الجمعة، 30 أكتوبر 2015

مقارنة بين سبراي الوجه فكس بلس من ماك واربن ديكاي

مساء الخير بنات.. 

اليوم حابة اتكلم عن مقارنة بين شيئين مااستغني عنهم في الميك اب، البعض يشوف ان استخدامهم واحد لكن الحقيقة انهم مختلفين عن بعض. 



أولآ: سبراي الوجه فكس بلس من ماك ، عبارة عن بخاخ للوجه من مياه معدنية وفيتامينات،البعض يعتبره مثبت للميك اب لكنه يعتبر فنشنق سبراي وراح اذكر لكم كيف هالشي في بقية البوست، استخداماته كثيرة، راح اذكر لكم بعض الأشياء اللي استخدمه فيهم.


ممكن يستخدم كبرايمر يعني اول خطوة قبل الميك اب، يعطي ترطيب ورفريش للبشرة، 
ممكن يستخدم مع الفاونديشن اذا كان عندك فاونديشن ثقيل وتحبين تخففينه ممكن تبخين من الفكس بلس وتخلطينه مع الفاونديشن تكون تغطيته أخف.
ممكن تبخين من الفكس بلس على البيوتي بلندر يرطبها او على فرشة الفاونديشن قبل الدمج.
اذا كان عندك جل لاينر ونشف تقدرين تبخين من الفكس بلس على الجل يخليه يرجع لقوامه قبل وترجعين تستخدمينه. 
اذا عندك شدو لوس او قلتر تقدرين تاخذين منه مع الفكس بلس يثبته لك. 
اذا عندك اي شدو عادي باودري تقدرين تبخين من الفكس بلس ع الفرشة يطلع معاك اللون اقوى والبقمنت ثابتة أكثر. 
اذا خلصتي ميك اب وبعد ماتحطين الباودو والبلش والكونتور ممكن تبخين من الفكس بلس كآخر خطوة يخلي الميك اب ديوي ويخفف اللوك المغبر من البودرة. 


اصدرت ماك حاليآ عدة روائح منه مثل: اللافندر والروز او موية الورد وجوز الهند. 
لكن طبعآ لسى مانزلت عندنا في اخر مرة سألت عنها. لكن الاوريجنال ممكن تلاقونه بكل فروع ماك. سعره تقريبآ ١٥٠ 


نجي للشي الثاني اللي هو السبراي المثبت من اوربن ديكاي. خالي من العطور والبارابين والزيوت، مناسب للي بشرتها دهنية تقدر تبخ منه كآخر خطوة في الميك اب وراح يثبت الفاونديشن ومايخليه يدهن طوال اليوم. اشوفه يختلف عن سبراي فكس بلس لان استخدامه محدود في هالشي لكنه مفيد بعد. من ناحية ثانية مااقدر استخدمه على البيوتي بلندر لانه ينشف بسرعة وماراح يوزع الفاونديشن او الكونسلر بسلاسة مثل الفكس بلس . 

متوفر في سيفورا ناسية السعر لكن بحدود الميتين تقريبآ. 

اتمنى يكون البوست أفادكم، لاتنسون الإشتراك بالمدونة عشان توصلكم مواضيعي. 

اشوفكم على خير:) 

الخميس، 29 أكتوبر 2015

تجربتي مع ماسك الشوكولاته

السلام عليكم 
كيفكم بنات ! 

اليوم حبيت أتكلم عن العناية بالبشرة ومنتج حبيته بالفترة الأخيرة. 




ماسك الشوكولاته من شركة فارم هاوس فرشfarmhouse fresh. الشركة امريكية منتجاتها طبيعية خالية من السولفات والبارابين. عندهم عدة انواع ف حبيت اجرب هذا لانه بالشوكلاته طبعآ وبما انها خالية من المواد الكيميائية ماراح تتحسس منها البشرة. 

يتكون من الكاكاو والعسل وحليب جوز الهند يمي :) 



 طريقته :
مثل أي ماسك تحطينه على بشرة نظيفة ممكن باستخدام فرشاة خاصة بالماسك او بيدك وتكون نظيفة، تخلينه لحد ماينشف وتشطفينه بموية باردة او تمررين مكعب ثلج عشان يقفل المسام.



مذكور على الموقع انه يساعد على تخفيف المسام ويقلل التجاعيد ويعطي البشرة نعومة ونضارة. 

من تجربتي لاحظت من بعد اول استخدام انه ينعش البشرة اذا كانت متعبة ويعطيها رفريش.
حلو للإستخدام قبل الميك اب او قبل مناسبة. مثل ماقلت عن اي ماسك انه مو سحر وتأثيره وقتي لكن اعتبريه من روتينك الأسبوعي ودلعي بشرتك فيه، البعض يتضايق لان ريحة الكاكاو فيه قوية لكن شخصيآ ماازعجني هذا الشي.

متوفر في موقعهم، انا طلبته من هنا  
@pick_your_beauty_thing
سعره ١٥٠ ريال.

اذا جربتوه اكتبوا لي أرائكم، ولاتنسون تشتركون في المدونة عشان توصلكم كل المواضيع . 
 
اشوفكم على خير :) 

الجمعة، 23 أكتوبر 2015

منتجات صباحية للجامعة او الدوام

مساء الخير.. 

كيفكم مع اول اسبوع دراسة 
ان شاء الله تكون سنة دراسية مليئة بالإنجاز والتوفيق لكم جميعآ. 

اليوم حبيت اكتب عن منتجات تقدرين تستخدمينها للصباح بدون مايكون الميك اب ثقيل وبنفس الوقت لو ماعندك وقت او ماتحبين تحطين ميك اب راح تناسبك بدون مايكون شكلك صحيتي من النوم وطلعتي على طول ع الاقل يكون شكلك مرتب. 


اول شي والأهم واقي الشمس وقد تكلمت عنه في بوست سابق ضروري جدآ خاصة لطالبات الجامعة لان التعرض للشمس مثل مااحنا عارفين يضر البشرة جدآ ويسبب امراض كثيرة الله يحمينا، وفيه انواع كثيرة تقدرين تشوفين نوع بشرتك وتاخذين اللي يناسبك من الصيدلية. 

الخطوة الثانية الترطيب: انا شخصيا اذا ماعندي وقت وبطلع الصباح استخدم مرطب معاه نسبة حماية من الشمس يعني اثنين في واحد، وفيه كريمات كثيرة جربتها وحاليآ استخدم كريم من بوتس خفيف وتمتصه البشرة مع نسبة حماية ١٥٪ 

بعدها يجي دور البيبي كريم طبعا انا ماافضل استخدام الفاونديشن صباحآ واساسآ استخدامه بشكل يومي يضر البشرة، فالأغلب يستخدم البيبي كريم اخف ويعطي تغطية، للأمانة انا ماعجبتني فكرة البيبي كريم وجربت كذا نوع من الهاي اند وماناسبتني، 
هذي صورة للبيبي كريم من كلينيك 



بالنسبة لي أفضل استخدم كونسيلر لتغطية الهالات او الحبوب وفيه انواااع كثيرة منها، انا جربت مايبلين instant age rewind وقد كتبت عنه بحسابي بالانستقرام يعجبني انه مايتكتل ويعطي التغطية المناسبة وسعره معقول لكن للأسف ماينباع عندنا يتوفر بالطلب فقط. 

لكن فيه بدائل ثانية رخيصة مثل كونسيلر مايبلين فت مي، او ماك ستديو فكس، ماك منيرالز وغيرها كثير. 

الخطوة اللي بعدها تثبيت الكونسيلر او البيبي كريم اعتبرها ضرورية لان بشرتي مختلطة دهنية عند التي زون  لكن اللي بشرتها جافة تقدر تستغني عنها. 
افضل بودرة جربتها وكتبت عنها من بوبي براون وفيه بدائل كثيرة طبعآ والأشهر بودرة ماك منيرالايز سكن فنش. 

بالنسبة للبلش حلو انك تستخدمين لون طبيعي ومطفي وافضل البلشرات اللي جربتها من ماك وبنفت الوانها هادية وتناسب بشراتنا وتعطي لوك طبيعي. اللي بالصورة من ماك اسم الدرجة gingerly 



بالنسبة للعيون ماانصح انك تتفنين بالايشادو او الايلاينر وغالبآ ماراح يكون فيه وقت، نصيحتي تكتفين بالماسكرا تعطي وسع للعين وتخلي اللوك مكتمل. 
افضل ماسكرا جربتها من الدرق ستور من مايبلين ذافولسيز. 


اللي بعدها خطوة اختيارية للي تحتاجها وهي تعديل الحواجب مو انك ترسمينها رسم لا مجرد تعبين الفراغات وتعدلين شكلها، طبعآ انا من استخدمت البراويز من انستازيا بفرلي هلز للحواجب ماصرت استخدم غيره، سهل الرسم بكثير ووفر علي الوقت لكن للأسف طبعا يتوفر بالطلب.

 

اخر خطوة الشفايف ممكن تكتفين بمرطب او لب بالم مثل مرطبات مايبلين اللي تسمى بيبي ليبس تجي بألوان خفيفة وهادية ولو تلاحظون اغلب منتجات الدرق ستور اللي استخدمها من مايبلين لان جودتها حلوة واسعارها مناسبة، او تقدرين تحطين روج مشمشي او وردي هادي ونبعد عن الالوان الغامقة او الصارخة لأنها غير مناسبة للصباح:) 



بالنسبة للشعر كل وحدة وذوقها والوقت اللي عندها لكن اذا فيه منتج مخصص للشعر ممكن انصحكم فيه بيكون الدراي شامبو او الشامبو الجاف، فكرته انك تبخين منه على جذور الشعر ويعطيك فوليوم ويمتص الدهون لكن مو بشكل يومي طبعآ ممكن ثاني يوم بعد غسل الشعر يعطي رفريش، وفيه شركات كثيرة صارت تنتجه مثل باتيست وصانسيلك وتريسمي، وتحصلينها بالصيدليات. 



ممكن تكون الخطوات كثيرة بالكتابة لكن حبيت اشرح بالتفصيل واذا تعودتي عليها راح تكون خطوات روتينية  وماتاخذ من وقتك عشر دقايق. 

هذا كان بوست اليوم كتبته مستعجلة لكن حبيت اشارككم منتجاتي المفضلة للصباح .
اشوفكم في بوست جديد :) 

الخميس، 22 أكتوبر 2015

كيف تعرفين شكل عيونك والمكياج المناسب لها

مساء الخير بنات،، 

اليوم حابة اتكلم عن موضوع العيون، كل وحدة فينا اكيد تتميز بشكل عيونها الخاص عشان كذا راح يكون لها ميك اب يناسبها، يعني ممكن تشوفين وحدة مكياج عيونها سموكي وقوي وطالع جميل وتسوين نفس اللوك مايطلع حلو، والعكس ممكن يعني وحدة تشوف لوك ناعم وشدو خفيف ومايكون يناسبها.  




بشكل عام العيون لها ثمان أنواع: 
1/ العيون الغائرة.
2/العيون الجاحظة.
3/العيون المبطنة.
3/العيون المتباعدة.
4/العيون القريبة من بعضها.
5/العيون اللوزية.
6/العيون الناعسة او المسحوبة.
7/العيون الآسيوية او المونولد.


العيون الغائرة او العميقة:








اذا كانت العظمة اللي تحت الحاجب بارزة اكثر من الجفن المتحرك ف عيونك غائرة مثل الصورة،، المكياج المناسب لها هو انك تحطين الوان الشدو اللي تكون فاتحة مثل الوردي أو البيج عشان تكسرين حدة العمق هذا وعلى كسرة الجفن تحطين لون غامق. 

العيون الجاحظة:



 


اذا كان جفنك المتحرك وعيونك بارزة، اعتمدي الالوان الغامقة واللوك السموكي راح يكون الأنسب لك.

العيون المبطنة:


 


اذا كان الجفن المتحرك هو اكثر شي بارز بعينك ونازل على خط الرموش في هذي الحالة استخدمي ألوان شدو غامقة على الجفن المتحرك والتدرج من الغامق للفاتح وصولآ الى تحت الحاجب.

العيون المتباعدة عن بعضها:




 
اذا كانت المسافة بين مدمع العين والعين الثانية ابعد من المعتاد، في هذي الحالة اعتمدي على رسمة الآيلاينر العريض، او اختاري الوان شدو غامقة وابتدي من خط الرموش العلوي عشان يعطي ايحاء ان عيونك اقرب لبعضها. 

العيون المتقاربة: 





عكس اللي قبل يعني يكون المجال بين عيونك اقرب من المعتاد، في هذي الحالة اعتمدي على الظلال الفاتحة والشيمر في زاوية العين الداخلية. 

العيون اللوزية:







اذا كانت زاوية العين الخارجية مرتفعه اكثر من مدمع العين او الزاوية الداخلية، في هذي الحالة اعتمدي الألوان الغامقة على الزاوية الخارجية وآيلاينر رفيع مع شدو خفيف اسفل العين عشان يكون فيه توازن لشكل العين. 

العيون الناعسة:





اذا كانت زاوية العين الخارجية نازلة اكثر من مدمع العين، في هذي الحالة افضل لوك لعيونك هو الايلاينر الممدود اعلى العين. 

العيون الآسيوية: 






اللي يتميز فيها الآسيويين بعدم وجود عظمة تحت الحاجب، تقدرين تخففين من هالشي بوضع شدو غامق على الجفن المتحرك والتدرج للفاتح إلى تحت الحاجب.

هذا كان بوست اليوم اتمنى انه كان مفيد لكم خاصة انه اخذ مني وقت ومجهود في جمع المعلومات والصور، 
اشوفكم في بوست جديد.. 

الاثنين، 19 أكتوبر 2015

عشرة ارواج من ماك وبدائل أرخص لها

مساء الخير بنات،،

وأخيرآ رجعت أكتب في المدونة بعد انقطاع بسبب انشغالي الفترة اللي راحت:( لكن ان شاء الله راجعة لكم بمواضيع جديدة تهمكم. 



اليوم حبيت اكتب عن ارواج ماك الشهيرة اللي كلنا عرفناها وحبيناها تميزت بدرجات ألوان كثيرة وثباتها، لكن للأسف ماك كل فترة يزيدون أسعارهم عندنا وصارت الارواج حاليا اسعارها فوق المية. 

في بوست اليوم حبيت اعرض لكم  عشر ألوان مفضلة عندي ومعروفة من ماك وأعرض معها بدائل أرخص تناسب ميزاينية أغلب البنات.
1/
درجة velvet teddy فلفت تيدي من ماك ، والبديل لها bare it all من وت ان وايلد، الماركة هذي راح اذكرها كثير في بوست اليوم، ارواجها تشبه ماك لدرجة كبيرة وثباتها عالي وسعرها مايزيد عن ٣٠ ريال، لكن ماتنباع عندنا انا طلبتها اون لاين، وتتوفر عند كثير من التاجرات، ونفس الماركة لها استاند في فيرجن دبي مول والإمارات مول اللي لها زيارة قريب ممكن تجربها هناك. وهذي سواتش للونين يوضح التشابه بينهم.



2/kinda sexy كايندا سكسي من ماك، والبديل لها just peachy من وت ان وايلد، وهذي سواتش للألوان


 

3/  russian red رشن رد من ماك والبديل لها stoplight red من وت ان وايلد، وبديل ثاني اللي هو really red من ريڤلون وهذي سواتش للألوان. 






4/angel انجل من ماك والبديل لها primerose من ريڤلون. 


5/snob سنوب من ماك والبديل لها pink pout من ريڤلون. 



6: twig تويق من ماك جدآ احب هذا اللون واعتبره من افضل ارواجي من ماك لون دافي ويناسب أي لوك، البديل له touch of spice من مايبلين. 




 الحين بنتقل للألوان الغامقة المعروفة من ماك مثل: 
7/heroine هيرون من ماك والبديل له ravin raisen من وت ان وايلد، وبديل ثاني اللي هو brazen berry من مايبلين. 



8/rebel ريبل من ماك وبديله sugar blum 
من وت ان وايلد. 



9/diva ديڤا من ماك وبديله cherry bomb من وت ان وايلد. 



10/ cyber سايبر من ماك وبديله va va violet من ريڤلون .  







هذا كان بوست اليوم حاولت احط درجات متنوعة بين فاتح وغامق عشان ترضي اذواقكم وان شاء الله تستفيدون منها اذا طلعتوا  تشترون ارواج في المرات الجاية :) 
ولاتنسون تشتركون في المدونة عشان تشوفون مواضيعي القادمة،،
أشوفكم في بوست جديد . 

الأحد، 13 سبتمبر 2015

الطريقة المثالية لتغطية الهالات حول العين

مساء الخير بنات،،




اليوم بتكلم عن أفضل طريقة لتغطية الهالات بالميك اب، الهالات ممكن يكون سببها وراثي وممكن تزيد من قلة النوم وقلة شرب الماء وهذي كلها للأسف أعاني منها. 

الخطوة الأولى في تغطية الهالات:
استخدام كوركتر او مصحح اللون، الكوركتر يكون لونه برتقالي او مشمشي، كل ماكانت هالاتك غامقة انصحك تستخدمين لون يميل للأورنج اكثر، وظيفته يوحد اللون للي عندهم هالات غامقة او يعانون من ظهور العروق الزرقاء حول العين لانك لو استخدمتي الكونسيلر فقط بدون كوركتر ماراح يغطي وبتكون الهالات لونها رمادي، الكوركتر يكون قوامه ثقيل وأفضل طريقة لإستخدامه هي أطراف الأصابع ويوضع على المنطقة الغامقة فقط، افضل انواع الكوركتر اللي جربتها من ماك، نكس، وبوبي براون اللي سبق وكتبت عنه بوست سابق بالمدونة. 



الخطوة الثانية: 
استخدام الكونسيلر او خافي العيوب، بعد ماوحدنا اللون نحط الكونسيلر، وظيفته ينور المنطقة ويفتح لونها،  
احب استخدم كونسيلر يكون قوامه سائل عشان مايتكتل او يخطط، وأحب أدمجه بالبيوتي بلندر وطبعآ غنية عن التعريف واستخداماتها متعددة، كتبت عنها موضوع سابق، افضل انواع الكونسيلرز اللي جربتها من ماك ومايبلين، كونسيلر برو لونق وير من ماك تغطيته ممتازة وثباته عالي لكن احب استخدمه للمناسبات لأنه قوي، وبعض الانواع الثانية بالدرق ستور مناسبة للإستخدام اليومي. 




أفضل طريقة لوضع الكونسيلر هي على شكل مثلث من اسفل العين للأنف مثل الصورة 





الخطوة الثالثة: 
استخدام الباودر للتثبيت، بالنسبة لمنطقة حول العين يفضل استخدام لوز باودر او البودرة السائبة لأن جزيئاتها دقيقة تثبت الكونسيلر وتمنعه من التكتل استخدمها مع فرشاة صغيرة او بالبيوتي بلندر، انواع البودرة السائبة كثير بالمحلات لكن انا شخصيآ ناسبتني بودرة لورا مارسييه وبودرة بنانا ناي لأن لونها اصفر وتناسب بشراتنا واحيانا احب اخلطهم مع بعض، للأسف كلها ماتنباع هنا لكن متوفرة بالطلب. 



هذي اعتبرها الطريقة المثالية في تغطية الهالات وانا جربتها وصارت روتين لمكياجي، ممكن تشوفين الخطوات كثيرة لكن اضمن لك انك بتلاحظين الفرق وماراح تاخذ منك وقت. 

اتكنى يكون بوست اليوم فادكم :) 

أشوفكم في بوست جديد. 

الأربعاء، 2 سبتمبر 2015

تجربتي مع علاج البلازما والميزوثيرابي

مساء الخير.. 

كيف حالكم بنات! ان شاء الله تكونون بأحسن حال. 

فيه مواضيع كثيرة حابة اتكلم عنها في المدونة لكن ضيق الوقت مايسعفني عشان كذا ممكن تكون تدويناتي يوم بالأسبوع.

اليوم حبيت اشارككم في موضوع شخصي ممكن يفيد البنات اللي يهتمون ببشراتهم او يبحثون عن علاجات، ممكن يكون بعضكم جربها وممكن البعض سمع عنها فقط، ومثل ماقلت في بوستات سابقة هدفي من إنشاء هذي المدونة اني افيد البنات واكتب تجاربي واعتبرها هواية لي ومساحتي الشخصية. 




اليوم حبيت اتكلم عن شي جربته قبل فترة وهي علاج البلازما والميزوثيرابي للبشرة. 

قبل مااشرح عن العلاج بالتفصيل وايش اللي سويته، حابة أتكلم عن نقطة مهمة وممكن يغفل عنها بعض البنات وهي ان البشرة جزء مهم وعضو في اجسامنا مثل باقي الأعضاء يتأثر بالتغذية والنوم والحالة النفسية. 
راح اختصر اهم الأمور اللي تؤثر في البشرة إما للأفضل او للأسوأ خاصة عندنا البنات: 
أكثر شي يؤثر في البشرة وممكن يسبب الحبوب والندبات هي الهرمونات ولخبطتها او انتظامها.
العامل الثاني الشمس عشان كذا دايم انبه على أهمية استخدام واقي الشمس خصوصآ للبنات اللي يطلعون الصباح، خاصة ان تأثير الشمس ماتشوفينه لحظتها لكن مع الوقت بتلاحظين البقع والكلف. 
ثالثآ الحالة النفسية لها تأثير كبير على البشرة والشعر وراح اتطرق للنقاط هذي بالتفصيل في مواضيع جاية بإذن الله. 

نرجع لموضوعنا اليوم بكلمكم عن نوع بشرتي اللي هي مختلطة دهنية عند التي زون وباقي الوجه عادي، مااعاني من مشاكل من حب الشباب الحمد لله لكن ممكن يطلع بالشهر حبة او حبتين مع لخبطة الهرمونات، مشكلتي في المسام والحبوب السوداء. وحابة اقول ان العلاجات اللي جربتها في العيادة ماكان القرار وليد اللحظة لا بالعكس، سويت سيرتش عنها وقريت وشفت باليوتيوب ايش الانواع المناسبة لبشرتي. 

ايش هي البلازما؟؟

البلازما هو نوع من انواع علاجات البشرة يتم عن طريق سحب كمية بسيطة من دم المريضة ووضعه في جهاز خاص يقوم بفصل كريات الدم الحمراء عن البلازما وبالتالي نحصل على بلازما غنية بالصفائح الدموية المعروفة بإسم (prp) ، وبعدها يتم حقن الطبقة السطحية من الجلد بهذي الصفائح الدموية. 

الحالات اللي تستخدم فيها البلازما prp :

بعد عمل البلازما يمكن ملاحظة النضارة على البشرة لانه يعمل على تجديد الخلايا وتحفيز الكولاجين فيعطي البشرة مظهر اكثر حيوية وصفاء. 

طبعآ هذا الكلام اللي حصلته بعد مابحثت والكلام اللي قالت لي طبيبتي. 

بتكلم الحين عن حالة البشرة أثناء العلاج وبعده : في البداية طبعا لازم تكون البشرة نظيفة بدون اي ميك اب، وقت العلاج راح تحط كريم مخدر وبالنسبة لي ماحسيت بألم مجرد نغزات بسيطة على سطح البشرة وتنتهي، بعد العلاج احمرار بسيط وكدمات خفيفة ممكن يومين بالكثير وتختفي. 

مميزات علاج البلازما: 
بما أن البشرة يتم حقنها من دم المريضة نفسه يعني ماتحقن بأي مواد غريبة او خارجية لذالك ماله اي آثار جانبية او أضرار، ومثل مايقولون اذا مانفع مايضر بإذن الله، ممكن عمل ثلاث جلسات كل شهر حتى تعطي مفعول اكبر. 


تجربتي الشخصية: 
للأمانة انا سويت التريتمنت نهاية رمضان تقريبآ وقالت لي راح يبين المفعول من اسبوع الى عشرة ايام، بالنسبة لحالتي مالاحظت أي تغيير او تحسن ملحوظ، يمكن لأني كنت مهتمة من قبل بعمل التقشير والماسكات عشان كذا ماكان له تأثير ملحوظ، لأن تأثيره بسيط جدآ وممكن يبين اكثر مع البشرات التعبانة. عشان كذا ماتحمست أسوي جلسات ثانية. 

في الزيارة الثانية وبعد مابحثت أكثر وقلت لها ان البلازما مافادني بشي اقترحت علي اجرب علاج الميزوثيرابي والميزورولر، وانا قد قريت عنهم من قبل، أخذت موعد ورجعت لها. 

ايش هو الميزوثيرابي؟ 

نوع من علاجات البشرة يتم عن طريق حقن فيتامينات ومعادن وأحماض أمينية في الطبقة الوسطى من الجلد باستخدام إبر رفيعة، وبعدها تستخدم الميزورولر لفعالية أكثر وهي عبارة عن عجلة من الروؤس الدقيقة مكونة من إبر رفيعة بطول ٥ مل يتم تحريكها على سطح البشرة لإزالة الخلايا الميتة وتحفيز الكولاجين. 

الحالات اللي تستخدم فيها الميزوثيرابي: 
يساعد في تخفيف آثار الحبوب والندبات، يعطي البشرة ملمس ناعم  ومظهر صحي أكثر ويخفف من المسام والهالات، وممكن بعد عدة جلسات يعمل على تفتيح البشرة وتخفيف البقع. 

هل له آثار جانبية؟ 
 
بعد البحث والقراءة مالقيت اي آثار او اضرار له لان المواد اللي تحقن هي فيتامينات تفيد سطح الجلد وتأثيرها مؤقت، والعلاج مثبت وتمت الموافقة عليه من هيئة الغذاء والدواء. 

ومثل اي تريتمنت للبشرة لازم تكون نظيفة. 

تجربتي مع الميزوثيرابي: 
في البداية عانيت من ألم واحمرار شديد استمر عدة ايام، عطتني كريم فوسيكورت او كريم الأسد عشان استخدمه اول يومين يهدي البشرة ويخفف الإحمرار، الامتناع عن الميك اب والشمس الا بكريم واقي، بعد اسبوع تقريبآ لاحظت سطح الجلد بدا يتقشر والبشرة بدت تكون اصفى وأنعم ونتيجته مرضية نوعآ ما، وممكن اسوي جلسة ثانية كل شهر مع انها مؤلمة:( 

اكثر شي مؤلم بالنسبة لي كان استخدام الميزورولر تحسين بحرارة في الجلد لكن تخف مع الوقت وممكن استخدام كمادات باردة. 

باختصار النوعين كلها حلوة ومفيدة للبشرة وكل وحدة ونوع بشرتها واحتياجها، بالنسبة للأسعار ماراح اذكرها لأنها معروفة في كل عيادات الجلدية، اما الدكتورة اللي سويت عندها والمركز ممكن اجرب طبيبة ثانية لأني بصراحة مااقتنعت فيها تمامآ. 

نصيحة أخيرة: 
دايم بعد عمل التقشير سواء بالبيت او بالعيادة استخدمي سيروم بفيتامين سي ويفضل يكون بشكل يومي قبل النوم مثل اللي بالصورة وصفته لي الدكتورة ومعروف فوائد فيتامين سي للبشرة في تجديد الخلايا وتخفيف آثار الحبوب خاصة مع التقدم في السن. 
 
لاتنسوون ان هذي كلها علاجات مؤقتة وحلو انك تهتمين بنفسك من فترة لفترة لكن الأهم اهتمامك في البيت بالماسكات والغذاء المناسب. 
وفي البوست السابق كتبت عن ماسكات طبيعية فادتني ودايم اسويها بالبيت، 
هذا كان موضوع اليوم اتمنى اني افدتكم خاصة انه من اكثر المواضيع اللي كتبتها من ناحية الشرح والإطالة وحاولت اجمع اهم المعلومات عنها.
لاتنسون الإشتراك بالمدونة اذا حابين تشوفون كل مواضيعي الجاية.

أشوفكم في بوست جديد :)