تجربتي مع ماسك الفحم charcoal mask

مساء الخير بنات
 وأخيرآ بعد انقطاع عن المدونة رجعت بموضوع خفيف وان شاء الله يفيدكم

ماسك الفحم من اخر الهبات مثل مايقولون في العناية والسكن كير، شفنا مقاطع كثيرة له ع اليوتيوب والانستقرام
وأول ماظهر كان في المنتجات الكورية.

مذكور انه يزيل الأوساخ والرؤوس السوداء واالترسبات من البشرة، ويشد المسام، ويشيل الشعر الخفيف من الوجه ويقشر سطح البشرة بشكل خفيف.

طريقته أفضل شي تكون البشرة نظيفة تمامآ وتغسلين الوجه بماء دافئ أفضل عشان يفتح المسام وبعدها تحطين الماسك
مع تجنب منطقة الفم وحول العينين، راح يبدأ ينشف معك وتحسين الجلد مشدود، يحتاج من ٢٠ الى ٣٠ دقيقة حتى ينشف تماما ويصير قطعة وحدة تشيلينها من الوجه كأنك تقشرينه، أتوقع هذا انسب وصف وبعدها تقدرين ترطبين وجهك عادي ممكن يصير فيه احمرار بسيط لكن دقايق ويختفي اهم شي ماتغسلينه بالموية عشان تستفيدين.

بالنسبة لي سويت نفس الطريقة، إللي لاحظته شدت البشرة وقتها وبان الفرق والروؤس السوداء اختفت

ممكن تسويته مرة بالأسبوع مو أكثر ،ومثل ماأقول مع كل ماسك أو تريتمنت ماراح يبين فرق شاسع على طول بس تحسن وقتي وتنظيف لسطح البشرة، واللي جربته تكتب لي رايها وتشاركني
تقدرون تطلبونه اون لاين من أمازون أو بعض التاجرات يوفرونه وسعره مو غالي.
وراح أسوي تاق للحساب اللي طلبت منه الماسك ومنتجات اخرى،،
أشوفكم على خير
ولاتنسون تتابعون المدونة والانستقرام:@norah_world11

Huda Beauty rose gold palette ريفيو عن باليت الشدو من هدى بيوتي

اهلين بنات كيف حالكم،، 

اليوم بقولكم رايي في باليت الشدو من هدى بيوتي طبعا كلنا نعرفها، اول شي نزلت لها لاين للرموش والأظافر وبعدها ارواج وأقلام للشفايف وأراح أكلمكم عنها في بوستات جاية بإذن الله، وآخر شي نزلت باليت الشدو. 

الباليت فيه 18 لون بين المطفية والميتالك او اللمعة، 

وهذا سواتش للألوان

 اول لاين الألوان الميتالك لمعتها حلوة وقوية تبين من اول مسحة، قوامها غريب بين الكريمي والموس، تشبه لحد كبير شدوات كولور بوب، وأفضل طريقة تحطين فيها هذا النوع من الشدوات يكون بالإصبع مو بالفرشة، 

باقي الألوان مطفية تحسينها ناشفة شوي وقوامها زي الطباشير بس اذا حطيتيها بالفرشة تمسك اللون تمام. 

الألوان بشكل عام دافية وتناسب الاندرتون الأصفر يعني تنفع لبشراتنا 

وبنفس الوقت متنوعة جدآ زي ماتلاحظون بين الذهبي والبني والزيتي والعنابي والوردي وحتى الأسود اللي غالبآ مانلقاه بالشدوات يعني ينفع تسوين فيه ايلاينر او سموكي، وحتى الألوان الانتقالية حبيتها زي البيج والرمادي  

باختصار تقدرين تسوين فيها لوكات كثيرة وبصراحة من اول ماشريته مااستخدم الا هو،،

كان نازل ليمتد اديشن في موقعها وانا طلبته قبل فترة

لكن حاليا نزل بسيفورا حتى عندنا عشان كذا حبيت اكتب هالبوست الآن للي حابة تلحق عليه وتشتريه

سعره في سيفورا 250    

وبصراحة اشوفه يستحق السعر

لكن من الناحية السلبية اللي ماحبيته فيه الباكجنق او التغليف تبعه وانه مافيه مراية من الداخل حسّيت  المفروض يكون أفخم من كذا مقارنة بالسعر ولأن منتجات هدى بيوتي دايم تهتم بشكل المنتج.

لكن بشكل عام حبيته وأحس أني ممكن استخدمه بأكثر من شي،، 

اللي تبي تشوفه عن قرب تقدر تشوف التستر في محلات سيفورا

أتمنى ان البوست عجبكم

واشوفكم في مواضيع جديدة:) 

ولاتنسون تزورون المدونة او انستقرامي @norah_world11

تجربتي مع التقشير البارد Dermamelan

السلام عليكم ،،

كيف حالكم بنات 

اعتذر عن انقطاعي عن المدونة بسبب انشغالي لكن ان شاء الله راجعة لكم بقوة وان شاء الله تستفيدون من المواضيع الجاية. 

اليوم بتكلم عن تجربتي الشخصية مع التقشير البارد،  

سويته قبل كم شهر وحبيت اشوف النتايج واتأكد قبل اكتب عنه، بصراحة انا كنت رايحة لطبيبتي الجلدية عشان أسوي فراكشنال ليزر، لكن هي نصحتني بالتقشير البارد او ديرما ميلان وذكرت لي انه يناسبني اكثر، اما الفراكشنال يكون لحالات الندبات العميقة وراح يحتاج وقت اكثر عشان يخف الاحمرار. 

بشرتي مثل ماذكرت في مواضيع سابقة دهنية فيها مسامات وآثار حبوب، وحبيت اجرب شي يخفف منها. 

بالنسبة للتقشير البارد ماله من اسمه نصيب وراح اذكر لكم السبب، في البداية تعقم الوجه وتحط كريم على كامل الوجه اللي عو عبارة عن هليط من أحماض الفواكه وخلته عشر دقايق تقريبا وخلال هذا الوقت بدا يلسعني واحس بحرارة بعدها حطت كريم ثاني اللي هو المقشر وقالت لي اخليه ثمان ساعات ماأغسله، رجعت البيت وخليت الكريم طبعا لازالت اللسعة والحرارة موجودة بس شي معقول يعني مو قوية مرة، اول يومين كان الوجه احمر وبعدها بدا يتقشر بشكل قوي ماتتخيلون كمية القشور اللي طلعت من الجلد، في هذي المرحلة مهم جدا يابنات ترطيب الوجه نصحتني احط كريم فوسيدين او كريم الاسد مرتين باليوم وعطتني اسم كريم ثاني احطه عشان يزيد ويسرع من نسبة التقشير لكن بصراحة ماشريته لأني كنت مابيه يكون قوي اكتفيت بالكريم اللي حطته لي، في هذي المرحلة بعد لازم اتجنب الشمس والحرارة والبخار اي هوا حار بشكل عام، مع وضع واقي الشمس بشكل يومي، لأنك لو ماانتبهتي لهذي النقطة وتعرضتي للحرارة والشمس والوجه يتقشر راح تكون النتيجة عكسية وراح تزيد التصبغات والبقع بدل ماتتعالج، عشان كذا ينصح بهذا النوع من التقشير خلال الشتاء لكن انا سويته بالصيف عشان كذا حبيت اكتب تجربتي الآن للي تبي تجربه. 

المهم بعد عشر ايام تقريبا بدا مفعول التقشير يبين وبدت البشرة تصفى  وأشوف نضارة بسيطة واقدر احط ميك اب والمسامات ملمسها وشكلها اخف من قبل، بشكل عام اقدر اقول التقشير كان متعب بالبداية لكن النتيجة مرضية الحمد لله،وممكن اسويه مرة ثانية، واللي تبي تجربه لازم تنتبه للنقاط اللي ذكرتها . 

وفي النهاية طبيبة الجلدية طبعا هي اللي تقرر كل وحدة وايش يناسبها، وفي مواضيع سابقة كتبت عن تجربتي مع حقن البلازما والميزوثيرابي والليزر الكربوني للوجه،

واتمنى ان الموضوع كان مفيد لكم، 

ولاتنسون الاشتراك بالمدونة 

وانستقرامي:@norah_world11

اشوفكم في بوستات جاية :)  

أفضل الأدوات لتوزيع الفاونديشن بشكل احترافي

مساء الخير،،

كيفكم بنات عدت الايام بسرعة وبدت العشر الأواخر الله يجعلنا من عتقائه ويجعلنا من المقبولين.

اليوم البوست خفيف ودايم انسئل عنه: 

كيف احط الفاونديشن على وجهي بحيث تكون تغطيته حلوة ويثبت طول اليوم! 

بعض البنات تقول اوزع الفاونديشن بيديني! 

وانا شخصياً ماافضل هذي الطريقة لان اليدين تسبب نقل الميكروبات للوجه وايضآ استخدام اليدين مايعطي التغطية المناسبة وممكن يصير شكل الفاونديشن مخطط وغير مدموج. 

باختصار راح اقولكم عن افضل ثلاث ادوات جربتها في توزيع الفاونديشن وعطتني تغطية حلوة . 

اول شي من اليمين فرشاة سيفورا رقم 83، مخصصة للفونديشن السائل والكريمي شعرها ناعم ومشطوفة وتعطي تغطية عالية، بشكل عام فرش سيفورا حلوة وافضلها على فرش ماك، لاني جربت فرش ماك للوجه ولاحظت ان شعرها يطيح مع الغسيل والإستخدام. 

بعدها فرشاة ريل تكنيك puffing brush شكلها دائري وحجمها مناسب للتوزيع، واسعار فرش ريل تكنيك مناسبة جدا وارخص من غيرها، وانصحكم تاخذونها من موقع اي هيرب ارخص من اللي يوفرونها هنا، هذي الفرشاة بالتحديد اعتبرها بديل ممتاز لفرشاة سيقما f80، مع ان سعرها اقل. 

لاحظي ان الادوات السابقة والفرش بشكل عام تعطي تغطية عالية ومناسبة للفاونديشن السائل اكثر. 

أما اذا حبيتي تغطية اخف والفاونديشن قوامه كريمي او الستك فاونديشن استخدمي البيوتي بلندر، اعتبرها من افضل الادوات لتوزيع الفاونديشن لانها ماتخليه يتكتل كأنك مو حاطة شي،بس لازم تكونين مبللتها بالموية وتخلصتي من الزائد، كتبت موضوع عنها بالتفصيل في بداية مدونتي. 

بالنسبة للفرش والبيوتي بلندر تحصلونها اون لاين او محلات سيفورا. 

اتمنى انكم استفدتوا من الموضوع 

لاتنسون الاشتراك بالمدونة

او ع الانستقرام @norah_world11

العناية باليدين والأظافر hands and nails routine

 مساء الخير،، 

اليوم بتكلم عن موضوع يهم كل بنت، لأن الإهتمام باليدين جزء من اهتمام البنت بنفسها، وحبيت اتكلم عنه الفترة هذي بالذات مع كثرة الشغل بالمطبخ وغسل اليدين بكثرة، وتحية لكل وحدة ماعندها خدامة مثلي :) 

الموضوع ممكن يكون بديهي ومايحتاج بوست لكن انا كتبته عشان افيد البنات بمنتجات انا جربتها ونفعتني، والاهم من هذا كله انها اشياء بسيطة ومتوفرة وماراح تاخذ منك وقت. 

اللي عندها جفاف بيدينها او اسمرار في المفاصل لازم تستمر على الترطيب، حاولي ترطبين يدك كل ماغسلتي، وخلي لك مرطب بالاماكن اللي تكونين فيها مثلا خلي لك كريم جنب السرير وكريم بالمطبخ وكريم على المدخل عشان ماتنسين، انا جربت كريمات كثيرة لكن هذي بعض الاشياء اللي استخدمها الحين، 

كريم كلارنس حلو خلال اليوم ترطيبه متوسط،وكميته كويسة لكن يعيبه سعره مرتفع، موجود في وجوه او سيفورا، كريم نوكس وايوسرين من الكريمات اليومية الضرورية وحجمها مناسب للشنطة، كريم نيتروجينا قوامه ثقيل ويدبق عشان كذا افضله قبل النوم، الكريمات هذي موجودة بالصيدليات وآي هيرب، حاولي تسوين تقشير لليدين مرة او مرتين بالاسبوع مو اكثر عشان يشيل الجلد الميت ويفتحها، ولازم الترطيب مباشرة بعد التقشير، تقدرين تحطين اي مقشر عندك للجسم، انا استخدم حاليا مقشر ملح البحر هذا من لش، وانصح باستخدام قفازات الترطيب ممكن مرة كل اسبوع او اسبوعين ترطيبها حلو وتنفع اي وقت.  

بالنسبة للأظافر انا اظافري ماتطول وتتكسر بسرعة هذي الاشياء نفعتني:

سيروم للأظافر من سالي هانسن تقدرين تستخدمينه خلال اليوم لأن قوامه مثل الزيت تتشربه البشرة ومايمنع الوضوء، تحطينه على الظفر والجلد اللي حواليه، مذكور انه يمنع الاظافر من التكسر ويطولها بس انا احب ترطيبه، 

وزيت فيتامين إي حلو للترطيب بشكل عام، بس انا افضل استخدمه لليدين والاظافر لان ترطيبه قوي،اخذته من آي هيرب.

من ناحية الاظافر دايم ابتعدي عن المبرد المعدني لانه يكسر الأظافر ويضعفها، استخدمي المبرد الفليني الخفيف اخذته من ذا بودي شوب اربع جهات يبرد الظفر ويلمعه بشكل بسيط..

اذا كنتي تحطين مناكير كثير دايم استخدمي بيس كوت او طبقة حماية للظفر من المناكير، واخر شي توب كوت تثبت المناكير وتخليه مايتقشر، وتقدرين تحصلينها بكل ستاندات المناكير مثل او بي اي، ايسي، سالي هانسن وغيرها، انا استخدم اللي موجود بالصورة من او بي اي لانه ينفع بيس كوت وتوب كوت سوا..

هذا كان بوست اليوم اتمنى انه افادكم، 

ولاتنسون متابعة المدونة

او ع الانستقرام: @norah_world11

اشوفكم في بوست جديد.  

Summer trends for 2016افكار لملابس العيد من موضة السنة

مساء الخير بنات،،

موضوعنا اليوم مختلف وبعيد عن الميك اب، 

حبيت اشارككم اكثر الصيحات الدارجة هذا الصيف وفرصة للي تبي تاخذ فكرة وتتسوق للعيد هالايام. 

فيه اشياء كثيرة رجعت من ايام الستينات والسبعينات من ناحية القصات والأقمشة. 

من اهمها الدينم او قماش الجينز، صار الجينز مايقتصر على شكله المعتاد كبنطلون بالعكس صار في قطع ثانية مثل التنورة او التوب او فستان جينز، ونلاحظ اغلب المشاهير اعتمدوا اللوك هذا مؤخرآ. 

من الاشياء الدارجة أيضاً الاقمشة الموردة واللي يكون عليها طبعات او اشكال هندسية، تعطي اللوك أنوثة وتحلي الجسم، تختلف اشكالها واحجامها حسب كل تصميم واعتمدوها مصممين كثير مثل دولتشي اند قابانا ومارك جيكوبز وغيرهم. 

البناطيل اللي يكون خصرها مرتفع وقصتها واسعة high waisted دارجة بعد، لكنها تناسب النحيفة اكثر لانها تحدد الخصر وتعطي عرض من تحت، 

الجمب سوت له فترة ولازال دارج باختلاف الألوان والطول، ومن الاشياء اللي ممكن تنفع كاجوال او رسمي حسب تنسيقك له، 

القصة اللي تكون اوف شولدرز او اسفل الكتف من الاشياء اللي تعطي انوثة وممكن يكون فستان او توب، انصح فيه للي تكون منطقة الصدر عندها صغيرة، اما اللي اكون اكتافها عريضة الافضل تبتعد عنه لانه راح يبرزها اكثر. 

من الالوان الدارجة الفترة هذي الفواتح والوان الباستيل ، مثل الاوف وايت والبيج والبيبي بنك والسماوي، سواء تكون توب او تنورة، والالوان هذي عموما تكون حلوة يالصيف. 

وقماش الدانتيل من الاشياء الموجودة بكثرة هذي الفترة سواء يكون فستان كامل او توب او تنورة، 

 

كل الصور السابقة في البوست من هذي البرامج pintrest, polyvore، 

وفي النهاية اتمنى يكون البوست افادكم او ألهمكم بستايل معين، ومو شرط يكون اللبس غالي او من ديزاينر مشهور، اغلب المحلات منزلين موديلات وقطع نفس اللي ذكرت او مشابهة لها، كله يعتمد على ذوق صاحبة اللبس اهم شي تكونين عارفة ايش اللي يناسب جسمك،ومثل مايقولون: 

Its not about the brand, its about style

 وانا شخصياً افضل البساطة في كل شي. 

اشوفكم في بوست جديد:) 

ولاتنسون تتابعون المدونة

او على الانستقرام : @norah_world11

Hair treatment أنواع علاجات الشعر وتجربتي مع علاج الكولاجين

السلام عليكم..

مبارك عليكم الشهر الله يتقبل منا ومنكم ويجعلنا من صوامه وقوامه، 

المدونة كملت سنة والايام تمشي بسرعة، راح اسوي قيف اواي بهذي المناسبة ان شاء الله قريبآ، 

قبل فترة سويت علاج الكولاجين للشعر وحبيت اشارككم تجربتي لو فيه بنت حابة تسويه او تعرف عنه معلومات اكثر. 

في البداية بقولكم عن انواع العلاجات الخاصة بالشعر: الكراتين ، والبروتين، والكولاجين.

الكيراتين او الأمازون يعتبر الاقوى فيها، الكيراتين هو بروتين طبيعي ومكون أساسي للشعر، الشعر الناعم يتكون من حوالي ٨٨٪ من الكيراتين او اكثر بينما تقل النسبة للشعر السميك او الخشن، 

الكيراتين الصناعي الموجود بالصالونات حاليآ مستخرج من الحيوانات او النباتات، وافضل انواعه البرازيلي، واهم شي يكون خالي من مادة الفورمالين او الفورمالدهايد بسبب ضررها على الشعر والبشرة. 

البروتين هو كيراتين مطور مضاف له بروتينات اخرى يختلف نوعها بحسب نوع الشعر، مثلآ الشعر التالف والجاف جدآ يحتاج نوع مختلف عن الشعر متوسط الجفاف، والافضل زيارة اخصائية الشعر عشان تقرر لك بس في النهاية انتي تتخذين القرار لأن كل وحدة هي اللي تعرف نوعية شعرها بالضبط. 

النوع الثالث هو الكولاجين وهو النوع اللي جربته، 

قبل اكثر من ست شهور سويته بصالون بالرياض، طبيعة شعري مصبوغ وويفي خفيف وكان هذيك الفترة اطرافه جافة بزيادة ويتساقط، 

زرت الصالون وقلت لهم عن الكولاجين قالت راح ينفعك يخفف الجفاف والنفشة ويعطي لمعة، وانا شخصيآ ماكنت ابي شي ينعم مرة كنت ابي احافظ على طبيعة شعري لكن يكون صحي اكثر، 

النوع اللي جربته امريكي من بي اتش بيوتي،مع العلم ان هذا النوع علاجي فقط يعني ماراح ينعم الشعر او يخليه سايح،  ضروري تشوفين المنتج اللي يحطونه لك وتقرين مكوناته، 

طريقة التريتمنت هذا انها توزعه على الشعر وتخليه تقريبا نص ساعة وبعدها غسلته واستشورت الشعر عادي، ماكان له ريحة قوية وقت التريتمنت وهذا شي ايجابي، سويت العلاج هذا واخذت منهم شامبو وبلسم من نفس الشركة، 

بعد العلاج اول شي لاحظته ان الجذور دايم تكون مدهنة بزيادة مع ان شعري ماكان كذا فكنت اضطر اغسله يوميآ، الشي الثاني ريحة الشامبو مزعجة بالنسبة لي ماحبيتها،رجعت الصالون وكلمت المسوؤلة عن المشكلة هذي قالت يمكن ماناسبك الكولاجين جربي الفيلر عندنا:( لاتعليق صراحة، المشاغل عندنا قليل اللي يكونون محترفين وفاهمين بالشعر، المشكلة المشغل هذا عرفته من بلوقر معروفة تسوي له دعاية وقلت بجرب شغلهم، لكن ارجع واقول ممكن اللي ماناسبني يناسب غيري، الشي الايجابي اللي لاحظته وقتها لمعة في الشعر وحاليآ شعري رجع لطبيعته بس بشكل عام ماراح ارجع اسوي الكولاجين لأن طبيعة شعري ماتحملته ممكن ينفع للشعر الكيرلي اكثر، في النهاية حابة اقول اي علاج بتسوينه لشعرك اقري وابحثي عنه وشوفي يناسبك او لا، وروحي لمكان موثوق، 

هذا كان بوست اليوم اتمنى انه افادكم 

اشوفكم في بوست جديد:) 

لاتنسون تزورون المدونة فيها مواضيع تهمكم 

او الامستقرام:@norah_world11