مساء الخير بنات،،
اليوم وأخيرا راح اكتب عن المنتجات اللي حبيتها في السنة اللي فاتت وناسبتني وشريتها اكثر من مرة،،
اغلب هذي المنتجات قد تكلمت عنها بالتفصيل في مواضيع سابقة واليوم راح اتكلم عنها باختصار لان المنتجات كثيرة وحاولت اقلصها قد مااقدر عشان مايكون البوست طويل وممل عليكم.
في البداية منتجات العين:
كريم العيون من بوبي براون قد كتبت عنه في بوست سابق، من افضل كريمات العين اللي جربتها احب استخدمه قبل الميك اب وقبل النوم، ترطيبه ثقيل مناسب للي عندهم هالات او جفاف للمنطقة.
والثاني كوركتر من بوبي براون استخدمه قبل الكونسيلر عشان مايقلب على رمادي، عندهم درجات متنوعة تقدرين تختارين الدرجة حسب بشرتك.
وبالنسبة للترطيب احب استخدم هذا الكريم المرطب من بوتس، فيه نسبة حماية من الشمس استخدمه للنهار قبل الميك اب حلو للبشرات المختلطة ومايدهن البشرة.
بالنسبة لترطيب الشفايف استخدم هذا المرطب من ديور احب استخدمه قبل النوم خصوصآ بالشتاء او قبل الروج يعطي ترطيب ومايخلي الشفايف تتقشر.
البرايمرز جربت انواع كثيرة لكن ماحسيتها فادتني بشي الا هذا النوع من ميك اب فورايفر، نزلوا السنة اللي فاتت انواع وكل نوع المفروض انه يعالج شي بالبشرة ويخلي مظهر الميك اب احلى انا جربت هذا النوع smootning المفروض انه يخفف من المسام ويخلي شكل الفاونديشن افضل ويطول بدون مايسيح. وبشكل عام انا مو مرة مع البرايمرات ومااحب مظهرها علي احيانا احطه اذا عندي مناسبة بس.
نجي للفاونديشنز هذولي الاثنين اكثر شي استخدمته وحبيته، فاونديشن برو لونق وير من ماك تغطيته مناسبه للسهرات وثابت بس ماينفع بشكل يومي يعني خليه للمناسبات بس، درجتي في ماك nc25، الثاني فاونديشن انفالابل من لوريال مناسب للبشرات الدهنية والمختلطة.
الكونسيلرات اتوقع حفظتوها من كثر ماقلت عنها: كونسيلر ايج ريوايند من مايبلين تغطيته متوسطة احبه للإستخدام اليومي واستخدم قبله كوركتر ويعطيني تغطية بيرفكت، الكونسيلر الثاني ماك برو لونق وير من ماك ثقيل يغطي اي عيوب بالبشرة او حبوب بس ماانصح فيه بشكل يومي.
احب ادمج الميك اب بالبيوتي بلندر مااستغني عنها ويفرق معها الميك اب بشكل واضح، سبق وكتبت عنها بالتفصيل واعتبرها شي اساسي ومالها اي بديل من الاسفنجات الثانية او اسفنجة ريل تكنيك الاصلية تفرق بشكل واضح وانتبهوا يابنات انتشر تقليدها بشكل كبير، الاصلية تحصلونها في سيفورا، واستخدم المنظف تبعها ينظفها زين واستخدامه مريح هذي ثالث علبة اشتريها من المنظف عجبني هذا النوع اكثر من السائل.
نكمل مع منتجات العيون اكثر شي جربته من الشادوهات هذي الباليتات وقد كتبت عنها بالتفصيل عشان كذا بذكرها بشكل سريع: شدو من ماك اسمه all that glitters غني عن التعريف، لونه قولد خفيف ولمعته حلوة ممكن تحطينه لحاله او مع ايلاينر مناسب في كل الاوقات، باليت نيكد naked basics ، وباليت نيكد الاصدار الاول وبالنسبة لي اعتبره افضل باليتات اربن ديكاي في الجودة وتنوع الألوان، وباليت سليك.
بالنسبة للحواجب اقدر اقول استخدمت منتج واحد للحواجب وريحني، قلم الحواجب من انستازيا، متوفرة منه درجات كثيرة وموجود في سيفورا دبي او بالطلب من موقعهم.بس عيبه ان سعره غالي ويخلص بسرعة.
هذي اكثر الماسكرات اللي جربتهم وحبيتها الفترة اللي فاتت: ماسكرا فولسيز من مايبلين تكثف الرموش وتعطيها فوليوم بسيط، والثانية رولر لاش من بينيفت تعطي طول وماتتكتل بس عيبها انها ضد الموية عشان كذا تنظيفها صعب.
الفترة اللي فاتت تعلمت اركب رموش وجربت انواع كثيرة وجربت انواع غرا بعضها مثل ديو ماعجبني ابد وريحته مزعجة، وغرا هدى بيوتي قوي بس ينفع للمناسبات وهذا النوع اللي عجبني ماله ريحة واستخدامه سهل واذا نشف يكون شفاف موجود قي صيدلية وايتس.
نجي لمنتجات الوجه: بما إن بشرتي مختلطة استخدام البودرة عندي شي ضروري وهذي اكثر انواع استخدمتها طول السنة، استخدم بودرة لورا مارسييه لتحت العين اثبت فيها الكونسيلر، وبودرة بوبي براون لباقي الوجه، وفي ايام الصيف والحر حبيت بودرة ريميل تعطي مظهر مطفي للبشرة وخفيفة وقد كتبت عنهم في بوستات سابقة.
اكثر هايلايت استخدمته soft and gentle من ماك، اتوقع هذي اكثر اضاءة مشهورة منهم، احب استخدمها على عظمة الخد تعطي لوك ديوي خفيف مو زي بعض الاضاءات تخلي الوجه كله يلمع وهذا الشي مااحبه، وبودرة choclate soliel من تو فيسد تنفع برونزر او كونتور خفيف واحلى شي ان ريحتها تشوكلت.
البلشرات اختصرتها في بلشرين من ماك احبهم ودايم استخدمهم بشكل متبادل:
الاول gingerly، والثاني I'm a lover.
واحلى فقرة عندي هي الارواج طبعا، احب انوع واستخدم الوان كثيرة وهي اكثر شي ممكن اشتريه بالميك اب بس اقدر اقول هذي اكثر الارواج اللي استخدمها وبعضها رجعت اشتريها: من اليمين روج سائل من ديور لونه وردي طبيعي واذا نشف مايتقشر ابد رقمه 373،
ثلاث الوان احبها من ماك:
Brave لونه نود جميل مع السموكي او لحاله
Chatter box لونه وردي حلو للصيف والتان
Twig لونه لحمي على نود بس اغمق من الاول.
روج من ريميل من مجموعة كيت موس لونه وردي ومطفي، رقمه 103
روج من ايف سان لوران وردي فاتح وملمسه كريمي من مجموعة volupte sheer رقمه 9
روج من كولور لوب اسمه lumiere، لونه لحمي على موف حلو في كل وقت، ارواج كولور بوب بشكل عام حلوة وانصح فيها بس مشكلتها متوفره على موقعهم، بس فيه تاجرات صاروا يوفرونها واسعارها معقولة.
بالنسبة لتنظيف الميك اب فيه منتج واحد مااستغني عنه ومهما غيرت ارجع له البيوديرما اكيد، قوامه خفيف ع البشرة ومايحسس العين ويناسب البشرات الدهنية لانه مائي مو زيت.
وايضآ من منتجات العناية بالبشرة اللي استخدمتها طول السنة وحبيتها ماسك الطين من آي هيرب وماسك الشوكولاته من فارم هاوس وكتبت عنها موضوع مفصل للي حابة تشوف تجربتي.
هذي باختصار اكثر المنتجات اللي كنت استخدمها بالسنة وبعضها بشكل يومي، واذا حابين اكتب عن شي بالتفصيل اكتبو لي،
اشوفكم في بوست جديد:)
ولاتنسون الاشتراك بمدونتي والانستقرام @norah_world11
