80's closet زيارة الى بوتيك خزانة الثمانينات

مساء الخير،،

اليوم البوست بيكون خفيف عن زيارة سريعة الى بوتيك خزانة الثمانينات. 

في البداية المحل نسائي وهذا الشي جدآ جميل، فيه ركن خاص للميك اب ومنتجات العناية من كريمات ومقشرات والمنتجات اللي ماتكون متوفرة بمحلاتنا ويتعاون مع عدد من التاجرات اللي يوفرون هالمنتجات في المحل.

 

وفيه ركن لبعض القطع الفنتج واللي يكون منها غالبآ حبة وحدة لكل قطعة وفيه ركن للعبايات والملابس وبعض التصماميم الفريدة. 

وركن للإكسسوارات والقطع المطلية بالذهب شكلها ناعم وأنيق. 

والحلو فيه بعد ان صاحبته هتاف كل شهر تتعاون مع احد البلوقرز او الشخصيات المعروفة بالسوشال ميديا عشان يوفرون بعض قطعهم المفضلة بالمحل. 

وهالشهر تعاونهم مع البلوقر الأنيقة ولاء وهذي بعض المنتجات اللي وفرتها 

المحل موجود بحي الورود وهذا حسابهم بالانستقرام اذا تحبون تعرفون تفاصيل أكثر 80closet2014

وهذي كان مشترياتي البسيطة 

اتمنى يكون البوست عجبكم :) 

اشوفكم في بوست جديد ❤️

ريفيو عن مقشر فرانك الأسترالي

السلام عليكم،،

راح اتكلم اليوم عن مقشر فرانك اللي اشتهر كثير بالفترة الأخيرة. 

 في البداية المقشر من مكوناته الأساسية القهوة 

مصنوع في أستراليا. 

منه ٣ أنواع الاوريجنال مع القهوة وزيت اللوز الحلو وقشور البرتقال والنوع الثاني بجوز الهند والثالث بالكاكاو. 

  فوائد المقشر: 

مذكور في الموقع انه يزيل الجلد الميت والسترتش مارك والسيلولايت ويساعد في حالات الإكزيما وحب الشباب والصدفية.

  طريقة استخدامه: 

يبلل الجسم بالماء ويؤخذ كمية بسيطة من المقشر وتوضع على الجسم بحركات دائرية باليد وركزي على الأماكن اللي تعانين فيها من مشاكل والافضل تتركينه من خمس الى عشر دقائق قبل الغسل. 

أنا شخصيآ جربت النوع الاوريجنال منه بعد الاستخدام تلاحظين ترطيب ونعومة على الجسم ومع الاستمرار يخفف من السيلولايت ويوحد اللون . 

وتقدرين تستخدمينه مرتين او ثلاث بالأسبوع.

   سلبياته: 

ريحته قوية جدآ لأنه غير معطر ووقت الاستخدام يوسخ الحمام لأنه يطيح بكل مكان

 وغير متوفر في المحلات لكن ممكن تطلبينه من موقعهم الرسمي او أمازون او من التاجرات. 

سعره ٢٥ دولار تقريبآ. 

اتمنى يكون الموضوع افادكم :) 

اشوفكم في بوست جديد ❤️

تابعوني على تويتر: norah_aa

انستقرام:norah_world11

كيف تختارين الفاونديشن المناسب لبشرتك

مساء الخير بنات ..

اليوم ان شاء الله راح يكون موضوعنا عن الاندرتون لكل بشرة وكيف تختارين الفاونديشن او كريم الأساس المناسب لبشرتك. طبعآ لازم تحطي ببالك ان الفاونديشن تستخدمينه لتعزيز لون بشرتك الطبيعي وتخلينها موحدة بدون عيوب مو عشان تفتحين لونك او تغمقينه هذا أكبر غلط . 

 

في البداية ايش يعني اندرتون ؟؟

الاندرتون هي الصبغة الداخلية للبشرة وتختلف من شخص لآخر بغض النظر عن لون بشرته اللي نشوفه قدامنا.

 

كيف اعرف الاندرتون لبشرتي؟ 

فيه عدة طرق عشان تعرفين الاندرتون لبشرتك :  

اذا كانت عروق اليد تميل للون الأزرق او البنفسجي فالاندرتون يكون بارد، 

أما اذا كانت تميل للون الأخضر او الزيتوني يكون الاندرتون دافي،

واذا كانت تميل للون الازرق والأخضر معآ يكون الاندرتون محايد يعني ممكن يكون اي الالوان مناسب لك. 

وفيه طريقة ثانية لتحديد نوع الاندرتون انك تلبسي سلسال او اكسسوريز ذهبي وبعدين إلبسي فضي وشوفي اي منهم مناسب لك ويطلع أحلى مع لون الوجه والرقبة.

يعني باختصار اذا كان اندرتونك بارد او cool اختاري فاونديشن أساسه يكون وردي. 

واذا كان اندرتونك دافي او warm اختاري فاونديشن يكون أساسه أصفر . 

أما اذا كان اندرتونك محايد اوneutral ممكن يناسبك النوعين سواء الوردي او الاصفر :) 

وفيه نقطة مهمة ايضآ عند اختيار الفاونديشن وهي نوع بشرتك:

مثلآ لو كانت بشرتك دهنية اختاري أساس او فاونديشن خالي من الزيوت oil free/ matt 

واذا كانت بشرتك جافة اختاري العكس عشان مايجفف بشرتك زيادة وهكذا. 

وجربي الفاونديشن في المحل على الرقبة او العنق مو على اليد ويفضل في اضاءة طبيعية.

هذا كان بوست مبسط عن الاندرتون والفاونديشن اتمنى تستفيدون منه لأني تعبت في البحث عن الموضوع وكتابته :) 

شكرآ لمتابعتكم واشوفكم في بوست جديد.  

 

تابعوني على انستقرام: norah_world11

اول بوست للمدونة

السلام عليكم،، 

ارحب فيكم في مدونتي في أول مواضيعها

في البداية فكرة التدوين كانت في بالي من زماااان 

ولكن كانت مؤجلة لعدة ظروف لحد الآن تيسرت ولله الحمد. مواضيعي هنا راح تكون منوعة بإذن الله حسب اهتماماتي مابين ميك اب، عناية، فاشن، أمومة وطبخ. وإن شاء الله تكون عند حسن ظنكم :) 

شكرا لمتابعتكم