Huda Beauty rose gold palette ريفيو عن باليت الشدو من هدى بيوتي

اهلين بنات كيف حالكم،، 

اليوم بقولكم رايي في باليت الشدو من هدى بيوتي طبعا كلنا نعرفها، اول شي نزلت لها لاين للرموش والأظافر وبعدها ارواج وأقلام للشفايف وأراح أكلمكم عنها في بوستات جاية بإذن الله، وآخر شي نزلت باليت الشدو. 

الباليت فيه 18 لون بين المطفية والميتالك او اللمعة، 

وهذا سواتش للألوان

 اول لاين الألوان الميتالك لمعتها حلوة وقوية تبين من اول مسحة، قوامها غريب بين الكريمي والموس، تشبه لحد كبير شدوات كولور بوب، وأفضل طريقة تحطين فيها هذا النوع من الشدوات يكون بالإصبع مو بالفرشة، 

باقي الألوان مطفية تحسينها ناشفة شوي وقوامها زي الطباشير بس اذا حطيتيها بالفرشة تمسك اللون تمام. 

الألوان بشكل عام دافية وتناسب الاندرتون الأصفر يعني تنفع لبشراتنا 

وبنفس الوقت متنوعة جدآ زي ماتلاحظون بين الذهبي والبني والزيتي والعنابي والوردي وحتى الأسود اللي غالبآ مانلقاه بالشدوات يعني ينفع تسوين فيه ايلاينر او سموكي، وحتى الألوان الانتقالية حبيتها زي البيج والرمادي  

باختصار تقدرين تسوين فيها لوكات كثيرة وبصراحة من اول ماشريته مااستخدم الا هو،،

كان نازل ليمتد اديشن في موقعها وانا طلبته قبل فترة

لكن حاليا نزل بسيفورا حتى عندنا عشان كذا حبيت اكتب هالبوست الآن للي حابة تلحق عليه وتشتريه

سعره في سيفورا 250    

وبصراحة اشوفه يستحق السعر

لكن من الناحية السلبية اللي ماحبيته فيه الباكجنق او التغليف تبعه وانه مافيه مراية من الداخل حسّيت  المفروض يكون أفخم من كذا مقارنة بالسعر ولأن منتجات هدى بيوتي دايم تهتم بشكل المنتج.

لكن بشكل عام حبيته وأحس أني ممكن استخدمه بأكثر من شي،، 

اللي تبي تشوفه عن قرب تقدر تشوف التستر في محلات سيفورا

أتمنى ان البوست عجبكم

واشوفكم في مواضيع جديدة:) 

ولاتنسون تزورون المدونة او انستقرامي @norah_world11

تجربتي مع التقشير البارد Dermamelan

السلام عليكم ،،

كيف حالكم بنات 

اعتذر عن انقطاعي عن المدونة بسبب انشغالي لكن ان شاء الله راجعة لكم بقوة وان شاء الله تستفيدون من المواضيع الجاية. 

اليوم بتكلم عن تجربتي الشخصية مع التقشير البارد،  

سويته قبل كم شهر وحبيت اشوف النتايج واتأكد قبل اكتب عنه، بصراحة انا كنت رايحة لطبيبتي الجلدية عشان أسوي فراكشنال ليزر، لكن هي نصحتني بالتقشير البارد او ديرما ميلان وذكرت لي انه يناسبني اكثر، اما الفراكشنال يكون لحالات الندبات العميقة وراح يحتاج وقت اكثر عشان يخف الاحمرار. 

بشرتي مثل ماذكرت في مواضيع سابقة دهنية فيها مسامات وآثار حبوب، وحبيت اجرب شي يخفف منها. 

بالنسبة للتقشير البارد ماله من اسمه نصيب وراح اذكر لكم السبب، في البداية تعقم الوجه وتحط كريم على كامل الوجه اللي عو عبارة عن هليط من أحماض الفواكه وخلته عشر دقايق تقريبا وخلال هذا الوقت بدا يلسعني واحس بحرارة بعدها حطت كريم ثاني اللي هو المقشر وقالت لي اخليه ثمان ساعات ماأغسله، رجعت البيت وخليت الكريم طبعا لازالت اللسعة والحرارة موجودة بس شي معقول يعني مو قوية مرة، اول يومين كان الوجه احمر وبعدها بدا يتقشر بشكل قوي ماتتخيلون كمية القشور اللي طلعت من الجلد، في هذي المرحلة مهم جدا يابنات ترطيب الوجه نصحتني احط كريم فوسيدين او كريم الاسد مرتين باليوم وعطتني اسم كريم ثاني احطه عشان يزيد ويسرع من نسبة التقشير لكن بصراحة ماشريته لأني كنت مابيه يكون قوي اكتفيت بالكريم اللي حطته لي، في هذي المرحلة بعد لازم اتجنب الشمس والحرارة والبخار اي هوا حار بشكل عام، مع وضع واقي الشمس بشكل يومي، لأنك لو ماانتبهتي لهذي النقطة وتعرضتي للحرارة والشمس والوجه يتقشر راح تكون النتيجة عكسية وراح تزيد التصبغات والبقع بدل ماتتعالج، عشان كذا ينصح بهذا النوع من التقشير خلال الشتاء لكن انا سويته بالصيف عشان كذا حبيت اكتب تجربتي الآن للي تبي تجربه. 

المهم بعد عشر ايام تقريبا بدا مفعول التقشير يبين وبدت البشرة تصفى  وأشوف نضارة بسيطة واقدر احط ميك اب والمسامات ملمسها وشكلها اخف من قبل، بشكل عام اقدر اقول التقشير كان متعب بالبداية لكن النتيجة مرضية الحمد لله،وممكن اسويه مرة ثانية، واللي تبي تجربه لازم تنتبه للنقاط اللي ذكرتها . 

وفي النهاية طبيبة الجلدية طبعا هي اللي تقرر كل وحدة وايش يناسبها، وفي مواضيع سابقة كتبت عن تجربتي مع حقن البلازما والميزوثيرابي والليزر الكربوني للوجه،

واتمنى ان الموضوع كان مفيد لكم، 

ولاتنسون الاشتراك بالمدونة 

وانستقرامي:@norah_world11

اشوفكم في بوستات جاية :)  

أفضل الأدوات لتوزيع الفاونديشن بشكل احترافي

مساء الخير،،

كيفكم بنات عدت الايام بسرعة وبدت العشر الأواخر الله يجعلنا من عتقائه ويجعلنا من المقبولين.

اليوم البوست خفيف ودايم انسئل عنه: 

كيف احط الفاونديشن على وجهي بحيث تكون تغطيته حلوة ويثبت طول اليوم! 

بعض البنات تقول اوزع الفاونديشن بيديني! 

وانا شخصياً ماافضل هذي الطريقة لان اليدين تسبب نقل الميكروبات للوجه وايضآ استخدام اليدين مايعطي التغطية المناسبة وممكن يصير شكل الفاونديشن مخطط وغير مدموج. 

باختصار راح اقولكم عن افضل ثلاث ادوات جربتها في توزيع الفاونديشن وعطتني تغطية حلوة . 

اول شي من اليمين فرشاة سيفورا رقم 83، مخصصة للفونديشن السائل والكريمي شعرها ناعم ومشطوفة وتعطي تغطية عالية، بشكل عام فرش سيفورا حلوة وافضلها على فرش ماك، لاني جربت فرش ماك للوجه ولاحظت ان شعرها يطيح مع الغسيل والإستخدام. 

بعدها فرشاة ريل تكنيك puffing brush شكلها دائري وحجمها مناسب للتوزيع، واسعار فرش ريل تكنيك مناسبة جدا وارخص من غيرها، وانصحكم تاخذونها من موقع اي هيرب ارخص من اللي يوفرونها هنا، هذي الفرشاة بالتحديد اعتبرها بديل ممتاز لفرشاة سيقما f80، مع ان سعرها اقل. 

لاحظي ان الادوات السابقة والفرش بشكل عام تعطي تغطية عالية ومناسبة للفاونديشن السائل اكثر. 

أما اذا حبيتي تغطية اخف والفاونديشن قوامه كريمي او الستك فاونديشن استخدمي البيوتي بلندر، اعتبرها من افضل الادوات لتوزيع الفاونديشن لانها ماتخليه يتكتل كأنك مو حاطة شي،بس لازم تكونين مبللتها بالموية وتخلصتي من الزائد، كتبت موضوع عنها بالتفصيل في بداية مدونتي. 

بالنسبة للفرش والبيوتي بلندر تحصلونها اون لاين او محلات سيفورا. 

اتمنى انكم استفدتوا من الموضوع 

لاتنسون الاشتراك بالمدونة

او ع الانستقرام @norah_world11

العناية باليدين والأظافر hands and nails routine

 مساء الخير،، 

اليوم بتكلم عن موضوع يهم كل بنت، لأن الإهتمام باليدين جزء من اهتمام البنت بنفسها، وحبيت اتكلم عنه الفترة هذي بالذات مع كثرة الشغل بالمطبخ وغسل اليدين بكثرة، وتحية لكل وحدة ماعندها خدامة مثلي :) 

الموضوع ممكن يكون بديهي ومايحتاج بوست لكن انا كتبته عشان افيد البنات بمنتجات انا جربتها ونفعتني، والاهم من هذا كله انها اشياء بسيطة ومتوفرة وماراح تاخذ منك وقت. 

اللي عندها جفاف بيدينها او اسمرار في المفاصل لازم تستمر على الترطيب، حاولي ترطبين يدك كل ماغسلتي، وخلي لك مرطب بالاماكن اللي تكونين فيها مثلا خلي لك كريم جنب السرير وكريم بالمطبخ وكريم على المدخل عشان ماتنسين، انا جربت كريمات كثيرة لكن هذي بعض الاشياء اللي استخدمها الحين، 

كريم كلارنس حلو خلال اليوم ترطيبه متوسط،وكميته كويسة لكن يعيبه سعره مرتفع، موجود في وجوه او سيفورا، كريم نوكس وايوسرين من الكريمات اليومية الضرورية وحجمها مناسب للشنطة، كريم نيتروجينا قوامه ثقيل ويدبق عشان كذا افضله قبل النوم، الكريمات هذي موجودة بالصيدليات وآي هيرب، حاولي تسوين تقشير لليدين مرة او مرتين بالاسبوع مو اكثر عشان يشيل الجلد الميت ويفتحها، ولازم الترطيب مباشرة بعد التقشير، تقدرين تحطين اي مقشر عندك للجسم، انا استخدم حاليا مقشر ملح البحر هذا من لش، وانصح باستخدام قفازات الترطيب ممكن مرة كل اسبوع او اسبوعين ترطيبها حلو وتنفع اي وقت.  

بالنسبة للأظافر انا اظافري ماتطول وتتكسر بسرعة هذي الاشياء نفعتني:

سيروم للأظافر من سالي هانسن تقدرين تستخدمينه خلال اليوم لأن قوامه مثل الزيت تتشربه البشرة ومايمنع الوضوء، تحطينه على الظفر والجلد اللي حواليه، مذكور انه يمنع الاظافر من التكسر ويطولها بس انا احب ترطيبه، 

وزيت فيتامين إي حلو للترطيب بشكل عام، بس انا افضل استخدمه لليدين والاظافر لان ترطيبه قوي،اخذته من آي هيرب.

من ناحية الاظافر دايم ابتعدي عن المبرد المعدني لانه يكسر الأظافر ويضعفها، استخدمي المبرد الفليني الخفيف اخذته من ذا بودي شوب اربع جهات يبرد الظفر ويلمعه بشكل بسيط..

اذا كنتي تحطين مناكير كثير دايم استخدمي بيس كوت او طبقة حماية للظفر من المناكير، واخر شي توب كوت تثبت المناكير وتخليه مايتقشر، وتقدرين تحصلينها بكل ستاندات المناكير مثل او بي اي، ايسي، سالي هانسن وغيرها، انا استخدم اللي موجود بالصورة من او بي اي لانه ينفع بيس كوت وتوب كوت سوا..

هذا كان بوست اليوم اتمنى انه افادكم، 

ولاتنسون متابعة المدونة

او ع الانستقرام: @norah_world11

اشوفكم في بوست جديد.  

Summer trends for 2016افكار لملابس العيد من موضة السنة

مساء الخير بنات،،

موضوعنا اليوم مختلف وبعيد عن الميك اب، 

حبيت اشارككم اكثر الصيحات الدارجة هذا الصيف وفرصة للي تبي تاخذ فكرة وتتسوق للعيد هالايام. 

فيه اشياء كثيرة رجعت من ايام الستينات والسبعينات من ناحية القصات والأقمشة. 

من اهمها الدينم او قماش الجينز، صار الجينز مايقتصر على شكله المعتاد كبنطلون بالعكس صار في قطع ثانية مثل التنورة او التوب او فستان جينز، ونلاحظ اغلب المشاهير اعتمدوا اللوك هذا مؤخرآ. 

من الاشياء الدارجة أيضاً الاقمشة الموردة واللي يكون عليها طبعات او اشكال هندسية، تعطي اللوك أنوثة وتحلي الجسم، تختلف اشكالها واحجامها حسب كل تصميم واعتمدوها مصممين كثير مثل دولتشي اند قابانا ومارك جيكوبز وغيرهم. 

البناطيل اللي يكون خصرها مرتفع وقصتها واسعة high waisted دارجة بعد، لكنها تناسب النحيفة اكثر لانها تحدد الخصر وتعطي عرض من تحت، 

الجمب سوت له فترة ولازال دارج باختلاف الألوان والطول، ومن الاشياء اللي ممكن تنفع كاجوال او رسمي حسب تنسيقك له، 

القصة اللي تكون اوف شولدرز او اسفل الكتف من الاشياء اللي تعطي انوثة وممكن يكون فستان او توب، انصح فيه للي تكون منطقة الصدر عندها صغيرة، اما اللي اكون اكتافها عريضة الافضل تبتعد عنه لانه راح يبرزها اكثر. 

من الالوان الدارجة الفترة هذي الفواتح والوان الباستيل ، مثل الاوف وايت والبيج والبيبي بنك والسماوي، سواء تكون توب او تنورة، والالوان هذي عموما تكون حلوة يالصيف. 

وقماش الدانتيل من الاشياء الموجودة بكثرة هذي الفترة سواء يكون فستان كامل او توب او تنورة، 

 

كل الصور السابقة في البوست من هذي البرامج pintrest, polyvore، 

وفي النهاية اتمنى يكون البوست افادكم او ألهمكم بستايل معين، ومو شرط يكون اللبس غالي او من ديزاينر مشهور، اغلب المحلات منزلين موديلات وقطع نفس اللي ذكرت او مشابهة لها، كله يعتمد على ذوق صاحبة اللبس اهم شي تكونين عارفة ايش اللي يناسب جسمك،ومثل مايقولون: 

Its not about the brand, its about style

 وانا شخصياً افضل البساطة في كل شي. 

اشوفكم في بوست جديد:) 

ولاتنسون تتابعون المدونة

او على الانستقرام : @norah_world11

Hair treatment أنواع علاجات الشعر وتجربتي مع علاج الكولاجين

السلام عليكم..

مبارك عليكم الشهر الله يتقبل منا ومنكم ويجعلنا من صوامه وقوامه، 

المدونة كملت سنة والايام تمشي بسرعة، راح اسوي قيف اواي بهذي المناسبة ان شاء الله قريبآ، 

قبل فترة سويت علاج الكولاجين للشعر وحبيت اشارككم تجربتي لو فيه بنت حابة تسويه او تعرف عنه معلومات اكثر. 

في البداية بقولكم عن انواع العلاجات الخاصة بالشعر: الكراتين ، والبروتين، والكولاجين.

الكيراتين او الأمازون يعتبر الاقوى فيها، الكيراتين هو بروتين طبيعي ومكون أساسي للشعر، الشعر الناعم يتكون من حوالي ٨٨٪ من الكيراتين او اكثر بينما تقل النسبة للشعر السميك او الخشن، 

الكيراتين الصناعي الموجود بالصالونات حاليآ مستخرج من الحيوانات او النباتات، وافضل انواعه البرازيلي، واهم شي يكون خالي من مادة الفورمالين او الفورمالدهايد بسبب ضررها على الشعر والبشرة. 

البروتين هو كيراتين مطور مضاف له بروتينات اخرى يختلف نوعها بحسب نوع الشعر، مثلآ الشعر التالف والجاف جدآ يحتاج نوع مختلف عن الشعر متوسط الجفاف، والافضل زيارة اخصائية الشعر عشان تقرر لك بس في النهاية انتي تتخذين القرار لأن كل وحدة هي اللي تعرف نوعية شعرها بالضبط. 

النوع الثالث هو الكولاجين وهو النوع اللي جربته، 

قبل اكثر من ست شهور سويته بصالون بالرياض، طبيعة شعري مصبوغ وويفي خفيف وكان هذيك الفترة اطرافه جافة بزيادة ويتساقط، 

زرت الصالون وقلت لهم عن الكولاجين قالت راح ينفعك يخفف الجفاف والنفشة ويعطي لمعة، وانا شخصيآ ماكنت ابي شي ينعم مرة كنت ابي احافظ على طبيعة شعري لكن يكون صحي اكثر، 

النوع اللي جربته امريكي من بي اتش بيوتي،مع العلم ان هذا النوع علاجي فقط يعني ماراح ينعم الشعر او يخليه سايح،  ضروري تشوفين المنتج اللي يحطونه لك وتقرين مكوناته، 

طريقة التريتمنت هذا انها توزعه على الشعر وتخليه تقريبا نص ساعة وبعدها غسلته واستشورت الشعر عادي، ماكان له ريحة قوية وقت التريتمنت وهذا شي ايجابي، سويت العلاج هذا واخذت منهم شامبو وبلسم من نفس الشركة، 

بعد العلاج اول شي لاحظته ان الجذور دايم تكون مدهنة بزيادة مع ان شعري ماكان كذا فكنت اضطر اغسله يوميآ، الشي الثاني ريحة الشامبو مزعجة بالنسبة لي ماحبيتها،رجعت الصالون وكلمت المسوؤلة عن المشكلة هذي قالت يمكن ماناسبك الكولاجين جربي الفيلر عندنا:( لاتعليق صراحة، المشاغل عندنا قليل اللي يكونون محترفين وفاهمين بالشعر، المشكلة المشغل هذا عرفته من بلوقر معروفة تسوي له دعاية وقلت بجرب شغلهم، لكن ارجع واقول ممكن اللي ماناسبني يناسب غيري، الشي الايجابي اللي لاحظته وقتها لمعة في الشعر وحاليآ شعري رجع لطبيعته بس بشكل عام ماراح ارجع اسوي الكولاجين لأن طبيعة شعري ماتحملته ممكن ينفع للشعر الكيرلي اكثر، في النهاية حابة اقول اي علاج بتسوينه لشعرك اقري وابحثي عنه وشوفي يناسبك او لا، وروحي لمكان موثوق، 

هذا كان بوست اليوم اتمنى انه افادكم 

اشوفكم في بوست جديد:) 

لاتنسون تزورون المدونة فيها مواضيع تهمكم 

او الامستقرام:@norah_world11

فاونديشن الكوشن (المخدة) من ذا فيس شوب

مساء الخير بنات،، 

اليوم بكلمكم عن منتج في عالم الميك اب انتشر قبل فترة في المنتجات الآسيوية وصارت بعض شركات الميك اب الاوروبية تنتج نفس فكرته، اللي هو فاونديشن الكوشن او المخدة،

ايش يعني فاونديشن الكوشن؟ 

هو عبارة عن كريم اساس يتميز بعلبته او طريقة الباكجنق بحيث يكون في اعلى العلبة مثل الغطاء الشفاف وداخله المنتج ونقدر نتحكم من خلاله بالكمية اللي نحتاجها وعادة يكون هذا الفاونديشن غير مطفي يعني يعطي اللوك الرطب مثل بشرات الآسيويات. 

انا اخذته قبل فترة من محل ذا فيس شوب، وحبيت اجربه زين قبل اكتب عنه بالمدونة. 

طبعا المحل شهير بمنتجاته الكورية عمومآ من عناية وميك اب، للأمانة ماقد جربت الميك اب منهم قبل لكن دايم اخذ الماسكات والكريمات وكانت كويسة. 

نجي للفاونديشن مذكور على العلبة انه سي سي كريم cc، والسي سي كريم شبيه بالبي بي كريم من ناحية انه فيه نسبة ترطيب وحماية من الشمس لكن تغطيته اكثر، بالنسبة لي اعتبره فاونديشن افضل، موجود عندهم نوعين منه: نوع تغطيته اخف وفيه نسبة ترطيب اكثر وبالتالي يناسب البشرات الجافة والعادية افضل، والنوع الثاني هذا اللي اخذته تغطيته اعلى وخالي من الزيوت، وكل النوعين فيها نسبة حماية من الشمس ٥٠٪ يعني مناسب للنهار. 

علبته مريحة وفيها مراية واستخدامها عملي للشنطة والسفر، سعره مناسب اخذته ب ١٢٠، يجي معاه الاسفنجة الخاصة مثل ماهو واضح بالصورة، لكن يعيبه ان درجاته جدا قليلة لانه منتج اسيوي ف غالبا ماتناسب كل البشرات العربية، اخذت هذي الدرجة natural beige وكانت اغمق وحدة بس طلعت مناسبة بالنسبة لي لأني مااحب الفاونديشن يكون افتح من لوني. 

استخدمته بالبيوتي بلندر يعطي منظر رطب وديوي للبشرة وتغطية خفيفة، واستخدمته مع الاسفنجة اللي معاه يعطي تغطية اثقل. 

لكن بشكل عام لازم اثبته ببودرة مطفية لأني لاحظت انه يدهن خلال اليوم، وهذا شي اكيد لأن بشرتي مختلطة. 

بشكل عام عجبني بس مااعتبره افضل شي جربته، انصح فيه اكثر للبشرات الجافة واللي تحب اللوك الديوي للبشرة، ومثل ماذكرت موجود في ذا فيس شوب. 

اتمنى يكون البوست عجبكم،

لاتنسون الاشتراك بالمدونة وقراءة تدويناتي وعلى الانستقرام: @norah_world11

اشوفكم في بوست جديد :) 

بدائل أرخص لمنتجات غالية

السلام عليكم 

كيف حالكم بنات ،،

رجعت لكم بعد الوعكة الصحية ولله الحمد، واشتقت لمدونتي وفي بالي مواضيع كثييييرة ان شاء الله القى الوقت المناسب واحطها. 

اليوم بتكلم عن موضوع مهم وممكن يفيد بنات كثير وكل منتج بكتب عنه هنا انا مجربته شخصياً وعارفة اللي بتكلم عنه.  

الفكرة في موضوع اليوم مثل ماكتبت فوق اني راح اقولكم عن منتجات احبها ومااستغني عنها لكن يعتبر سعرها مرتفع، وبديل لها ارخص. 

اول شي بتكلم عن بيوديرما اللي مزيل المكياج المائي اكلمت عنه كثير في مدونتي واكيد اغلبكم شاف مواضيعي ويعرف اني مااستغني عنه في تنظيف المكياج خفيف على البشرة وانا بشرتي مختلطة دهنية ومااحب المنظف يكون زيتي عشان كذا افضل بيوديرما لكن عيبه يخلص بسرعة، واحيانا مااحصله، بالصدفة شريت منظف المكياج من قارنيه نفس التركيبة أساسه مائي وعجبني انه نفس المفعول مع اني مو صحبة مع منتجات قارنيه لكن هذا المنتج بالذات اقدر اقول انه ممتاز، سعره اقل بكثير من بيوديرما وحجمه اكبر واوفر، موجود بالدانوب واغلب الصيدليات. 

من الاشياء اللي مااستغني عنها قلم الحواجب او البراو ويز من انستازيا مريح في الاستخدام وعملي ومن استخدمته صرت ارسم حواجبي بسرعة وماتاخذ وقت، مؤخراً طلبت الشبيه له من نكس نفس الشكل تقريباً طرف يكون قلم للرسم والطرف الثاني السبولي او الفرشاة واقدر اقول عنه بديل لقلم انستازيا مع فرق السعر لان نكس ارخص كثير،اتوقع انه موجود بفروع سنتر بوينت اللي فيها ستاند خاص بماركة نكس. 

ثالث شي بالنسبة لي ضروري خاصة بالصيف اللي بودرة لامتصاص الدهون وتخفيفها خلال اليوم، شريت قبل فترة هذي البودرة من بنيفت شكلها كيوت وتعليبها مناسب للشنطة او السفر ومعاها الفرشة تبعها، ولقيت انها نفس البودرة من ريميل وتؤدي نفس الوظيفة اللي هي تخفف الدهون واللمعة بالوجه لكن ريميل ارخص. 

اخر شي بتكلم عنه هذي الماسكرا من بنيفت ماسكرة رولر لاش تكلمت عنها قبل فترة تعطي فوليوم حلو للرموش وتكثفها وبديل لها ماسكرا ذا فولسيز من مايبلين نفس الفرشاة ونفس المفعول لكن زي ماقلت مايبلين ارخص، هذي النوع من الماسكرا تكون ووتر بروف عشان كذا صعب ازالتها وماانصح فيها بشكل يومي، ريميل ومايبلين موجودة في سنتر بوينت وصيدلية وايتس. 

هذا كان بوست اليوم اتمنى انكم استفدتوا منه  ولاتنسون الاشتراك بالمدونة عشان توصلكم مواضيعي وعلى الانستقرام: @norah_world11 

اشوفكم في بوست جديد :) 

افضل البلشرات اللي جربتها

مساء الخير بنات،،

من زمان ماكلمتكم عن الميك اب واليوم جيتكم بموضوع جديد ان شاء الله يفيدكم. 

اليوم حابة اتكلم عن افضل البلشرات اللي جربتها 

لانك ممكن تشترين اشياء وماتستفيدين منها او ماتناسبك وهذي البلشرات اللي بعرضها افضل الانواع اللي جربتها من ناحية تنوع الألوان والثبات.

نبدا بهذا اللون الجميل من ماك ويعتبر من اشهر البلشرات من ماك اسمه: gingerly. لونه مشمشي دافي مطفي ويناسب اغلب البلشرات واغلب اللوكات. 

بعده هذا اللون من ماك اسمه: pinch me اغمق بشوي من اللي قبل وغالبا يناسب البشرات الحنطية والعربية اكثر ومسحة بسيطة منه تكفي لان اللون قوي وثابت وبلشرات ماك غنية عن التعريف من ناحية الثبات. 

بعده نجي لدرجات الوردي هذا اللون اسمه: pink swoon لونه وردي فاتح مطفي بدون لمعة يعطي لوك الباربي ممكن يكون لونه قوي وفاقع بالعلبة بس لما احطه بالفرشاة يكون اللون هادي وجميل.عجبني لدرجة اني رجعت اشتريه لما خلص.  

ومن درجات الوردي بعد هذا اللون اسمه:I'm a lover. وردي يعتبر بيبي بينك مع شيمر بسيط عادة مااحب البلشرات اللي يكون فيها لمعة لان بشرتي دهنية، لكن هذا لمعته بسيطة وتطلع بشكل حلو. 

ومن قيرلان هذا البلشر مشمشي مع شيمر خفيف اتوقع واضح اني احبه خلصت العلبة في مدة بسيطة، يعطي لوك طبيعي وهيلثي البشرة،وثباته حلو، درجته: apricot souffle 515 .

ومن بنيفت هذا البلشر اعتبره مشمشي فاتح مع شيمر اسمه: dandelion 

لكن ماكان ثباته قوي مثل باقي البلشرات اللي تدوم ساعات. 

ومن ذا بالم اشهر بلشرين عندهم هذا اللون hot mama مشمشي على برونز احب استخدمه بالصيف لانه يعطي البشرة مظهر ديوب وفيه لمعة ويناسب اغلب البلشرات، اللون مع شيمر وثباته اعتبره كويس، لكن ماعجبني الشيمر فيه حسيته قوي وممكن يبرز عيوب البشرة اكثر عشان كذا ماانصح فيه للي عندها حبوب او مسامات.  

واخر بلشر اسمه down boy درجته وردي اغمق من باقي الورديات اللي عندي كمية بسيطة منه تكفي ولونه مطفي.

بشكل عام انا افضل البلشرات تكون مطفية عشان اقدر اتحكم بكمية الاضاءة ومكانها في الوجه. 

وبالنسبة لي بلشرات ماك افضل اللي جربته ثباتها حلو ولونها قوي. 

هذا كان بوست اليوم، اتمنى انه فادكم اذا حبيتوا تشترون بلشر جديد او تخلونه مرجع لكم. 

اشوفكم في بوست جديد

ولاتنسون الاشتراك بالمدونة او الانستقرام: @norah_world11

ماسك النعناع من آيهيرب

مساء الخير بنات.. 

قبل فترة كتبت عن مشترياتي من الموقع الأمريكي آيهيرب ومن ضمن المشتريات ماسك النعناع من شركة كوين هيلين queen helene وهذا النوع للبشرة الدهنية والمختلطة،تقييمه عالي بالموقع ويعتبر من الأمثر مبيعاً وقررت اخذه، كنت استخدمه بمعدل مرة بالاسبوع تقريبآ، واليوم حبيت اقولكم عنه بالتفصيل. 

الماسك من مكوناته النعناع مخصص للبشرات المختلطة وفيه انواع ثانية للبشرة الجافة والحساسة، سعره في الموقع بحدود دولارين يعني مناسب جدا، وكل مكوناته طبيعية وخالي من العطور والبارابين. 

مناسب للإستخدام الأسبوعي من تجربتي منعش للبشرة وبعد الاستخدام يساعد على تخفيف المسام وينظف البشرة بعمق ويزيل الدهون المتراكمة والرؤوس السوداء. 

مثل ماذكرت سابقآ حلو يكون من روتين العناية الاسبوعي وانصح فيه خاصة ان السعر جداًمناسب للكل وكميته كبيرة.  

استخدامه: يكون على بشرة نظيفة تتركينه من ١٠ الى ١٥ دقيقة وبعدها يشطف بالماء فقط. 

اتمنى يكون البوست خفيف ومفيد لكم

واشوفكم في بوست جديد.

لاتنسون الاشتراك بالمدونة او الانستقرام @norah_world11

طريقتي في علاج حبوب الوجه وآثارها

السلام عليكم،، 

كيف حالكم بنات

اليوم البوست بيكون خفيف وعن تجربتي الشخصية في علاج الحبوب اللي تطلع بالوجه. 

في البداية انا بشرتي مختلطة دهنية عند التي زون وباقي الوجه عادي، عادةً تطلع لي كم حبة بالشهر مع لخبطة الهرمونات والنفسية، جربت اشياء كثيرة بس الكريمات هذي وصفتها لي طبيبة الجلدية وهي اكثر شي فادني، البوست هذا ممكن يفيد البنات اللي نفس بشرتي لكن اللي عندها مشاكل مزمنة بالحبوب ومنتشرة بكثرة الافضل انها تستشير طبيب جلدية وان شاء الله يفيدها. 

مثل ماتعرفون الحبة اول ماتبدا تكون حمراء ومتهيجة وانا تطلع لي حبوب من النوع اللي تؤلم، في هذي المرحلة احط عليها كريم ديفرين، وظيفته ينشف الحبة ويخفف إلتهابها، 

بالنسبة لي بعد كم يوم تكون الحبة ناشفة بس يبقى اثرها لون غامق ع البشرة هنا اقدر استخدم الكريم الثاني يفتح اللون ويخفف من الآثار وبعدها بأسبوع تقريبآ تكون الحبة اختفت بدون أثر، 

الحلو في الكريمات اللي ذكرتها ان مكوناتها طبيعية وخالية من الكورتيزون او الكيماويات الضارة، ومن ضمن المكونات حمض الهايدرولونيك المعروف انه معالج للحبوب والتصبغات.

اهم شي تستخدمين الكريم الثاني بعد ماتخف الحبة مو تكون ملتهبة، 

الكريمات اللي ذكرتها من نوع الجل gel وافضل وقت لإستخدامها قبل النوم، موجودة بأغلب الصيدليات،،

اتمنى يكون البوست مفيد لكم 

اشوفكم في بوست جديد، 

لاتنسون الإشتراك بالمدونة والانستقرام @norah_world

ريفيو عن ماسكرات بنيفت

مساء الخير بنات،،

اليوم بتكلم عن مسكرتين جربتهم قبل فترة واشتهرت عند اغلب البلوقرز واليوتيوبرز 

وكلها من بنيفت اللي هي مسكرا ذير ريل they're real, والثانية رولر لاش roller lash. 

اول وحدة نزلت هي ذير ريل من اليسار وسوت ضجة كبيرة ونزلت احصائيات تقول ان كل ٣٠ ثانية تباع حبة منها حول العالم، ومذكور بأنها تعطي طول للرموش وتكثفها لدرجة انها ممكن تعطي شكل الرموش الصناعية بس في الحقيقة هي رموشك عشان كذا سموها they're real.

مثل ماتلاحظون شكل الفرشاة عبارة عن شعرات قصيرة متقاربة وفي النهاية شعرات مائلة عشان تسهل الوصول للرموش في زاوية العين ، بالنسبة لي لاحظت انها تعطي طول للرموش وتفرقها بس ماتعطي كثافة يعني او تبين الرموش اكثف ممكن تستخدمين معها مسكارا ثانية للتكثيف، والحلو فيها انك ممكن تزيدين اكثر من طبقة بدون ماتتكتل بس حاولي تمسحين الزايد على منديل نظيف قبل تحطينها على رموشك، والحلو فيها بعد ان تركيبتها ماتغيرت مع الاستخدام ومانشفت مع ان صار لها فترة طويلة عندي، بعض المسكارات تنشف بعد مانفتحها بفترة بسيطة، الجانب السئ فيها انها ووتر بروف او ضد الموية وتركيبتها ثقيلة عشان كذا تنظيفها صعب وتحتاجين منظف ميك اب قوي لإزالتها.

الماسكرا الثانية من بنيفت هي رولر لاش، 

وهي اخر اصدار لهم طبعا كلنا نتفق ان الباكجنق الخاص ببنيفت كيوت وأنثوي وهذا الشي يجذبني، 

الماسكرا هذي مستوحاة من رولات الشعر وهدفها انها تعكف الرموش وتحافظ عليها اطول وقت ممكن، 

ومثل ماهو واضح بالصورة انها مصممة مثل شكل الرول عشان يسمح لها بِلف الرموش وابرازها، 

بالنسبة لي لاحظت انها تعطي طول وكثافة بسيطة، حلوة للاستخدام اليومي او بالنهار، لانها تحلي شكل الرموش بدون مايبين شكلها اوفر، ولاحظت انها اسهل بالتنظيف من ماسكرة ذير ريل،

باختصار كل الماسكرتين حلوة ومناسبة لكن كل بنت تختلف حسب احتياجها سواء من ناحية التطويل او التكثيف وتقدرين تختارين اللي تناسبك. 

المسكرات كلهم في سيفورا وسعرها بحدود 160.    

اتمنى يكون البوست عجبكم واشوفكم في بوست جديد :) 

لاتنسون الاشتراك بمدونتي او صفحتي ع الانستقرام @norah_world11