ريفيو عن باليت نيكد 3 ومقارنة بين باليتات نيكد الثلاثة

السلام عليكم

كيف حالكم بنات 

مرررة اشتقت للمدونة والكتابة فيها، وكاتبة مواضيع كثيرة بس تأخرت بسبب الظروف وضيق الوقت:( 

المهم الموضوع اليوم عن باليت نيكد 3، تجيني عليه اسئلة كثيرة وهل يستحق الشراء او لا. 

انا شريته اول مانزل قبل سنتين تقريبآ وماكانت موجودة عندنا اربن ديكاي في فروع سيفورا والحين صارت متوفرة اخيرا الحمد لله ف هذا البوست ان شاء الله يكون مفيد لكم. 

طبعآ نزل بعده باليت السموكي لكن ماجربته وماافكر اشتريه صراحة لاني تشبعت من الباليتات.. 

في البداية الباليت هذا الوانه تميل الروز القولد ودرجات الوردي وهذا اللي يميزه عن الباليتات السابقة، العلبة يجي معاها عينات برايمر، وفرشاة بطرفين طرف لوضع الشدو على الجفن وطرف للدمج، سعره في الموقع حوالي 55 دولار، والباليت يتكون من 12 لون، تبدا من الفاتح وتتدرج للغامق،

 

نجي للألوان بالتفصيل: 

من اليسار لليمين:  

Strange لون اوف وايت مطفي ينفع هايلايت تحت الحاجب او مدمع العين.

Dust روز قولد مع لمعة خفيفة. 

Burnout وردي مع شيمر 

Limit لحمي مع اندرتون وردي مطفي ينفع للدمج.

Buzz نحاسي مع اندرتون وردي وشيمر ينفع لكامل الجفن 

Trick ذهبي مع شيمر 

Nooner بني مع اندرتون موف ينفع للدمج 

Liar  نحاسي مع شيمر خفيف حلو الدمج او السموكي 

Factory بني على رمادي

Mugshot زيتي مع شيمر ذهبي 

Darkside بني على رمادي اغمق من اللي قبل 

Blackheart اغمق لون في الباليت يعتبر بني غااامق مع شيمر 

بالنسبة لي الباليت بشكل عام حلو والوانه مثل ماذكرت غير الباليتات اللي قبل لانه يميل للوردي والروز قولد، يعني اللي تحب هذي الالوان وتستخدمها راح يعجبها.. 

لو نقارن بينه وبين باليتات نيكد 1,2 

الاول اقدر اقول اكثر واحد عجبني واستخدمه الوانه تناسب بشراتنا لانها تميل للألوان الترابية ودرجات البني وينفع للاستخدام اليومي والثاني ماعجبني صراحة لان اغلب ألوانه فيها شيمر ولمعتها قوية وماتنفع بشكل يومي. 

آخر جزء حابة اتكلم عنه اللي هو كيف تفرقون بين الاصلي والتقليد،، خاصة ان التقليد عندنا منتشر بشكل يخوف وبنفس السعر واغلب البنات مايفرقون بينهم، اول شي نصيحتي في الميك اب اذا جيتي تشترينه إما انك تاخذينه من المحلات الموثوقة عندنا مثل سيفورا عشان تضمنين الأصلي او تطلبينه من موقعهم اون لاين،،

الشي الثاني عشان تعرفين ان الأصلي دايم يكون عليه سيريال نمبر في الكرتون والعلبة نفسها من ورا، اذا كان مافيه هالشي معناها انه تقليد 

وهذا فيديو للتوضيح 

 
 اتمنى يكون الموضوع افادكم وأشوفكم في بوست جديد :)

لاتسون تشتركون بالمدونة او الانستقرام @norah_world11

مفضلاتي من منتجات الميك اب والعناية بالبشرة في 2015

مساء الخير بنات،، 

اليوم وأخيرا راح اكتب عن المنتجات اللي حبيتها في السنة اللي فاتت وناسبتني وشريتها اكثر من مرة،،

اغلب هذي المنتجات قد تكلمت عنها بالتفصيل في مواضيع سابقة واليوم راح اتكلم عنها باختصار لان المنتجات كثيرة وحاولت اقلصها قد مااقدر عشان مايكون البوست طويل وممل عليكم. 

في البداية منتجات العين: 

كريم العيون من بوبي براون قد كتبت عنه في بوست سابق، من افضل كريمات العين اللي جربتها احب استخدمه قبل الميك اب وقبل النوم، ترطيبه ثقيل مناسب للي عندهم هالات او جفاف للمنطقة. 

والثاني كوركتر من بوبي براون استخدمه قبل الكونسيلر عشان مايقلب على رمادي، عندهم درجات متنوعة تقدرين تختارين الدرجة حسب بشرتك. 

وبالنسبة للترطيب احب استخدم هذا الكريم المرطب من بوتس، فيه نسبة حماية من الشمس استخدمه للنهار قبل الميك اب حلو للبشرات المختلطة ومايدهن البشرة. 

بالنسبة لترطيب الشفايف استخدم هذا المرطب من ديور احب استخدمه قبل النوم خصوصآ بالشتاء او قبل الروج يعطي ترطيب ومايخلي الشفايف تتقشر. 

 

البرايمرز جربت انواع كثيرة لكن ماحسيتها فادتني بشي الا هذا النوع من ميك اب فورايفر، نزلوا السنة اللي فاتت انواع وكل نوع المفروض انه يعالج شي بالبشرة ويخلي مظهر الميك اب احلى انا جربت هذا النوع smootning المفروض انه يخفف من المسام ويخلي شكل الفاونديشن افضل ويطول بدون مايسيح. وبشكل عام انا مو مرة مع البرايمرات ومااحب مظهرها علي احيانا احطه اذا عندي مناسبة بس.  

نجي للفاونديشنز هذولي الاثنين اكثر شي استخدمته وحبيته، فاونديشن برو لونق وير من ماك تغطيته مناسبه للسهرات وثابت بس ماينفع بشكل يومي يعني خليه للمناسبات بس، درجتي في ماك nc25، الثاني فاونديشن انفالابل من لوريال مناسب للبشرات الدهنية والمختلطة. 

الكونسيلرات اتوقع حفظتوها من كثر ماقلت عنها: كونسيلر ايج ريوايند من مايبلين تغطيته متوسطة احبه للإستخدام اليومي واستخدم قبله كوركتر ويعطيني تغطية بيرفكت، الكونسيلر الثاني ماك برو لونق وير من ماك ثقيل يغطي اي عيوب بالبشرة او حبوب بس ماانصح فيه بشكل يومي. 

احب ادمج الميك اب بالبيوتي بلندر مااستغني عنها ويفرق معها الميك اب بشكل واضح، سبق وكتبت عنها بالتفصيل واعتبرها شي اساسي ومالها اي بديل من الاسفنجات الثانية او اسفنجة ريل تكنيك الاصلية تفرق بشكل واضح وانتبهوا يابنات انتشر تقليدها بشكل كبير، الاصلية تحصلونها في سيفورا، واستخدم المنظف تبعها ينظفها زين واستخدامه مريح هذي ثالث علبة اشتريها من المنظف عجبني هذا النوع اكثر من السائل.

نكمل مع منتجات العيون اكثر شي جربته من الشادوهات هذي الباليتات وقد كتبت عنها بالتفصيل عشان كذا بذكرها بشكل سريع: شدو من ماك اسمه all that glitters غني عن التعريف، لونه قولد خفيف ولمعته حلوة ممكن تحطينه لحاله او مع ايلاينر مناسب في كل الاوقات، باليت نيكد naked basics ، وباليت نيكد الاصدار الاول وبالنسبة لي اعتبره افضل باليتات اربن ديكاي في الجودة وتنوع الألوان، وباليت سليك. 

بالنسبة للحواجب اقدر اقول استخدمت منتج واحد للحواجب وريحني، قلم الحواجب من انستازيا، متوفرة منه درجات كثيرة وموجود في سيفورا دبي او بالطلب من موقعهم.بس عيبه ان سعره غالي ويخلص بسرعة.

هذي اكثر الماسكرات اللي جربتهم وحبيتها الفترة اللي فاتت: ماسكرا فولسيز من مايبلين تكثف الرموش وتعطيها فوليوم بسيط، والثانية رولر لاش من بينيفت تعطي طول وماتتكتل بس عيبها انها ضد الموية عشان كذا تنظيفها صعب. 

الفترة اللي فاتت تعلمت اركب رموش وجربت انواع كثيرة وجربت انواع غرا بعضها مثل ديو ماعجبني ابد وريحته مزعجة، وغرا هدى بيوتي قوي بس ينفع للمناسبات وهذا النوع اللي عجبني ماله ريحة واستخدامه سهل واذا نشف يكون شفاف موجود قي صيدلية وايتس. 

نجي لمنتجات الوجه: بما إن بشرتي مختلطة استخدام البودرة عندي شي ضروري وهذي اكثر انواع استخدمتها طول السنة، استخدم بودرة لورا مارسييه لتحت العين اثبت فيها الكونسيلر، وبودرة بوبي براون لباقي الوجه، وفي ايام الصيف والحر حبيت بودرة ريميل تعطي مظهر مطفي للبشرة وخفيفة وقد كتبت عنهم في بوستات سابقة. 

اكثر هايلايت استخدمته soft and gentle من ماك، اتوقع هذي اكثر اضاءة مشهورة منهم، احب استخدمها على عظمة الخد تعطي لوك ديوي خفيف مو زي بعض الاضاءات تخلي الوجه كله يلمع وهذا الشي مااحبه، وبودرة choclate soliel من تو فيسد تنفع برونزر او كونتور خفيف واحلى شي ان ريحتها تشوكلت. 

البلشرات اختصرتها في بلشرين من ماك احبهم ودايم استخدمهم بشكل متبادل: 

الاول gingerly، والثاني I'm a lover. 

واحلى فقرة عندي هي الارواج طبعا، احب انوع واستخدم الوان كثيرة وهي اكثر شي ممكن اشتريه بالميك اب بس اقدر اقول هذي اكثر الارواج اللي استخدمها وبعضها رجعت اشتريها: من اليمين روج سائل من ديور لونه وردي طبيعي واذا نشف مايتقشر ابد رقمه 373،

ثلاث الوان احبها من ماك:  

Brave لونه نود جميل مع السموكي او لحاله  

Chatter box لونه وردي حلو للصيف والتان

Twig لونه لحمي على نود بس اغمق من الاول. 

روج من ريميل من مجموعة كيت موس لونه وردي ومطفي، رقمه 103

روج من ايف سان لوران وردي فاتح وملمسه كريمي من مجموعة volupte sheer رقمه 9   

روج من كولور لوب اسمه lumiere، لونه لحمي على موف حلو في كل وقت، ارواج كولور بوب بشكل عام حلوة وانصح فيها بس مشكلتها متوفره على موقعهم، بس فيه تاجرات صاروا يوفرونها واسعارها معقولة. 

بالنسبة لتنظيف الميك اب فيه منتج واحد مااستغني عنه ومهما غيرت ارجع له البيوديرما اكيد، قوامه خفيف ع البشرة ومايحسس العين ويناسب البشرات الدهنية لانه مائي مو زيت. 

وايضآ من منتجات العناية بالبشرة اللي استخدمتها طول السنة وحبيتها ماسك الطين من آي هيرب وماسك الشوكولاته من فارم هاوس وكتبت عنها موضوع مفصل للي حابة تشوف تجربتي. 

هذي باختصار اكثر المنتجات اللي كنت استخدمها بالسنة وبعضها بشكل يومي، واذا حابين اكتب عن شي بالتفصيل اكتبو لي، 

اشوفكم في بوست جديد:)

ولاتنسون الاشتراك بمدونتي والانستقرام @norah_world11

تجربتي مع الليزر الكربوني spectra laser

مساء الخير بنات 

اول بوست للسنة الجديدة 2016، ان شاء الله تكون سنة خير علينا كلنا، 

اليوم حبيت اتكلم عن الليزر الكربوني وتجربتي الشخصية معاه. 

في البداية هذا الليزر معروف بإسم spectra vrm يمكن يستخدم للوجه او الجسم، 

يفيد عدة اشياء اهمها: علاج التصبغات والبقع وبالتالي توحيد اللون.

علاج المسام وحبوب الشباب.

تشقير الشعر الوبري للوجه.

نوعية العلاج تختلف حسب التحكم بموجات الجهاز نفسه. 

انا جربته للوجه وكان هدفي تخفيف المسام واثار الحبوب، وناوية استخدمه للتشقير في الجلسات الجاية، سويت ثلاث جلسات لحد الآن في البداية جلسة كل اسبوعين وبعدها ممكن كل شهر مرة،

طريقته: في البداية يحطون المادة الكربونية على الوجه مع تجنب منطقة العينين وتخليها حوالي نصف ساعة، وبعدها تبدا بالليزر على نفس المنطقة. 

خلال الجلسة حسيت بلسعات وحرارة بس مو لدرجة قوية يعني ممكن نتحملها، وريحة الكربون كانت مزعجة بس خفت تدريجيآ. 

بعد الجلسة يكون فيه احمرار خفيف بس يخف بعد كم ساعة، والافضل انك تستخدمين كريم فوسيكورت وماتحطين ميك اب يومين ع الاقل. 

انا شخصيآ لاحظت ان المسام خفت بشكل تدريجي وشقر شعر الوجه، والميك اب بعده يكون شكله افضل، لكن هذا النوع من الليزر مااعتبره علاجي لأن المسام والحبوب ماتختفي تمامآ وممكن ترجع بعد فترة، عشان كذا اعتبره من روتين العناية وممكن اسويه كل شهر، ويعتبر اخف من الفراكسل وغيره من علاجات البشرة لانه مايسبب حروق واحمرار وسعره اقل مقارنة بالعلاجات الثانية. 

صار متوفر بأغلب مراكز الجلدية وسعره يختلف حسب المركز بس في الغالب بين ٤٠٠ و ٧٠٠ للجلسة الوحدة. 

هذي تجربتي ان شاء الله تكون افادتكم واللي جربته تكتب لي تجربتها. 

اشوفكم في بوست جديد. 

ولاتنسون الاشتراك بالمدونة والانستقرام @norah_world11

أرواجي المفضلة للشتاء

مساء الخير،، 

كيف حالكم بنات..

الجو صار بارد والشتاء بدا رسميآ،، ومثل مانغير ملابسنا فيه، الميك اب يتغير بعد.

التغيير حلو والارواج الغامقة تنتشر اكثر بالشتاء اهم شي كل وحدة تعرف الألوان اللي تناسبها، وتجرب لحد ماتكتشف اللي يناسبها.  

شخصيآ بوريكم عشرة من اختياراتي للأرواج اللي احبها وممكن احطها هالأيام، ممكن تكتفين بأحد هذي الألوان مع كونسيلر ومسكارا ويكون اللوك متكامل. 

نبدا بالأرواج من اليمين لليسار: 

اول واحد روج من شيسيدو اخذته من سيفورا دبي، اللون لحمي فاتح كريمي ماينشف الشفايف، حلو للنهار او بالليل، رقمه 351.

الثاني من لانكوم لونه احمر صح يعني مو غامق ولا على اورنج، نهايته مطفي بس تركيبته حلوة ماتنشف الشفايف، مناسب للسهرات، رقمه 132.

الثالث من انجلوت لونه لحمي مايل للبني نهايته مطفي ولازم ترطيب قبله لانه ينشف، ارواج انجلوت حلوة وتعتبر بديلة لماك عند بعض البنات لكن انا مااحب تركيبتها لانها ناشفة وتقشر الشفايف، رقم اللون هذا 410. 

الرابع من ميك اب فور ايفر لونه عنابي جميل للأيام هذي ومناسب للسهرات نهايته مخملي ماينشف ولايقشر الشفايف وارواج ميك اب فور ايفر بشكل عام حلوة، رقمه 48.

الخامس من ميك اب فور ايفر حجم السامبل جتني مع هدية سيفورا لونه احمر غامق يميل للعنابي لكن افتح من اللي قبله، رقمه 43.

السادس من ماك الروج المشهور ريبل rebel درجته عنابي مايل للبنفسجي اللون حلو وجرئ، نهايته مخملي يعني حلو وماينشف الشفايف وارواج ماك غنية عن التعريف. 

السابع من ماك تويق twig من ارواجي المفضلة من ماك لونه حلو بين اللحمي والنود على موف نفس اللون اللي اشتهرت فيه كايلي جينر،اللون جميييل جدا ويناسب اغلب البشرات تركيبته مخملية. 

الثامن من ماك بريف brave لونه نود على بيج حلو مع السموكي او لحاله بالنهار وتركيبته مخملية. 

التاسع من ريفلون من كولكشن كولور بورست color burst، تركيب الارواج هذي كريمية وفيها لمعة خفيفة، اللون بنفسجي على فوشي  رقمه 005 . 

العشر من ريفلون نفس الكولكشن اللون هذا احمر ومافيه لمعة مثل اللون السابق وثباته معقول رقم الدرجة 250. 

ماك وانجلوت محلاتهم بأغلب المولات، وارواج لانكوم وميكب فور ايفر موجودة في سيفورا، وريفلوت موجودة في صيدلية وايتس وبوتس.

هذي كان اقتراحاتي لكم لأرواج الشتاء وان شاء الله اكون افدتكم بألوان جديدة واللي جربت منها شي تكتب لي. 

لاتنسون الاشتراك بالمدونة او على الانستقرام @norah_world11 

اشوفكم في بوست جديد :)

مقارنة بين كونسيلر نارس وكونسيلر فت مي من مايبلين

السلام عليكم،، 

كيف حالكم بنات،،

اليوم التدوينة راح تكون عن الكونسيلرات اللي اعتبرها اهم شي بالميك اب لاني اشوف الميك اب اول واهم شي يكون تغطية للعيوب قبل يكون ألوان،، وهذي وظيفة الكونسيلر.

راح اكتب لكم مقارنة بين نوعين من الكونسيلرات وفيه كثير من البنات واليوتيوبرز يشوفون انهم يتشابهون لكن انا شخصيآ بعد ماجربتهم اشوفهم مختلفين تماما،،

راح اتكلم عن كونسيلر فت مي من مايبلين وكونسيلر ريدينت كريمي من نارس، 

في البداية الشبه الوحيد اللي اشوفه بينهم مثل ماهو واضح بالصورة التشابه في الباكجنق او التعليب يعني كلهم نفس شكل العلبة ونفس طريقة الاستخدام، مع ملاحظة ان كمية كونسيلر نارس اكثر بشي بسيط،، 

نجي للإختلافات: 

كونسيلر فت مي من مايبلين بشكل عام جيد وسعره معقول، قوامه ثقيل واذا نشف يصير ماااات او مطفي عشان كذا لازم ترطيب قبله وماانصح فيه للي بشرتها جافة او عندها خطوط تحت العين لأنه راح يبرزها أكثر، درجاته متنوعة وتناسب بشراتنا انا درجتي فيه رقم 25، والحلو فيه بعد انه متوفر في اماكن كثيرة مثل صيدلية وايتس وسنتر بوينت وستي ماكس، سعره بحدود 60 ريال.  

كونسيلر ريدينت كريمي من نارس: 

من اسمه قوامي كريمي وخفيف على البشرة اخف من مايبلين ويتوزع بسهولة، واذا نشف مايخطط وماينشف المنطقة تغطيته متوسطة الى كاملة وثباته يطول، متوفر بدرجات كثيييرة انا درجتي ginger، لكن يعيبه قلة توفره لأنه موجود بس في سيفورا واتوقع للحين مانزل في سيفورا السعودية ، سعره اتوقع 150 ريال، 

طريقتي قبل اي كونسيلر استخدم كريم مرطب للعين وبعدها احط كوركتر وبعدها الكونسيلر وادمجه بالبيوتي بلندر ويعطيني تغطية ممتازة. وكتبت موضوع في المدونة بالتفصيل عن تغطية هالات العين وافضل كونسيلر عندي. 

نصيحتي اذا كنتي تبين كونسيلر يومي تغطيته حلوة وسعره معقول استخدمي مايبلين بس رطبي العين كويس، واختاري الدرجة المناسبة ،،دايم اختاري كونسيلر نفس لون بشرتك او افتح بدرجة بس عشان مايتأكسد او يقلب رمادي. 

هذا كان موضوع اليوم اتمنى انه أفادكم 

ولاتنسون الاشتراك بالمدونة او الانستقرام على @norah_world11

اشوفكم في موضوع جديد :) 

مجموعة الهوليدي من تو فيسد

مساء الخير بنات،، 

اليوم بكلمكم عن شي جميييل، طبعا مثل ماتعرفون أغلب شركات الميك اب تسوي مجموعات خاصة فيها قبل نهاية كل سنه ميلادية طبعآ، والسنة هذي جربت مجموعة كولكشن الهوليدي من تو فيسد.

تو فيسد ماركة غنية عن التعريف موجودة في سيفورا، جربت منهم الشدوات والبرايمر والماسكارا وكانت كلها جيدة، الكولكشن هذا شفته على موقع سيفورا مع مجموعات ثانية لكن هذا أسرني فيه الباكجنق والتصميم الكيوت، تصميم السنة هذي مستوحى من باريس، اسم الكولكشن ( Le grand palais ).

هذا شكل العلبة من برا واسم الكولكشن، 

داخل الكرتون نلقى العلبة هذي وكتيب صغير يعطيك افكار عشان تسوين لوكات معينة بالباليت الموجود، 

داخل العلبة نلقى الشكل الكيوت هذا فيه بعض المنتجات الشهيرة من تو فيسد واللي حققت مبيعات عالية هذي السنة، واللي هي برايمر للعين ينحط قبل الشدو، وروج سائل درجة melted peony، وماسكرتهم الشهيرة better than love، وكلها بحجم السامبل،

نجي للشي الأساسي وهو الباليت يتكون من 18 لون ايشادو اغلبها شيمري او فيها لمعة، درجات الألوان منوعة بين الترابي والبني والبيج، ودرجة الرمادي والكحلي والبنفسجي والوردي والزيتي والأسود،

 وتحت نلقى برونزر sun bunny،وفيه لمعة خفيفة عشان مذا ماينفع كونتور ،وهايلايتر flush، وبلشرين كلها مطفية وهذا الشي عجبني لأني مااحب البلشر يكون فيه لمعة، واحد يميل للوردي skyline، والثاني على مشمشي stardust، 

الباليت بشكل عام جميل، لكن الشدوات لاحظت ان لمعتها قوية وجودتها اقل من باقي شدوات تو فيسد اللي عادة تكون ثابتة بالمقارنة مع هذي تحتاج اكثر من طبقة وتتفتت مع الاستخدام لكن الافضل تحطين الشدو اول وبعدها تكملين ميك اب الوجه عشان يكون اللوك نظيف، 

ينفع يكون هدية وسعره حلو وينفع للبنات اللي يحبون يجمعون ميك اب مثلي، واذا عندك باليت مرتاحة في استخدامه اشوف انه كافي، 

حبيت اقولكم عنه هالفترة بما إنه لازال موجود في سيفورا، سعره 260 واتوقع فيه كرلكشنات قانية لكن انا جيت وسألت عن هذا بالتحديد.

اشوفكم في بوست جديد 

ولاتنسون الاشتراك بالمدونة او على الانستقرام @norah_world11

مشترياتي من موقع آي هيرب iherb.com

مساء الخير بنات..

اليوم الموضوع راح يكون مختلف، اول مرة اكتب بوست عن مشترياتي وحبيت أشارككم طلباتي من موقع آي هيرب. 

الموقع مقره امريكي مشهور عالميآ بمنتجاته العضوية للشعر والجسم والبشرة ومواد غذائية عضوية، اسعاره جدآ معقولة واحلى شي بالموقع انه يشحن دايركت للسعودية، ماراح اتكلم عن تفاصيل الطلب اون لاين والخطوات لأن كثير بلوقرز تكلموا عنها وتقدرون تسوون سيرتش للطريقة، لكن اهم شي يكون عندك بطاقة الدفع المسبق فيزا او ماستر كارد وباقي الخطوات سهلة. 

اول شي كان بتكلم عنه كريمات الترطيب لليد خاصة مع بداية الشتاء والجفاف وكثرة الغسيل حبيت اجرب هذا النوع سمعت عنه مدح اسمه working hands مذكور انه مناسب للأيدي الجافة ويساعد بترطيبها، قوامه ثقيل ويفضل استخدامه قبل النوم. 

سعره في الموقع 24 ريال.

الكريم الثاني من eucerin حجمه مناسب للشنطة والاستخدام اليومي، تركيبته خفيفة ومايدبق عكس الاول.سعره 23 ريال. 

 

الكريم الثالث حبيت اخذ كريم مرطب مناسب للأطفال خالي من العطور وكنت حابة اجرب كريم أفينو لكن دايم مخلص من الموقع، عشان كذا اخذت كريم من mothers friend مناسب للأمهات والحوامل وحتى الأطفال، سعره 26 ريال.

بالنسبة للجسم اخذت غسول للجسم من nubian heritage وهو الصابون الافريقي، مكوناته من الشوفان والألوفيرا وفيتامينe، مذكور في الموقع انه مناسب للي يعانون من حساسية او حبوب بالجسم.سعره 37 ريال.  

الغسول الثاني للجسم من نفس الشركة اللي هو غسول جوز الهند والبابايا والفانيلا، مايحتاج اقولكم ليش اخترته:) يكفي المكونات، 

مذكور في الموقع انه يرطب القشرة وماينشف الجلد، كل الغسولين تقييماتهم عالية بالموقع. 

سعره 37 ريال. 

للوجه اخذت قناع من queen helen قناع للبشرة الدهنية والمختلطة من النعناع، جربته لحد الآن مرة وحدة، اول ماتحطينه تحسين بالبرودة بسبب النعناع وبعد ماينشف وتشطفينه يعطيك احساس بالنظافة والانتعاش، باختصار يعتبر قناع منظف ومنقي للبشرات الدهنية، سعره 14 ريال. 

وايضا للوجه طلبت الاسفنجة البديلة للبيوتي بلندر اللي هي من ريل تكنيك، مااتوقع تكون بنفس الجودة بس شفتها في الموقع سعرها حوالي 22 ريال وحبيت اجربها. 

للشعر طلبت الزيت المشهور من جوز الهند، تقييماته عالية بالموقع مذكور انه عضوي وطبيعي مناسب للوجه والجسم والشعر وحتى للطبخ، لكن انا راح استخدمه لشعري، سعره 47 ريال.

  

شامبو للشعر من nature's gate، من الرمان وزهرة الشمس، خالي من السولفات والبارابين، سعره 22 ريال. 

 

للشعر فيتامينات بيوتين المشهورة، في البوست السابق كتبت عن الفيتامينات اللي جربتها في الفترة الماضية ورأيي فيها، وحبيت اغير هالمرة واجرب البيوتين الآراء متضاربة عنها بعض البنات نفعتهم ومدحوها والبعض ماناسبتهم وسببت لهم حبوب، بس قلت اتوكل على الله وأجربها. سعرها في الموقع 39 ريال.

  

وهذي الماسكات لليدين والقدمين على شكل قفاز، تتكون من خلاصة الألوفيرا وزيت الجوجوبا وزبدة الشيا،  ترطب اليدين والاقدام، مناسبة للإستخدام مرة واحدة سعرها 3 ريال للكيس الواحد. 

 

وطلبت بعد زبدة الفول السوداني العضوية انا شخصيآ ماآكلها لكن حبيت اشتريها للبيت واللي ذاقوها عجبتهم لذيذة وخفيفة، سعرها 14 ريال.

هذا كان بوست اليوم وبصراحة باقي عندي اشياء حاطتها بالوش لست ويمكن اطلبها بأقرب فرصة بس حبيت اشارككم مشترياتي البسيطة،،  

الموقع بشكل عام انصح فيه جدآ وكل شخص ممكن يلقى اللي يناسبه،،

أشوفكم في بوست جديد

لاتنسون تتابعون المدونة 

او على انستقرامي @norah_world11