي نتيجة من منتج وتركتيه راح ترجع مشاكل بشرتك لان البشرة تحتاج عناية دائمة حسب المشاكل اللي تكون فيها، وحالياً السوق مليان منتجات لمختلف انواع البشرة تقدرين تشوفين اللي يناسبك،
منتجات كيلز صارت متوفرة عندنا اتوقع في غرناطة والنخيل مول، وبالنسبة للأسعار مااذكر بالضبط لأني شاريتها من زمان بس تقدرون تشيكون من موقعهم،،
وان شاء الله تكونون استفدتوا من الرفيو واللي جربت المنتجات تكتب لي تجربتها
اشوفكم في مواضيع جديدة:)
انستقرامي: norah_world11

تجربتي مع ماسك الفحم charcoal mask

مساء الخير بنات
 وأخيرآ بعد انقطاع عن المدونة رجعت بموضوع خفيف وان شاء الله يفيدكم

ماسك الفحم من اخر الهبات مثل مايقولون في العناية والسكن كير، شفنا مقاطع كثيرة له ع اليوتيوب والانستقرام
وأول ماظهر كان في المنتجات الكورية.

مذكور انه يزيل الأوساخ والرؤوس السوداء واالترسبات من البشرة، ويشد المسام، ويشيل الشعر الخفيف من الوجه ويقشر سطح البشرة بشكل خفيف.

طريقته أفضل شي تكون البشرة نظيفة تمامآ وتغسلين الوجه بماء دافئ أفضل عشان يفتح المسام وبعدها تحطين الماسك
مع تجنب منطقة الفم وحول العينين، راح يبدأ ينشف معك وتحسين الجلد مشدود، يحتاج من ٢٠ الى ٣٠ دقيقة حتى ينشف تماما ويصير قطعة وحدة تشيلينها من الوجه كأنك تقشرينه، أتوقع هذا انسب وصف وبعدها تقدرين ترطبين وجهك عادي ممكن يصير فيه احمرار بسيط لكن دقايق ويختفي اهم شي ماتغسلينه بالموية عشان تستفيدين.

بالنسبة لي سويت نفس الطريقة، إللي لاحظته شدت البشرة وقتها وبان الفرق والروؤس السوداء اختفت

ممكن تسويته مرة بالأسبوع مو أكثر ،ومثل ماأقول مع كل ماسك أو تريتمنت ماراح يبين فرق شاسع على طول بس تحسن وقتي وتنظيف لسطح البشرة، واللي جربته تكتب لي رايها وتشاركني
تقدرون تطلبونه اون لاين من أمازون أو بعض التاجرات يوفرونه وسعره مو غالي.
وراح أسوي تاق للحساب اللي طلبت منه الماسك ومنتجات اخرى،،
أشوفكم على خير
ولاتنسون تتابعون المدونة والانستقرام:@norah_world11

Huda Beauty rose gold palette ريفيو عن باليت الشدو من هدى بيوتي

اهلين بنات كيف حالكم،، 

اليوم بقولكم رايي في باليت الشدو من هدى بيوتي طبعا كلنا نعرفها، اول شي نزلت لها لاين للرموش والأظافر وبعدها ارواج وأقلام للشفايف وأراح أكلمكم عنها في بوستات جاية بإذن الله، وآخر شي نزلت باليت الشدو. 

الباليت فيه 18 لون بين المطفية والميتالك او اللمعة، 

وهذا سواتش للألوان

 اول لاين الألوان الميتالك لمعتها حلوة وقوية تبين من اول مسحة، قوامها غريب بين الكريمي والموس، تشبه لحد كبير شدوات كولور بوب، وأفضل طريقة تحطين فيها هذا النوع من الشدوات يكون بالإصبع مو بالفرشة، 

باقي الألوان مطفية تحسينها ناشفة شوي وقوامها زي الطباشير بس اذا حطيتيها بالفرشة تمسك اللون تمام. 

الألوان بشكل عام دافية وتناسب الاندرتون الأصفر يعني تنفع لبشراتنا 

وبنفس الوقت متنوعة جدآ زي ماتلاحظون بين الذهبي والبني والزيتي والعنابي والوردي وحتى الأسود اللي غالبآ مانلقاه بالشدوات يعني ينفع تسوين فيه ايلاينر او سموكي، وحتى الألوان الانتقالية حبيتها زي البيج والرمادي  

باختصار تقدرين تسوين فيها لوكات كثيرة وبصراحة من اول ماشريته مااستخدم الا هو،،

كان نازل ليمتد اديشن في موقعها وانا طلبته قبل فترة

لكن حاليا نزل بسيفورا حتى عندنا عشان كذا حبيت اكتب هالبوست الآن للي حابة تلحق عليه وتشتريه

سعره في سيفورا 250    

وبصراحة اشوفه يستحق السعر

لكن من الناحية السلبية اللي ماحبيته فيه الباكجنق او التغليف تبعه وانه مافيه مراية من الداخل حسّيت  المفروض يكون أفخم من كذا مقارنة بالسعر ولأن منتجات هدى بيوتي دايم تهتم بشكل المنتج.

لكن بشكل عام حبيته وأحس أني ممكن استخدمه بأكثر من شي،، 

اللي تبي تشوفه عن قرب تقدر تشوف التستر في محلات سيفورا

أتمنى ان البوست عجبكم

واشوفكم في مواضيع جديدة:) 

ولاتنسون تزورون المدونة او انستقرامي @norah_world11

تجربتي مع التقشير البارد Dermamelan

السلام عليكم ،،

كيف حالكم بنات 

اعتذر عن انقطاعي عن المدونة بسبب انشغالي لكن ان شاء الله راجعة لكم بقوة وان شاء الله تستفيدون من المواضيع الجاية. 

اليوم بتكلم عن تجربتي الشخصية مع التقشير البارد،  

سويته قبل كم شهر وحبيت اشوف النتايج واتأكد قبل اكتب عنه، بصراحة انا كنت رايحة لطبيبتي الجلدية عشان أسوي فراكشنال ليزر، لكن هي نصحتني بالتقشير البارد او ديرما ميلان وذكرت لي انه يناسبني اكثر، اما الفراكشنال يكون لحالات الندبات العميقة وراح يحتاج وقت اكثر عشان يخف الاحمرار. 

بشرتي مثل ماذكرت في مواضيع سابقة دهنية فيها مسامات وآثار حبوب، وحبيت اجرب شي يخفف منها. 

بالنسبة للتقشير البارد ماله من اسمه نصيب وراح اذكر لكم السبب، في البداية تعقم الوجه وتحط كريم على كامل الوجه اللي عو عبارة عن هليط من أحماض الفواكه وخلته عشر دقايق تقريبا وخلال هذا الوقت بدا يلسعني واحس بحرارة بعدها حطت كريم ثاني اللي هو المقشر وقالت لي اخليه ثمان ساعات ماأغسله، رجعت البيت وخليت الكريم طبعا لازالت اللسعة والحرارة موجودة بس شي معقول يعني مو قوية مرة، اول يومين كان الوجه احمر وبعدها بدا يتقشر بشكل قوي ماتتخيلون كمية القشور اللي طلعت من الجلد، في هذي المرحلة مهم جدا يابنات ترطيب الوجه نصحتني احط كريم فوسيدين او كريم الاسد مرتين باليوم وعطتني اسم كريم ثاني احطه عشان يزيد ويسرع من نسبة التقشير لكن بصراحة ماشريته لأني كنت مابيه يكون قوي اكتفيت بالكريم اللي حطته لي، في هذي المرحلة بعد لازم اتجنب الشمس والحرارة والبخار اي هوا حار بشكل عام، مع وضع واقي الشمس بشكل يومي، لأنك لو ماانتبهتي لهذي النقطة وتعرضتي للحرارة والشمس والوجه يتقشر راح تكون النتيجة عكسية وراح تزيد التصبغات والبقع بدل ماتتعالج، عشان كذا ينصح بهذا النوع من التقشير خلال الشتاء لكن انا سويته بالصيف عشان كذا حبيت اكتب تجربتي الآن للي تبي تجربه. 

المهم بعد عشر ايام تقريبا بدا مفعول التقشير يبين وبدت البشرة تصفى  وأشوف نضارة بسيطة واقدر احط ميك اب والمسامات ملمسها وشكلها اخف من قبل، بشكل عام اقدر اقول التقشير كان متعب بالبداية لكن النتيجة مرضية الحمد لله،وممكن اسويه مرة ثانية، واللي تبي تجربه لازم تنتبه للنقاط اللي ذكرتها . 

وفي النهاية طبيبة الجلدية طبعا هي اللي تقرر كل وحدة وايش يناسبها، وفي مواضيع سابقة كتبت عن تجربتي مع حقن البلازما والميزوثيرابي والليزر الكربوني للوجه،

واتمنى ان الموضوع كان مفيد لكم، 

ولاتنسون الاشتراك بالمدونة 

وانستقرامي:@norah_world11

اشوفكم في بوستات جاية :)  

أفضل الأدوات لتوزيع الفاونديشن بشكل احترافي

مساء الخير،،

كيفكم بنات عدت الايام بسرعة وبدت العشر الأواخر الله يجعلنا من عتقائه ويجعلنا من المقبولين.

اليوم البوست خفيف ودايم انسئل عنه: 

كيف احط الفاونديشن على وجهي بحيث تكون تغطيته حلوة ويثبت طول اليوم! 

بعض البنات تقول اوزع الفاونديشن بيديني! 

وانا شخصياً ماافضل هذي الطريقة لان اليدين تسبب نقل الميكروبات للوجه وايضآ استخدام اليدين مايعطي التغطية المناسبة وممكن يصير شكل الفاونديشن مخطط وغير مدموج. 

باختصار راح اقولكم عن افضل ثلاث ادوات جربتها في توزيع الفاونديشن وعطتني تغطية حلوة . 

اول شي من اليمين فرشاة سيفورا رقم 83، مخصصة للفونديشن السائل والكريمي شعرها ناعم ومشطوفة وتعطي تغطية عالية، بشكل عام فرش سيفورا حلوة وافضلها على فرش ماك، لاني جربت فرش ماك للوجه ولاحظت ان شعرها يطيح مع الغسيل والإستخدام. 

بعدها فرشاة ريل تكنيك puffing brush شكلها دائري وحجمها مناسب للتوزيع، واسعار فرش ريل تكنيك مناسبة جدا وارخص من غيرها، وانصحكم تاخذونها من موقع اي هيرب ارخص من اللي يوفرونها هنا، هذي الفرشاة بالتحديد اعتبرها بديل ممتاز لفرشاة سيقما f80، مع ان سعرها اقل. 

لاحظي ان الادوات السابقة والفرش بشكل عام تعطي تغطية عالية ومناسبة للفاونديشن السائل اكثر. 

أما اذا حبيتي تغطية اخف والفاونديشن قوامه كريمي او الستك فاونديشن استخدمي البيوتي بلندر، اعتبرها من افضل الادوات لتوزيع الفاونديشن لانها ماتخليه يتكتل كأنك مو حاطة شي،بس لازم تكونين مبللتها بالموية وتخلصتي من الزائد، كتبت موضوع عنها بالتفصيل في بداية مدونتي. 

بالنسبة للفرش والبيوتي بلندر تحصلونها اون لاين او محلات سيفورا. 

اتمنى انكم استفدتوا من الموضوع 

لاتنسون الاشتراك بالمدونة

او ع الانستقرام @norah_world11