كيف تعرفين شكل عيونك والمكياج المناسب لها

مساء الخير بنات،، 

اليوم حابة اتكلم عن موضوع العيون، كل وحدة فينا اكيد تتميز بشكل عيونها الخاص عشان كذا راح يكون لها ميك اب يناسبها، يعني ممكن تشوفين وحدة مكياج عيونها سموكي وقوي وطالع جميل وتسوين نفس اللوك مايطلع حلو، والعكس ممكن يعني وحدة تشوف لوك ناعم وشدو خفيف ومايكون يناسبها.  

بشكل عام العيون لها ثمان أنواع: 

1/ العيون الغائرة.

2/العيون الجاحظة.

3/العيون المبطنة.

3/العيون المتباعدة.

4/العيون القريبة من بعضها.

5/العيون اللوزية.

6/العيون الناعسة او المسحوبة.

7/العيون الآسيوية او المونولد.

العيون الغائرة او العميقة:

اذا كانت العظمة اللي تحت الحاجب بارزة اكثر من الجفن المتحرك ف عيونك غائرة مثل الصورة،، المكياج المناسب لها هو انك تحطين الوان الشدو اللي تكون فاتحة مثل الوردي أو البيج عشان تكسرين حدة العمق هذا وعلى كسرة الجفن تحطين لون غامق. 

العيون الجاحظة:

 

اذا كان جفنك المتحرك وعيونك بارزة، اعتمدي الالوان الغامقة واللوك السموكي راح يكون الأنسب لك.

العيون المبطنة:

 

اذا كان الجفن المتحرك هو اكثر شي بارز بعينك ونازل على خط الرموش في هذي الحالة استخدمي ألوان شدو غامقة على الجفن المتحرك والتدرج من الغامق للفاتح وصولآ الى تحت الحاجب.

العيون المتباعدة عن بعضها:

 

اذا كانت المسافة بين مدمع العين والعين الثانية ابعد من المعتاد، في هذي الحالة اعتمدي على رسمة الآيلاينر العريض، او اختاري الوان شدو غامقة وابتدي من خط الرموش العلوي عشان يعطي ايحاء ان عيونك اقرب لبعضها. 

العيون المتقاربة: 

عكس اللي قبل يعني يكون المجال بين عيونك اقرب من المعتاد، في هذي الحالة اعتمدي على الظلال الفاتحة والشيمر في زاوية العين الداخلية. 

العيون اللوزية:

اذا كانت زاوية العين الخارجية مرتفعه اكثر من مدمع العين او الزاوية الداخلية، في هذي الحالة اعتمدي الألوان الغامقة على الزاوية الخارجية وآيلاينر رفيع مع شدو خفيف اسفل العين عشان يكون فيه توازن لشكل العين. 

العيون الناعسة:

اذا كانت زاوية العين الخارجية نازلة اكثر من مدمع العين، في هذي الحالة افضل لوك لعيونك هو الايلاينر الممدود اعلى العين. 

العيون الآسيوية: 

اللي يتميز فيها الآسيويين بعدم وجود عظمة تحت الحاجب، تقدرين تخففين من هالشي بوضع شدو غامق على الجفن المتحرك والتدرج للفاتح إلى تحت الحاجب.

هذا كان بوست اليوم اتمنى انه كان مفيد لكم خاصة انه اخذ مني وقت ومجهود في جمع المعلومات والصور، 

اشوفكم في بوست جديد.. 

عشرة ارواج من ماك وبدائل أرخص لها

مساء الخير بنات،،

وأخيرآ رجعت أكتب في المدونة بعد انقطاع بسبب انشغالي الفترة اللي راحت:( لكن ان شاء الله راجعة لكم بمواضيع جديدة تهمكم. 

اليوم حبيت اكتب عن ارواج ماك الشهيرة اللي كلنا عرفناها وحبيناها تميزت بدرجات ألوان كثيرة وثباتها، لكن للأسف ماك كل فترة يزيدون أسعارهم عندنا وصارت الارواج حاليا اسعارها فوق المية. 

في بوست اليوم حبيت اعرض لكم  عشر ألوان مفضلة عندي ومعروفة من ماك وأعرض معها بدائل أرخص تناسب ميزاينية أغلب البنات.

1/

درجة velvet teddy فلفت تيدي من ماك ، والبديل لها bare it all من وت ان وايلد، الماركة هذي راح اذكرها كثير في بوست اليوم، ارواجها تشبه ماك لدرجة كبيرة وثباتها عالي وسعرها مايزيد عن ٣٠ ريال، لكن ماتنباع عندنا انا طلبتها اون لاين، وتتوفر عند كثير من التاجرات، ونفس الماركة لها استاند في فيرجن دبي مول والإمارات مول اللي لها زيارة قريب ممكن تجربها هناك. وهذي سواتش للونين يوضح التشابه بينهم.

2/kinda sexy كايندا سكسي من ماك، والبديل لها just peachy من وت ان وايلد، وهذي سواتش للألوان

 

3/  russian red رشن رد من ماك والبديل لها stoplight red من وت ان وايلد، وبديل ثاني اللي هو really red من ريڤلون وهذي سواتش للألوان. 

4/angel انجل من ماك والبديل لها primerose من ريڤلون. 

5/snob سنوب من ماك والبديل لها pink pout من ريڤلون. 

6: twig تويق من ماك جدآ احب هذا اللون واعتبره من افضل ارواجي من ماك لون دافي ويناسب أي لوك، البديل له touch of spice من مايبلين. 

 الحين بنتقل للألوان الغامقة المعروفة من ماك مثل: 

7/heroine هيرون من ماك والبديل له ravin raisen من وت ان وايلد، وبديل ثاني اللي هو brazen berry من مايبلين. 

8/rebel ريبل من ماك وبديله sugar blum 

من وت ان وايلد. 

9/diva ديڤا من ماك وبديله cherry bomb من وت ان وايلد. 

10/ cyber سايبر من ماك وبديله va va violet من ريڤلون .  

هذا كان بوست اليوم حاولت احط درجات متنوعة بين فاتح وغامق عشان ترضي اذواقكم وان شاء الله تستفيدون منها اذا طلعتوا  تشترون ارواج في المرات الجاية :) 

ولاتنسون تشتركون في المدونة عشان تشوفون مواضيعي القادمة،،

أشوفكم في بوست جديد . 

الطريقة المثالية لتغطية الهالات حول العين

مساء الخير بنات،،

اليوم بتكلم عن أفضل طريقة لتغطية الهالات بالميك اب، الهالات ممكن يكون سببها وراثي وممكن تزيد من قلة النوم وقلة شرب الماء وهذي كلها للأسف أعاني منها. 

الخطوة الأولى في تغطية الهالات:

استخدام كوركتر او مصحح اللون، الكوركتر يكون لونه برتقالي او مشمشي، كل ماكانت هالاتك غامقة انصحك تستخدمين لون يميل للأورنج اكثر، وظيفته يوحد اللون للي عندهم هالات غامقة او يعانون من ظهور العروق الزرقاء حول العين لانك لو استخدمتي الكونسيلر فقط بدون كوركتر ماراح يغطي وبتكون الهالات لونها رمادي، الكوركتر يكون قوامه ثقيل وأفضل طريقة لإستخدامه هي أطراف الأصابع ويوضع على المنطقة الغامقة فقط، افضل انواع الكوركتر اللي جربتها من ماك، نكس، وبوبي براون اللي سبق وكتبت عنه بوست سابق بالمدونة. 

الخطوة الثانية: 

استخدام الكونسيلر او خافي العيوب، بعد ماوحدنا اللون نحط الكونسيلر، وظيفته ينور المنطقة ويفتح لونها،  

احب استخدم كونسيلر يكون قوامه سائل عشان مايتكتل او يخطط، وأحب أدمجه بالبيوتي بلندر وطبعآ غنية عن التعريف واستخداماتها متعددة، كتبت عنها موضوع سابق، افضل انواع الكونسيلرز اللي جربتها من ماك ومايبلين، كونسيلر برو لونق وير من ماك تغطيته ممتازة وثباته عالي لكن احب استخدمه للمناسبات لأنه قوي، وبعض الانواع الثانية بالدرق ستور مناسبة للإستخدام اليومي. 

أفضل طريقة لوضع الكونسيلر هي على شكل مثلث من اسفل العين للأنف مثل الصورة 

الخطوة الثالثة: 

استخدام الباودر للتثبيت، بالنسبة لمنطقة حول العين يفضل استخدام لوز باودر او البودرة السائبة لأن جزيئاتها دقيقة تثبت الكونسيلر وتمنعه من التكتل استخدمها مع فرشاة صغيرة او بالبيوتي بلندر، انواع البودرة السائبة كثير بالمحلات لكن انا شخصيآ ناسبتني بودرة لورا مارسييه وبودرة بنانا ناي لأن لونها اصفر وتناسب بشراتنا واحيانا احب اخلطهم مع بعض، للأسف كلها ماتنباع هنا لكن متوفرة بالطلب. 

هذي اعتبرها الطريقة المثالية في تغطية الهالات وانا جربتها وصارت روتين لمكياجي، ممكن تشوفين الخطوات كثيرة لكن اضمن لك انك بتلاحظين الفرق وماراح تاخذ منك وقت. 

اتكنى يكون بوست اليوم فادكم :) 

أشوفكم في بوست جديد. 

تجربتي مع علاج البلازما والميزوثيرابي

مساء الخير.. 

كيف حالكم بنات! ان شاء الله تكونون بأحسن حال. 

فيه مواضيع كثيرة حابة اتكلم عنها في المدونة لكن ضيق الوقت مايسعفني عشان كذا ممكن تكون تدويناتي يوم بالأسبوع.

اليوم حبيت اشارككم في موضوع شخصي ممكن يفيد البنات اللي يهتمون ببشراتهم او يبحثون عن علاجات، ممكن يكون بعضكم جربها وممكن البعض سمع عنها فقط، ومثل ماقلت في بوستات سابقة هدفي من إنشاء هذي المدونة اني افيد البنات واكتب تجاربي واعتبرها هواية لي ومساحتي الشخصية. 

اليوم حبيت اتكلم عن شي جربته قبل فترة وهي علاج البلازما والميزوثيرابي للبشرة. 

قبل مااشرح عن العلاج بالتفصيل وايش اللي سويته، حابة أتكلم عن نقطة مهمة وممكن يغفل عنها بعض البنات وهي ان البشرة جزء مهم وعضو في اجسامنا مثل باقي الأعضاء يتأثر بالتغذية والنوم والحالة النفسية. 

راح اختصر اهم الأمور اللي تؤثر في البشرة إما للأفضل او للأسوأ خاصة عندنا البنات: 

أكثر شي يؤثر في البشرة وممكن يسبب الحبوب والندبات هي الهرمونات ولخبطتها او انتظامها.

العامل الثاني الشمس عشان كذا دايم انبه على أهمية استخدام واقي الشمس خصوصآ للبنات اللي يطلعون الصباح، خاصة ان تأثير الشمس ماتشوفينه لحظتها لكن مع الوقت بتلاحظين البقع والكلف. 

ثالثآ الحالة النفسية لها تأثير كبير على البشرة والشعر وراح اتطرق للنقاط هذي بالتفصيل في مواضيع جاية بإذن الله. 

نرجع لموضوعنا اليوم بكلمكم عن نوع بشرتي اللي هي مختلطة دهنية عند التي زون وباقي الوجه عادي، مااعاني من مشاكل من حب الشباب الحمد لله لكن ممكن يطلع بالشهر حبة او حبتين مع لخبطة الهرمونات، مشكلتي في المسام والحبوب السوداء. وحابة اقول ان العلاجات اللي جربتها في العيادة ماكان القرار وليد اللحظة لا بالعكس، سويت سيرتش عنها وقريت وشفت باليوتيوب ايش الانواع المناسبة لبشرتي. 

ايش هي البلازما؟؟

البلازما هو نوع من انواع علاجات البشرة يتم عن طريق سحب كمية بسيطة من دم المريضة ووضعه في جهاز خاص يقوم بفصل كريات الدم الحمراء عن البلازما وبالتالي نحصل على بلازما غنية بالصفائح الدموية المعروفة بإسم (prp) ، وبعدها يتم حقن الطبقة السطحية من الجلد بهذي الصفائح الدموية. 

الحالات اللي تستخدم فيها البلازما prp :

بعد عمل البلازما يمكن ملاحظة النضارة على البشرة لانه يعمل على تجديد الخلايا وتحفيز الكولاجين فيعطي البشرة مظهر اكثر حيوية وصفاء. 

طبعآ هذا الكلام اللي حصلته بعد مابحثت والكلام اللي قالت لي طبيبتي. 

بتكلم الحين عن حالة البشرة أثناء العلاج وبعده : في البداية طبعا لازم تكون البشرة نظيفة بدون اي ميك اب، وقت العلاج راح تحط كريم مخدر وبالنسبة لي ماحسيت بألم مجرد نغزات بسيطة على سطح البشرة وتنتهي، بعد العلاج احمرار بسيط وكدمات خفيفة ممكن يومين بالكثير وتختفي. 

مميزات علاج البلازما: 

بما أن البشرة يتم حقنها من دم المريضة نفسه يعني ماتحقن بأي مواد غريبة او خارجية لذالك ماله اي آثار جانبية او أضرار، ومثل مايقولون اذا مانفع مايضر بإذن الله، ممكن عمل ثلاث جلسات كل شهر حتى تعطي مفعول اكبر. 

تجربتي الشخصية: 

للأمانة انا سويت التريتمنت نهاية رمضان تقريبآ وقالت لي راح يبين المفعول من اسبوع الى عشرة ايام، بالنسبة لحالتي مالاحظت أي تغيير او تحسن ملحوظ، يمكن لأني كنت مهتمة من قبل بعمل التقشير والماسكات عشان كذا ماكان له تأثير ملحوظ، لأن تأثيره بسيط جدآ وممكن يبين اكثر مع البشرات التعبانة. عشان كذا ماتحمست أسوي جلسات ثانية. 

في الزيارة الثانية وبعد مابحثت أكثر وقلت لها ان البلازما مافادني بشي اقترحت علي اجرب علاج الميزوثيرابي والميزورولر، وانا قد قريت عنهم من قبل، أخذت موعد ورجعت لها. 

ايش هو الميزوثيرابي؟ 

نوع من علاجات البشرة يتم عن طريق حقن فيتامينات ومعادن وأحماض أمينية في الطبقة الوسطى من الجلد باستخدام إبر رفيعة، وبعدها تستخدم الميزورولر لفعالية أكثر وهي عبارة عن عجلة من الروؤس الدقيقة مكونة من إبر رفيعة بطول ٥ مل يتم تحريكها على سطح البشرة لإزالة الخلايا الميتة وتحفيز الكولاجين. 

الحالات اللي تستخدم فيها الميزوثيرابي: 

يساعد في تخفيف آثار الحبوب والندبات، يعطي البشرة ملمس ناعم  ومظهر صحي أكثر ويخفف من المسام والهالات، وممكن بعد عدة جلسات يعمل على تفتيح البشرة وتخفيف البقع. 

هل له آثار جانبية؟ 

 

بعد البحث والقراءة مالقيت اي آثار او اضرار له لان المواد اللي تحقن هي فيتامينات تفيد سطح الجلد وتأثيرها مؤقت، والعلاج مثبت وتمت الموافقة عليه من هيئة الغذاء والدواء. 

ومثل اي تريتمنت للبشرة لازم تكون نظيفة. 

تجربتي مع الميزوثيرابي: 

في البداية عانيت من ألم واحمرار شديد استمر عدة ايام، عطتني كريم فوسيكورت او كريم الأسد عشان استخدمه اول يومين يهدي البشرة ويخفف الإحمرار، الامتناع عن الميك اب والشمس الا بكريم واقي، بعد اسبوع تقريبآ لاحظت سطح الجلد بدا يتقشر والبشرة بدت تكون اصفى وأنعم ونتيجته مرضية نوعآ ما، وممكن اسوي جلسة ثانية كل شهر مع انها مؤلمة:( 

اكثر شي مؤلم بالنسبة لي كان استخدام الميزورولر تحسين بحرارة في الجلد لكن تخف مع الوقت وممكن استخدام كمادات باردة. 

باختصار النوعين كلها حلوة ومفيدة للبشرة وكل وحدة ونوع بشرتها واحتياجها، بالنسبة للأسعار ماراح اذكرها لأنها معروفة في كل عيادات الجلدية، اما الدكتورة اللي سويت عندها والمركز ممكن اجرب طبيبة ثانية لأني بصراحة مااقتنعت فيها تمامآ. 

نصيحة أخيرة: 

دايم بعد عمل التقشير سواء بالبيت او بالعيادة استخدمي سيروم بفيتامين سي ويفضل يكون بشكل يومي قبل النوم مثل اللي بالصورة وصفته لي الدكتورة ومعروف فوائد فيتامين سي للبشرة في تجديد الخلايا وتخفيف آثار الحبوب خاصة مع التقدم في السن. 

 

لاتنسوون ان هذي كلها علاجات مؤقتة وحلو انك تهتمين بنفسك من فترة لفترة لكن الأهم اهتمامك في البيت بالماسكات والغذاء المناسب. 

وفي البوست السابق كتبت عن ماسكات طبيعية فادتني ودايم اسويها بالبيت، 

هذا كان موضوع اليوم اتمنى اني افدتكم خاصة انه من اكثر المواضيع اللي كتبتها من ناحية الشرح والإطالة وحاولت اجمع اهم المعلومات عنها.

لاتنسون الإشتراك بالمدونة اذا حابين تشوفون كل مواضيعي الجاية.

أشوفكم في بوست جديد :) 

ماسكات طبيعية ومفيدة من البيت

مساء الخير..

اليوم بتكلم عن الماسكات اللي جربتها لوجهي وفادتني وكلها من مكونات سهلة وموجودة بكل بيت. 

اول ماسك عبارة عن شوفان وزبادي وشوي موية ورد، الشوفان يعمل كمقشر لطيف للبشرة والزبادي يعطي نضارة وترطيب وموية الورد تساعد على توحيد اللون ، نخلطها مع بعض الى ان تتماسك ويكون قوامه ثقيل ندهنه على الوجه ونخليه لحد ماينشف من ١٥ الى ٢٠ دقيقة.

الماسك هذا يفيد البشرة المرهقة وراح تلاحظين نضارة بسيطة بعد الاستخدام ممكن إضافة شوي ليمون للبشرة الدهنية لأن الليمون يساعد على تخفيف افراز الدهون وممكن إضافة العسل للبشرة الجافة لأن العسل يعتبر عنصر ترطيب ممتاز.

 الماسك الثاني عبارة عن مكونين فقط: بياض البيض وعصرة ليمونة نخلطها حتى يتكون مثل الرغوة ولازم نتحمل الريحة:( وندهن الوجه لحد ماينشف ويبدا يتقشر، مفيد في تخفيف الروؤس السوداء والمسام وبتلاحظين النتيجة فورية. 

الماسك الثالث أيضآ من مكونين فقط اللي هي البيكنق صودا او بيكربونات الصوديوم مع شوية موية نخلطهم حتى يكون قوامه مثل العجين وندهن فيه الوجه يصفي البشرة من الحبوب ويخفف المسام. مع العلم ان الماسكات كلها تحتاج للإستمرار عشان تلاحظين نتيجة تستاهل. 

معلومة أخيرة بعد اي ماسك او قناع لاتغسلين وجهك بغسول بس شطفيه بالموية وبعدها غسلي الوجه بموية باردة او مرري مكعب ثلج،

وش فايدة الثلج؟؟؟

ينشط الدورة الدموية للوجه وبالتالي يعطي نضارة طبيعية للبشرة ويشد المسام وبعدها تقدرين تستخدمين مرطبك اليومي.

هذا كان بوست اليوم اتمنى اني افدتكم بشي 

أشوفكم في موضوع جديد:) 

ريفيو عن اسفنجة بيوتي بلندر طريقة إستخدامها وتنظيفها

مساء الخير، 

 اشتقت للمدونة والتدوين اللي احسها مساحتي الخاصة. اليوم الريفيو بيكون عن منتج أثار ضجة في عالم الميك واشتهر بشكل كبير ويستاهل صراحة اللي هي اسفنجة بيوتي بلندر beauty blender sponge. 

البيوتي بلندر عبارة عن اسفنجة بيضاوية الشكل وصغيرة خالية من اللاتيكس والعطور وماتسبب حساسية، مصممة خصيصآ عشان تعطي الميك اب فلولس لوك اي مظهر طبيعي خالي من العيوب. تستخدم في دمج الفاونديشن والكونسيلر والمنتجات الكريمية بشكل عام واللوس باودر او البودرة السائبة. تجي في علبة بلاستيكية عشان تحافظ عليها واذا كنتي مهتمة وتنظفينها دايم ممكن تستخدمينها الى ست شهور. 

البيوتي بلندر حصلت على جائزة ألور لعدة أعوام بالضبط من عام ٢٠٠٧ الى ٢٠١٣، وحاصلة أيضآ على براءة إختراع بسبب شكلها البيضاوي اللي يسمح لها بالوصول للمناطق الضيقة بحيث يستخدم الطرف المدبب في توزيع الكونسيلر أسفل العين وجوانب الأنف والطرف الكبير لتوزيع الفاونديشن على كامل الوجه.  

طريقة استخدامها: 

تبللينها كويس بالماء حتى يزيد حجمها وبعدها تعصرين الزائد وتستخدمينها، مصممة عشان تستخدم مبللة وماتستخدمينها ناشفة أبدآ ولا راح تمتص كل المنتج سواء كان فاونديشن او كونسيلر بدون ماتستفيد منه البشرة. 

هذا فيديو استخدمت فيه البيوتي بلندر على كامل الوجه وبكل الخطوات: 

حاليآ صارت متوفرة في سيفورا ويبيعون المنظف الخاص فيها ويكون نوعين: جاف او سائل.

لكن اللي ماعندها المنظف تقدر تستغني عنه بالبار سوب او اي صابون سائل أو شامبو الأطفال.  

وهذا الفيديو يوضح طريقة التنظيف: 

بالنسبة لتجربتي مع البيوتي بلندر اعتبرها من افضل الاختراعات في عالم الميك اب ومااقدر استغني عنها، اللي ماعندها ماادري صراحة كيف توزعون الفاونديشن والكونسيلر يعني باختصار مثل مايقولون life changing :) 

اول مانزلت كانت باللون الوردي وبعدها نزل منها اللون الابيض pure والأسود pro، ماتفرق كثير لكن السوداء يفضلونها الميك اب ارتيست لانها تعطي الميك اب بروفشنال لوك، ونزل منها الحجم الميكرو اللي هو صغير جدا للكونتور او اسفل العين جربتها لكن ماحسيت انها ضرورية يعني البيوتي بلندر الحجم العادي تفي بالغرض وهي الأساس. 

مثل ماذكرت متوفرة في سيفورا او من خلال موقعهم، لكن انتبهوا من التقليد اللي صار بكل مكان والمشكلة مكتوب على العلبة بعد بيوتي بلندر يعني نفس الشكل لكن اذا استخدمتيها تحسين بالفرق عشان كذا خذوها من الأماكن الموثوقة. 

هذا كان البوست لليوم اتمنى انكم استفدتوا مع ان الموضوع معروف من زمان والبيوتي بلندر لها سنين في عالم الميك اب لكن حبيت اكتب عنها في مدونتي وأوثق تجربتي للبنات اللي ماعندهم فكرة. 

أشوفكم في بوست جديد :)  

مقارنة بين قناع الطين من قلام قلو وذا بودي شوب.

مساء الخير،،

اليوم حبيت أقارن عن منتجين جربتهم وانسألت عنهم كثير، ماسك او قناع الطين الشهير من كاليفورنيا هوليوود قلام قلو وقناع الطين الأيوني من ذا بودي شوب. 

المنتجين مخصصة للبشرة المختلطة والدهنية ومذكور انه يساعد على تخفيف المسامات والرؤوس السوداء ويخفف من إفراز الدهون. 

كل القناعين لونهم غامق وقوامهم ثقيل ولهم رائحة قوية ومن النوع اللي ينشف على الوجه ويشد البشرة لحد ماتغسلينه. 

 

قناع قلام قلو مذكور انه يتكون من الجلايكوليك والساليسيك اسيد اللي لها دور في علاج بعض مشاكل البشرة، مذكور انه يعالج المسام والحبوب والتصبغات والشعر اللي يطلع تحت الجلد وممكن استخدامه لكل الجسم لكن انا جربته للوجه بس . 

قناع الطين الأيوني من ذا بودي شوب نزل مع مجموعة الطحالب البحرية المخصصة للبشرة الدهنية. ماقدرت اعرف عن المكونات كثير لأنها غير مذكورة على العلبة. 

طريقة استخدامها: 

تغسلين وجهك بالغسول اليومي وبعد التجفيف تحطين كمية من الماسك وتوزعينه على كل الوجه مع تجنب منطقة الهالات وحول العين، أول ماتحطينه ممكن يلسع شوي وبعد ١٥ او ٢٠ دقيقة يكون قد نشف تبللين ايدينك بالموية وتسوين له تقشير لحد ماينظف الوجه تمامآ. 

تجربتي مع المنتجين: 

بعد ماانظف الماسك أحس بانتعاش وان البشرة مشدودة لكن لابد من الترطيب بعده لأنها تكون جافة، ممكن يستخدم مرتين بالأسبوع فقط، وكل الماسكات ماراح يكون مفعولها سحري على البشرة او تعالج مشاكل لها سنين لكن تأثيرها وقتي ممكن تستخدمينها قبل المناسبة او جزء من روتينك الأسبوعي.

 

حبيت اكتب عنهم في بوست واحد لأني اشوفهم جدآ يتشابهون كلهم نفس المكونات تقريبآ وكلهم مخصصين لنوع بشرة معين وعطوني نفس النتيجة، مع فرق السعر طبعآ قلام قلو سعره حوالي ٣٥٠ موجود في سيفورا وصيدلية وايتس، وقناع ذا بودي شوب سعره حوالي ٦٠ ريال. 

 اتمنى انكم استفدتوا من موضوع اليوم واللي جربت شي منهم تكتب لي :) 

أشوفكم في بوست جديد.