أفضل الأدوات لتوزيع الفاونديشن بشكل احترافي

مساء الخير،،

كيفكم بنات عدت الايام بسرعة وبدت العشر الأواخر الله يجعلنا من عتقائه ويجعلنا من المقبولين.

اليوم البوست خفيف ودايم انسئل عنه: 

كيف احط الفاونديشن على وجهي بحيث تكون تغطيته حلوة ويثبت طول اليوم! 

بعض البنات تقول اوزع الفاونديشن بيديني! 

وانا شخصياً ماافضل هذي الطريقة لان اليدين تسبب نقل الميكروبات للوجه وايضآ استخدام اليدين مايعطي التغطية المناسبة وممكن يصير شكل الفاونديشن مخطط وغير مدموج. 

باختصار راح اقولكم عن افضل ثلاث ادوات جربتها في توزيع الفاونديشن وعطتني تغطية حلوة . 

اول شي من اليمين فرشاة سيفورا رقم 83، مخصصة للفونديشن السائل والكريمي شعرها ناعم ومشطوفة وتعطي تغطية عالية، بشكل عام فرش سيفورا حلوة وافضلها على فرش ماك، لاني جربت فرش ماك للوجه ولاحظت ان شعرها يطيح مع الغسيل والإستخدام. 

بعدها فرشاة ريل تكنيك puffing brush شكلها دائري وحجمها مناسب للتوزيع، واسعار فرش ريل تكنيك مناسبة جدا وارخص من غيرها، وانصحكم تاخذونها من موقع اي هيرب ارخص من اللي يوفرونها هنا، هذي الفرشاة بالتحديد اعتبرها بديل ممتاز لفرشاة سيقما f80، مع ان سعرها اقل. 

لاحظي ان الادوات السابقة والفرش بشكل عام تعطي تغطية عالية ومناسبة للفاونديشن السائل اكثر. 

أما اذا حبيتي تغطية اخف والفاونديشن قوامه كريمي او الستك فاونديشن استخدمي البيوتي بلندر، اعتبرها من افضل الادوات لتوزيع الفاونديشن لانها ماتخليه يتكتل كأنك مو حاطة شي،بس لازم تكونين مبللتها بالموية وتخلصتي من الزائد، كتبت موضوع عنها بالتفصيل في بداية مدونتي. 

بالنسبة للفرش والبيوتي بلندر تحصلونها اون لاين او محلات سيفورا. 

اتمنى انكم استفدتوا من الموضوع 

لاتنسون الاشتراك بالمدونة

او ع الانستقرام @norah_world11

العناية باليدين والأظافر hands and nails routine

 مساء الخير،، 

اليوم بتكلم عن موضوع يهم كل بنت، لأن الإهتمام باليدين جزء من اهتمام البنت بنفسها، وحبيت اتكلم عنه الفترة هذي بالذات مع كثرة الشغل بالمطبخ وغسل اليدين بكثرة، وتحية لكل وحدة ماعندها خدامة مثلي :) 

الموضوع ممكن يكون بديهي ومايحتاج بوست لكن انا كتبته عشان افيد البنات بمنتجات انا جربتها ونفعتني، والاهم من هذا كله انها اشياء بسيطة ومتوفرة وماراح تاخذ منك وقت. 

اللي عندها جفاف بيدينها او اسمرار في المفاصل لازم تستمر على الترطيب، حاولي ترطبين يدك كل ماغسلتي، وخلي لك مرطب بالاماكن اللي تكونين فيها مثلا خلي لك كريم جنب السرير وكريم بالمطبخ وكريم على المدخل عشان ماتنسين، انا جربت كريمات كثيرة لكن هذي بعض الاشياء اللي استخدمها الحين، 

كريم كلارنس حلو خلال اليوم ترطيبه متوسط،وكميته كويسة لكن يعيبه سعره مرتفع، موجود في وجوه او سيفورا، كريم نوكس وايوسرين من الكريمات اليومية الضرورية وحجمها مناسب للشنطة، كريم نيتروجينا قوامه ثقيل ويدبق عشان كذا افضله قبل النوم، الكريمات هذي موجودة بالصيدليات وآي هيرب، حاولي تسوين تقشير لليدين مرة او مرتين بالاسبوع مو اكثر عشان يشيل الجلد الميت ويفتحها، ولازم الترطيب مباشرة بعد التقشير، تقدرين تحطين اي مقشر عندك للجسم، انا استخدم حاليا مقشر ملح البحر هذا من لش، وانصح باستخدام قفازات الترطيب ممكن مرة كل اسبوع او اسبوعين ترطيبها حلو وتنفع اي وقت.  

بالنسبة للأظافر انا اظافري ماتطول وتتكسر بسرعة هذي الاشياء نفعتني:

سيروم للأظافر من سالي هانسن تقدرين تستخدمينه خلال اليوم لأن قوامه مثل الزيت تتشربه البشرة ومايمنع الوضوء، تحطينه على الظفر والجلد اللي حواليه، مذكور انه يمنع الاظافر من التكسر ويطولها بس انا احب ترطيبه، 

وزيت فيتامين إي حلو للترطيب بشكل عام، بس انا افضل استخدمه لليدين والاظافر لان ترطيبه قوي،اخذته من آي هيرب.

من ناحية الاظافر دايم ابتعدي عن المبرد المعدني لانه يكسر الأظافر ويضعفها، استخدمي المبرد الفليني الخفيف اخذته من ذا بودي شوب اربع جهات يبرد الظفر ويلمعه بشكل بسيط..

اذا كنتي تحطين مناكير كثير دايم استخدمي بيس كوت او طبقة حماية للظفر من المناكير، واخر شي توب كوت تثبت المناكير وتخليه مايتقشر، وتقدرين تحصلينها بكل ستاندات المناكير مثل او بي اي، ايسي، سالي هانسن وغيرها، انا استخدم اللي موجود بالصورة من او بي اي لانه ينفع بيس كوت وتوب كوت سوا..

هذا كان بوست اليوم اتمنى انه افادكم، 

ولاتنسون متابعة المدونة

او ع الانستقرام: @norah_world11

اشوفكم في بوست جديد.  

Summer trends for 2016افكار لملابس العيد من موضة السنة

مساء الخير بنات،،

موضوعنا اليوم مختلف وبعيد عن الميك اب، 

حبيت اشارككم اكثر الصيحات الدارجة هذا الصيف وفرصة للي تبي تاخذ فكرة وتتسوق للعيد هالايام. 

فيه اشياء كثيرة رجعت من ايام الستينات والسبعينات من ناحية القصات والأقمشة. 

من اهمها الدينم او قماش الجينز، صار الجينز مايقتصر على شكله المعتاد كبنطلون بالعكس صار في قطع ثانية مثل التنورة او التوب او فستان جينز، ونلاحظ اغلب المشاهير اعتمدوا اللوك هذا مؤخرآ. 

من الاشياء الدارجة أيضاً الاقمشة الموردة واللي يكون عليها طبعات او اشكال هندسية، تعطي اللوك أنوثة وتحلي الجسم، تختلف اشكالها واحجامها حسب كل تصميم واعتمدوها مصممين كثير مثل دولتشي اند قابانا ومارك جيكوبز وغيرهم. 

البناطيل اللي يكون خصرها مرتفع وقصتها واسعة high waisted دارجة بعد، لكنها تناسب النحيفة اكثر لانها تحدد الخصر وتعطي عرض من تحت، 

الجمب سوت له فترة ولازال دارج باختلاف الألوان والطول، ومن الاشياء اللي ممكن تنفع كاجوال او رسمي حسب تنسيقك له، 

القصة اللي تكون اوف شولدرز او اسفل الكتف من الاشياء اللي تعطي انوثة وممكن يكون فستان او توب، انصح فيه للي تكون منطقة الصدر عندها صغيرة، اما اللي اكون اكتافها عريضة الافضل تبتعد عنه لانه راح يبرزها اكثر. 

من الالوان الدارجة الفترة هذي الفواتح والوان الباستيل ، مثل الاوف وايت والبيج والبيبي بنك والسماوي، سواء تكون توب او تنورة، والالوان هذي عموما تكون حلوة يالصيف. 

وقماش الدانتيل من الاشياء الموجودة بكثرة هذي الفترة سواء يكون فستان كامل او توب او تنورة، 

 

كل الصور السابقة في البوست من هذي البرامج pintrest, polyvore، 

وفي النهاية اتمنى يكون البوست افادكم او ألهمكم بستايل معين، ومو شرط يكون اللبس غالي او من ديزاينر مشهور، اغلب المحلات منزلين موديلات وقطع نفس اللي ذكرت او مشابهة لها، كله يعتمد على ذوق صاحبة اللبس اهم شي تكونين عارفة ايش اللي يناسب جسمك،ومثل مايقولون: 

Its not about the brand, its about style

 وانا شخصياً افضل البساطة في كل شي. 

اشوفكم في بوست جديد:) 

ولاتنسون تتابعون المدونة

او على الانستقرام : @norah_world11

Hair treatment أنواع علاجات الشعر وتجربتي مع علاج الكولاجين

السلام عليكم..

مبارك عليكم الشهر الله يتقبل منا ومنكم ويجعلنا من صوامه وقوامه، 

المدونة كملت سنة والايام تمشي بسرعة، راح اسوي قيف اواي بهذي المناسبة ان شاء الله قريبآ، 

قبل فترة سويت علاج الكولاجين للشعر وحبيت اشارككم تجربتي لو فيه بنت حابة تسويه او تعرف عنه معلومات اكثر. 

في البداية بقولكم عن انواع العلاجات الخاصة بالشعر: الكراتين ، والبروتين، والكولاجين.

الكيراتين او الأمازون يعتبر الاقوى فيها، الكيراتين هو بروتين طبيعي ومكون أساسي للشعر، الشعر الناعم يتكون من حوالي ٨٨٪ من الكيراتين او اكثر بينما تقل النسبة للشعر السميك او الخشن، 

الكيراتين الصناعي الموجود بالصالونات حاليآ مستخرج من الحيوانات او النباتات، وافضل انواعه البرازيلي، واهم شي يكون خالي من مادة الفورمالين او الفورمالدهايد بسبب ضررها على الشعر والبشرة. 

البروتين هو كيراتين مطور مضاف له بروتينات اخرى يختلف نوعها بحسب نوع الشعر، مثلآ الشعر التالف والجاف جدآ يحتاج نوع مختلف عن الشعر متوسط الجفاف، والافضل زيارة اخصائية الشعر عشان تقرر لك بس في النهاية انتي تتخذين القرار لأن كل وحدة هي اللي تعرف نوعية شعرها بالضبط. 

النوع الثالث هو الكولاجين وهو النوع اللي جربته، 

قبل اكثر من ست شهور سويته بصالون بالرياض، طبيعة شعري مصبوغ وويفي خفيف وكان هذيك الفترة اطرافه جافة بزيادة ويتساقط، 

زرت الصالون وقلت لهم عن الكولاجين قالت راح ينفعك يخفف الجفاف والنفشة ويعطي لمعة، وانا شخصيآ ماكنت ابي شي ينعم مرة كنت ابي احافظ على طبيعة شعري لكن يكون صحي اكثر، 

النوع اللي جربته امريكي من بي اتش بيوتي،مع العلم ان هذا النوع علاجي فقط يعني ماراح ينعم الشعر او يخليه سايح،  ضروري تشوفين المنتج اللي يحطونه لك وتقرين مكوناته، 

طريقة التريتمنت هذا انها توزعه على الشعر وتخليه تقريبا نص ساعة وبعدها غسلته واستشورت الشعر عادي، ماكان له ريحة قوية وقت التريتمنت وهذا شي ايجابي، سويت العلاج هذا واخذت منهم شامبو وبلسم من نفس الشركة، 

بعد العلاج اول شي لاحظته ان الجذور دايم تكون مدهنة بزيادة مع ان شعري ماكان كذا فكنت اضطر اغسله يوميآ، الشي الثاني ريحة الشامبو مزعجة بالنسبة لي ماحبيتها،رجعت الصالون وكلمت المسوؤلة عن المشكلة هذي قالت يمكن ماناسبك الكولاجين جربي الفيلر عندنا:( لاتعليق صراحة، المشاغل عندنا قليل اللي يكونون محترفين وفاهمين بالشعر، المشكلة المشغل هذا عرفته من بلوقر معروفة تسوي له دعاية وقلت بجرب شغلهم، لكن ارجع واقول ممكن اللي ماناسبني يناسب غيري، الشي الايجابي اللي لاحظته وقتها لمعة في الشعر وحاليآ شعري رجع لطبيعته بس بشكل عام ماراح ارجع اسوي الكولاجين لأن طبيعة شعري ماتحملته ممكن ينفع للشعر الكيرلي اكثر، في النهاية حابة اقول اي علاج بتسوينه لشعرك اقري وابحثي عنه وشوفي يناسبك او لا، وروحي لمكان موثوق، 

هذا كان بوست اليوم اتمنى انه افادكم 

اشوفكم في بوست جديد:) 

لاتنسون تزورون المدونة فيها مواضيع تهمكم 

او الامستقرام:@norah_world11

فاونديشن الكوشن (المخدة) من ذا فيس شوب

مساء الخير بنات،، 

اليوم بكلمكم عن منتج في عالم الميك اب انتشر قبل فترة في المنتجات الآسيوية وصارت بعض شركات الميك اب الاوروبية تنتج نفس فكرته، اللي هو فاونديشن الكوشن او المخدة،

ايش يعني فاونديشن الكوشن؟ 

هو عبارة عن كريم اساس يتميز بعلبته او طريقة الباكجنق بحيث يكون في اعلى العلبة مثل الغطاء الشفاف وداخله المنتج ونقدر نتحكم من خلاله بالكمية اللي نحتاجها وعادة يكون هذا الفاونديشن غير مطفي يعني يعطي اللوك الرطب مثل بشرات الآسيويات. 

انا اخذته قبل فترة من محل ذا فيس شوب، وحبيت اجربه زين قبل اكتب عنه بالمدونة. 

طبعا المحل شهير بمنتجاته الكورية عمومآ من عناية وميك اب، للأمانة ماقد جربت الميك اب منهم قبل لكن دايم اخذ الماسكات والكريمات وكانت كويسة. 

نجي للفاونديشن مذكور على العلبة انه سي سي كريم cc، والسي سي كريم شبيه بالبي بي كريم من ناحية انه فيه نسبة ترطيب وحماية من الشمس لكن تغطيته اكثر، بالنسبة لي اعتبره فاونديشن افضل، موجود عندهم نوعين منه: نوع تغطيته اخف وفيه نسبة ترطيب اكثر وبالتالي يناسب البشرات الجافة والعادية افضل، والنوع الثاني هذا اللي اخذته تغطيته اعلى وخالي من الزيوت، وكل النوعين فيها نسبة حماية من الشمس ٥٠٪ يعني مناسب للنهار. 

علبته مريحة وفيها مراية واستخدامها عملي للشنطة والسفر، سعره مناسب اخذته ب ١٢٠، يجي معاه الاسفنجة الخاصة مثل ماهو واضح بالصورة، لكن يعيبه ان درجاته جدا قليلة لانه منتج اسيوي ف غالبا ماتناسب كل البشرات العربية، اخذت هذي الدرجة natural beige وكانت اغمق وحدة بس طلعت مناسبة بالنسبة لي لأني مااحب الفاونديشن يكون افتح من لوني. 

استخدمته بالبيوتي بلندر يعطي منظر رطب وديوي للبشرة وتغطية خفيفة، واستخدمته مع الاسفنجة اللي معاه يعطي تغطية اثقل. 

لكن بشكل عام لازم اثبته ببودرة مطفية لأني لاحظت انه يدهن خلال اليوم، وهذا شي اكيد لأن بشرتي مختلطة. 

بشكل عام عجبني بس مااعتبره افضل شي جربته، انصح فيه اكثر للبشرات الجافة واللي تحب اللوك الديوي للبشرة، ومثل ماذكرت موجود في ذا فيس شوب. 

اتمنى يكون البوست عجبكم،

لاتنسون الاشتراك بالمدونة وقراءة تدويناتي وعلى الانستقرام: @norah_world11

اشوفكم في بوست جديد :) 

بدائل أرخص لمنتجات غالية

السلام عليكم 

كيف حالكم بنات ،،

رجعت لكم بعد الوعكة الصحية ولله الحمد، واشتقت لمدونتي وفي بالي مواضيع كثييييرة ان شاء الله القى الوقت المناسب واحطها. 

اليوم بتكلم عن موضوع مهم وممكن يفيد بنات كثير وكل منتج بكتب عنه هنا انا مجربته شخصياً وعارفة اللي بتكلم عنه.  

الفكرة في موضوع اليوم مثل ماكتبت فوق اني راح اقولكم عن منتجات احبها ومااستغني عنها لكن يعتبر سعرها مرتفع، وبديل لها ارخص. 

اول شي بتكلم عن بيوديرما اللي مزيل المكياج المائي اكلمت عنه كثير في مدونتي واكيد اغلبكم شاف مواضيعي ويعرف اني مااستغني عنه في تنظيف المكياج خفيف على البشرة وانا بشرتي مختلطة دهنية ومااحب المنظف يكون زيتي عشان كذا افضل بيوديرما لكن عيبه يخلص بسرعة، واحيانا مااحصله، بالصدفة شريت منظف المكياج من قارنيه نفس التركيبة أساسه مائي وعجبني انه نفس المفعول مع اني مو صحبة مع منتجات قارنيه لكن هذا المنتج بالذات اقدر اقول انه ممتاز، سعره اقل بكثير من بيوديرما وحجمه اكبر واوفر، موجود بالدانوب واغلب الصيدليات. 

من الاشياء اللي مااستغني عنها قلم الحواجب او البراو ويز من انستازيا مريح في الاستخدام وعملي ومن استخدمته صرت ارسم حواجبي بسرعة وماتاخذ وقت، مؤخراً طلبت الشبيه له من نكس نفس الشكل تقريباً طرف يكون قلم للرسم والطرف الثاني السبولي او الفرشاة واقدر اقول عنه بديل لقلم انستازيا مع فرق السعر لان نكس ارخص كثير،اتوقع انه موجود بفروع سنتر بوينت اللي فيها ستاند خاص بماركة نكس. 

ثالث شي بالنسبة لي ضروري خاصة بالصيف اللي بودرة لامتصاص الدهون وتخفيفها خلال اليوم، شريت قبل فترة هذي البودرة من بنيفت شكلها كيوت وتعليبها مناسب للشنطة او السفر ومعاها الفرشة تبعها، ولقيت انها نفس البودرة من ريميل وتؤدي نفس الوظيفة اللي هي تخفف الدهون واللمعة بالوجه لكن ريميل ارخص. 

اخر شي بتكلم عنه هذي الماسكرا من بنيفت ماسكرة رولر لاش تكلمت عنها قبل فترة تعطي فوليوم حلو للرموش وتكثفها وبديل لها ماسكرا ذا فولسيز من مايبلين نفس الفرشاة ونفس المفعول لكن زي ماقلت مايبلين ارخص، هذي النوع من الماسكرا تكون ووتر بروف عشان كذا صعب ازالتها وماانصح فيها بشكل يومي، ريميل ومايبلين موجودة في سنتر بوينت وصيدلية وايتس. 

هذا كان بوست اليوم اتمنى انكم استفدتوا منه  ولاتنسون الاشتراك بالمدونة عشان توصلكم مواضيعي وعلى الانستقرام: @norah_world11 

اشوفكم في بوست جديد :) 

افضل البلشرات اللي جربتها

مساء الخير بنات،،

من زمان ماكلمتكم عن الميك اب واليوم جيتكم بموضوع جديد ان شاء الله يفيدكم. 

اليوم حابة اتكلم عن افضل البلشرات اللي جربتها 

لانك ممكن تشترين اشياء وماتستفيدين منها او ماتناسبك وهذي البلشرات اللي بعرضها افضل الانواع اللي جربتها من ناحية تنوع الألوان والثبات.

نبدا بهذا اللون الجميل من ماك ويعتبر من اشهر البلشرات من ماك اسمه: gingerly. لونه مشمشي دافي مطفي ويناسب اغلب البلشرات واغلب اللوكات. 

بعده هذا اللون من ماك اسمه: pinch me اغمق بشوي من اللي قبل وغالبا يناسب البشرات الحنطية والعربية اكثر ومسحة بسيطة منه تكفي لان اللون قوي وثابت وبلشرات ماك غنية عن التعريف من ناحية الثبات. 

بعده نجي لدرجات الوردي هذا اللون اسمه: pink swoon لونه وردي فاتح مطفي بدون لمعة يعطي لوك الباربي ممكن يكون لونه قوي وفاقع بالعلبة بس لما احطه بالفرشاة يكون اللون هادي وجميل.عجبني لدرجة اني رجعت اشتريه لما خلص.  

ومن درجات الوردي بعد هذا اللون اسمه:I'm a lover. وردي يعتبر بيبي بينك مع شيمر بسيط عادة مااحب البلشرات اللي يكون فيها لمعة لان بشرتي دهنية، لكن هذا لمعته بسيطة وتطلع بشكل حلو. 

ومن قيرلان هذا البلشر مشمشي مع شيمر خفيف اتوقع واضح اني احبه خلصت العلبة في مدة بسيطة، يعطي لوك طبيعي وهيلثي البشرة،وثباته حلو، درجته: apricot souffle 515 .

ومن بنيفت هذا البلشر اعتبره مشمشي فاتح مع شيمر اسمه: dandelion 

لكن ماكان ثباته قوي مثل باقي البلشرات اللي تدوم ساعات. 

ومن ذا بالم اشهر بلشرين عندهم هذا اللون hot mama مشمشي على برونز احب استخدمه بالصيف لانه يعطي البشرة مظهر ديوب وفيه لمعة ويناسب اغلب البلشرات، اللون مع شيمر وثباته اعتبره كويس، لكن ماعجبني الشيمر فيه حسيته قوي وممكن يبرز عيوب البشرة اكثر عشان كذا ماانصح فيه للي عندها حبوب او مسامات.  

واخر بلشر اسمه down boy درجته وردي اغمق من باقي الورديات اللي عندي كمية بسيطة منه تكفي ولونه مطفي.

بشكل عام انا افضل البلشرات تكون مطفية عشان اقدر اتحكم بكمية الاضاءة ومكانها في الوجه. 

وبالنسبة لي بلشرات ماك افضل اللي جربته ثباتها حلو ولونها قوي. 

هذا كان بوست اليوم، اتمنى انه فادكم اذا حبيتوا تشترون بلشر جديد او تخلونه مرجع لكم. 

اشوفكم في بوست جديد

ولاتنسون الاشتراك بالمدونة او الانستقرام: @norah_world11