أرواجي المفضلة للشتاء

مساء الخير،، 

كيف حالكم بنات..

الجو صار بارد والشتاء بدا رسميآ،، ومثل مانغير ملابسنا فيه، الميك اب يتغير بعد.

التغيير حلو والارواج الغامقة تنتشر اكثر بالشتاء اهم شي كل وحدة تعرف الألوان اللي تناسبها، وتجرب لحد ماتكتشف اللي يناسبها.  

شخصيآ بوريكم عشرة من اختياراتي للأرواج اللي احبها وممكن احطها هالأيام، ممكن تكتفين بأحد هذي الألوان مع كونسيلر ومسكارا ويكون اللوك متكامل. 

نبدا بالأرواج من اليمين لليسار: 

اول واحد روج من شيسيدو اخذته من سيفورا دبي، اللون لحمي فاتح كريمي ماينشف الشفايف، حلو للنهار او بالليل، رقمه 351.

الثاني من لانكوم لونه احمر صح يعني مو غامق ولا على اورنج، نهايته مطفي بس تركيبته حلوة ماتنشف الشفايف، مناسب للسهرات، رقمه 132.

الثالث من انجلوت لونه لحمي مايل للبني نهايته مطفي ولازم ترطيب قبله لانه ينشف، ارواج انجلوت حلوة وتعتبر بديلة لماك عند بعض البنات لكن انا مااحب تركيبتها لانها ناشفة وتقشر الشفايف، رقم اللون هذا 410. 

الرابع من ميك اب فور ايفر لونه عنابي جميل للأيام هذي ومناسب للسهرات نهايته مخملي ماينشف ولايقشر الشفايف وارواج ميك اب فور ايفر بشكل عام حلوة، رقمه 48.

الخامس من ميك اب فور ايفر حجم السامبل جتني مع هدية سيفورا لونه احمر غامق يميل للعنابي لكن افتح من اللي قبله، رقمه 43.

السادس من ماك الروج المشهور ريبل rebel درجته عنابي مايل للبنفسجي اللون حلو وجرئ، نهايته مخملي يعني حلو وماينشف الشفايف وارواج ماك غنية عن التعريف. 

السابع من ماك تويق twig من ارواجي المفضلة من ماك لونه حلو بين اللحمي والنود على موف نفس اللون اللي اشتهرت فيه كايلي جينر،اللون جميييل جدا ويناسب اغلب البشرات تركيبته مخملية. 

الثامن من ماك بريف brave لونه نود على بيج حلو مع السموكي او لحاله بالنهار وتركيبته مخملية. 

التاسع من ريفلون من كولكشن كولور بورست color burst، تركيب الارواج هذي كريمية وفيها لمعة خفيفة، اللون بنفسجي على فوشي  رقمه 005 . 

العشر من ريفلون نفس الكولكشن اللون هذا احمر ومافيه لمعة مثل اللون السابق وثباته معقول رقم الدرجة 250. 

ماك وانجلوت محلاتهم بأغلب المولات، وارواج لانكوم وميكب فور ايفر موجودة في سيفورا، وريفلوت موجودة في صيدلية وايتس وبوتس.

هذي كان اقتراحاتي لكم لأرواج الشتاء وان شاء الله اكون افدتكم بألوان جديدة واللي جربت منها شي تكتب لي. 

لاتنسون الاشتراك بالمدونة او على الانستقرام @norah_world11 

اشوفكم في بوست جديد :)

مقارنة بين كونسيلر نارس وكونسيلر فت مي من مايبلين

السلام عليكم،، 

كيف حالكم بنات،،

اليوم التدوينة راح تكون عن الكونسيلرات اللي اعتبرها اهم شي بالميك اب لاني اشوف الميك اب اول واهم شي يكون تغطية للعيوب قبل يكون ألوان،، وهذي وظيفة الكونسيلر.

راح اكتب لكم مقارنة بين نوعين من الكونسيلرات وفيه كثير من البنات واليوتيوبرز يشوفون انهم يتشابهون لكن انا شخصيآ بعد ماجربتهم اشوفهم مختلفين تماما،،

راح اتكلم عن كونسيلر فت مي من مايبلين وكونسيلر ريدينت كريمي من نارس، 

في البداية الشبه الوحيد اللي اشوفه بينهم مثل ماهو واضح بالصورة التشابه في الباكجنق او التعليب يعني كلهم نفس شكل العلبة ونفس طريقة الاستخدام، مع ملاحظة ان كمية كونسيلر نارس اكثر بشي بسيط،، 

نجي للإختلافات: 

كونسيلر فت مي من مايبلين بشكل عام جيد وسعره معقول، قوامه ثقيل واذا نشف يصير ماااات او مطفي عشان كذا لازم ترطيب قبله وماانصح فيه للي بشرتها جافة او عندها خطوط تحت العين لأنه راح يبرزها أكثر، درجاته متنوعة وتناسب بشراتنا انا درجتي فيه رقم 25، والحلو فيه بعد انه متوفر في اماكن كثيرة مثل صيدلية وايتس وسنتر بوينت وستي ماكس، سعره بحدود 60 ريال.  

كونسيلر ريدينت كريمي من نارس: 

من اسمه قوامي كريمي وخفيف على البشرة اخف من مايبلين ويتوزع بسهولة، واذا نشف مايخطط وماينشف المنطقة تغطيته متوسطة الى كاملة وثباته يطول، متوفر بدرجات كثيييرة انا درجتي ginger، لكن يعيبه قلة توفره لأنه موجود بس في سيفورا واتوقع للحين مانزل في سيفورا السعودية ، سعره اتوقع 150 ريال، 

طريقتي قبل اي كونسيلر استخدم كريم مرطب للعين وبعدها احط كوركتر وبعدها الكونسيلر وادمجه بالبيوتي بلندر ويعطيني تغطية ممتازة. وكتبت موضوع في المدونة بالتفصيل عن تغطية هالات العين وافضل كونسيلر عندي. 

نصيحتي اذا كنتي تبين كونسيلر يومي تغطيته حلوة وسعره معقول استخدمي مايبلين بس رطبي العين كويس، واختاري الدرجة المناسبة ،،دايم اختاري كونسيلر نفس لون بشرتك او افتح بدرجة بس عشان مايتأكسد او يقلب رمادي. 

هذا كان موضوع اليوم اتمنى انه أفادكم 

ولاتنسون الاشتراك بالمدونة او الانستقرام على @norah_world11

اشوفكم في موضوع جديد :) 

مجموعة الهوليدي من تو فيسد

مساء الخير بنات،، 

اليوم بكلمكم عن شي جميييل، طبعا مثل ماتعرفون أغلب شركات الميك اب تسوي مجموعات خاصة فيها قبل نهاية كل سنه ميلادية طبعآ، والسنة هذي جربت مجموعة كولكشن الهوليدي من تو فيسد.

تو فيسد ماركة غنية عن التعريف موجودة في سيفورا، جربت منهم الشدوات والبرايمر والماسكارا وكانت كلها جيدة، الكولكشن هذا شفته على موقع سيفورا مع مجموعات ثانية لكن هذا أسرني فيه الباكجنق والتصميم الكيوت، تصميم السنة هذي مستوحى من باريس، اسم الكولكشن ( Le grand palais ).

هذا شكل العلبة من برا واسم الكولكشن، 

داخل الكرتون نلقى العلبة هذي وكتيب صغير يعطيك افكار عشان تسوين لوكات معينة بالباليت الموجود، 

داخل العلبة نلقى الشكل الكيوت هذا فيه بعض المنتجات الشهيرة من تو فيسد واللي حققت مبيعات عالية هذي السنة، واللي هي برايمر للعين ينحط قبل الشدو، وروج سائل درجة melted peony، وماسكرتهم الشهيرة better than love، وكلها بحجم السامبل،

نجي للشي الأساسي وهو الباليت يتكون من 18 لون ايشادو اغلبها شيمري او فيها لمعة، درجات الألوان منوعة بين الترابي والبني والبيج، ودرجة الرمادي والكحلي والبنفسجي والوردي والزيتي والأسود،

 وتحت نلقى برونزر sun bunny،وفيه لمعة خفيفة عشان مذا ماينفع كونتور ،وهايلايتر flush، وبلشرين كلها مطفية وهذا الشي عجبني لأني مااحب البلشر يكون فيه لمعة، واحد يميل للوردي skyline، والثاني على مشمشي stardust، 

الباليت بشكل عام جميل، لكن الشدوات لاحظت ان لمعتها قوية وجودتها اقل من باقي شدوات تو فيسد اللي عادة تكون ثابتة بالمقارنة مع هذي تحتاج اكثر من طبقة وتتفتت مع الاستخدام لكن الافضل تحطين الشدو اول وبعدها تكملين ميك اب الوجه عشان يكون اللوك نظيف، 

ينفع يكون هدية وسعره حلو وينفع للبنات اللي يحبون يجمعون ميك اب مثلي، واذا عندك باليت مرتاحة في استخدامه اشوف انه كافي، 

حبيت اقولكم عنه هالفترة بما إنه لازال موجود في سيفورا، سعره 260 واتوقع فيه كرلكشنات قانية لكن انا جيت وسألت عن هذا بالتحديد.

اشوفكم في بوست جديد 

ولاتنسون الاشتراك بالمدونة او على الانستقرام @norah_world11

مشترياتي من موقع آي هيرب iherb.com

مساء الخير بنات..

اليوم الموضوع راح يكون مختلف، اول مرة اكتب بوست عن مشترياتي وحبيت أشارككم طلباتي من موقع آي هيرب. 

الموقع مقره امريكي مشهور عالميآ بمنتجاته العضوية للشعر والجسم والبشرة ومواد غذائية عضوية، اسعاره جدآ معقولة واحلى شي بالموقع انه يشحن دايركت للسعودية، ماراح اتكلم عن تفاصيل الطلب اون لاين والخطوات لأن كثير بلوقرز تكلموا عنها وتقدرون تسوون سيرتش للطريقة، لكن اهم شي يكون عندك بطاقة الدفع المسبق فيزا او ماستر كارد وباقي الخطوات سهلة. 

اول شي كان بتكلم عنه كريمات الترطيب لليد خاصة مع بداية الشتاء والجفاف وكثرة الغسيل حبيت اجرب هذا النوع سمعت عنه مدح اسمه working hands مذكور انه مناسب للأيدي الجافة ويساعد بترطيبها، قوامه ثقيل ويفضل استخدامه قبل النوم. 

سعره في الموقع 24 ريال.

الكريم الثاني من eucerin حجمه مناسب للشنطة والاستخدام اليومي، تركيبته خفيفة ومايدبق عكس الاول.سعره 23 ريال. 

 

الكريم الثالث حبيت اخذ كريم مرطب مناسب للأطفال خالي من العطور وكنت حابة اجرب كريم أفينو لكن دايم مخلص من الموقع، عشان كذا اخذت كريم من mothers friend مناسب للأمهات والحوامل وحتى الأطفال، سعره 26 ريال.

بالنسبة للجسم اخذت غسول للجسم من nubian heritage وهو الصابون الافريقي، مكوناته من الشوفان والألوفيرا وفيتامينe، مذكور في الموقع انه مناسب للي يعانون من حساسية او حبوب بالجسم.سعره 37 ريال.  

الغسول الثاني للجسم من نفس الشركة اللي هو غسول جوز الهند والبابايا والفانيلا، مايحتاج اقولكم ليش اخترته:) يكفي المكونات، 

مذكور في الموقع انه يرطب القشرة وماينشف الجلد، كل الغسولين تقييماتهم عالية بالموقع. 

سعره 37 ريال. 

للوجه اخذت قناع من queen helen قناع للبشرة الدهنية والمختلطة من النعناع، جربته لحد الآن مرة وحدة، اول ماتحطينه تحسين بالبرودة بسبب النعناع وبعد ماينشف وتشطفينه يعطيك احساس بالنظافة والانتعاش، باختصار يعتبر قناع منظف ومنقي للبشرات الدهنية، سعره 14 ريال. 

وايضا للوجه طلبت الاسفنجة البديلة للبيوتي بلندر اللي هي من ريل تكنيك، مااتوقع تكون بنفس الجودة بس شفتها في الموقع سعرها حوالي 22 ريال وحبيت اجربها. 

للشعر طلبت الزيت المشهور من جوز الهند، تقييماته عالية بالموقع مذكور انه عضوي وطبيعي مناسب للوجه والجسم والشعر وحتى للطبخ، لكن انا راح استخدمه لشعري، سعره 47 ريال.

  

شامبو للشعر من nature's gate، من الرمان وزهرة الشمس، خالي من السولفات والبارابين، سعره 22 ريال. 

 

للشعر فيتامينات بيوتين المشهورة، في البوست السابق كتبت عن الفيتامينات اللي جربتها في الفترة الماضية ورأيي فيها، وحبيت اغير هالمرة واجرب البيوتين الآراء متضاربة عنها بعض البنات نفعتهم ومدحوها والبعض ماناسبتهم وسببت لهم حبوب، بس قلت اتوكل على الله وأجربها. سعرها في الموقع 39 ريال.

  

وهذي الماسكات لليدين والقدمين على شكل قفاز، تتكون من خلاصة الألوفيرا وزيت الجوجوبا وزبدة الشيا،  ترطب اليدين والاقدام، مناسبة للإستخدام مرة واحدة سعرها 3 ريال للكيس الواحد. 

 

وطلبت بعد زبدة الفول السوداني العضوية انا شخصيآ ماآكلها لكن حبيت اشتريها للبيت واللي ذاقوها عجبتهم لذيذة وخفيفة، سعرها 14 ريال.

هذا كان بوست اليوم وبصراحة باقي عندي اشياء حاطتها بالوش لست ويمكن اطلبها بأقرب فرصة بس حبيت اشارككم مشترياتي البسيطة،،  

الموقع بشكل عام انصح فيه جدآ وكل شخص ممكن يلقى اللي يناسبه،،

أشوفكم في بوست جديد

لاتنسون تتابعون المدونة 

او على انستقرامي @norah_world11 

تجربتي مع فيتامينات الشعر والاظافر

السلام عليكم

كيف حالكم بنات،،

اليوم بتكلم عن موضوع في بالي من زمان ودايم يسألوني عنه البنات، فقلت اكتب لكم تجربتي هنا اللي هي عن ثلاث انواع من فيتامينات لصحة الشعر والاظافر وتجربتي الشخصية معها، 

في البداية حابة اقولكم لاتتوقعون نتيجة سحرية من أي فيتامين اذا ماكنتي منتظمة عليه يعني ع الاقل يحتاج من شهر الى شهرين عشان تبان النتيجة، ولازم بعد تهتمين بنوع الأكل وحاولي تقللين من الجنك فود وتكثرين مووووية اهم شي. 

اول نوع واول فيتامين جربته كان من فترة طويلة اللي هي فيتامينات هيردال المعروفة، مكوناتها من الزنك والبيوتين المعروف انه ضروري لنمو الشعر، بعد اكثر من شهر لاحظت شي ضايقني اللي هو زيادة شعر الجسم بشكل ملحوظ وهذا الشي خلاني اوقف استخدامه بصراحة، بغض النظر عن فايدته للشعر . 

بعدها بديت استخدم فيتامين hair, skin and nails formula من ارمال gnc.

الفيتامين يتكون من البيوتين المهم لصحة الشعر والأظافر، ومن الحمض الاموني ومضادات الأكسدة لصحة البشرة، مذكور انه يستخدم مرتين بعد الوجبة، اقدر اقول انه خفيف يعني ماسبب لي انتفاخ او حرقان مثل بعض انواع الفيتامينات، لكن مالاحظت اي تغيير من ناحية الشعر،

ثالث نوع اللي استخدمه صار لي تقريبا خمس شهور هو البرايورين، مذكور انه مكوناته طبيعية اللي هي حبة الدخن وزيت القمح والكالسيوم، حبة الدخن الذهبية معروف انها غنية بالمعادن والفيتامينات، بعد كل هالفترة من استخدامه اقدر اقول اني لاحظت تحسن بسيط في اظافري وطولها خاصة ان اظافري من النوع اللي تتكسر بسرعة، ولاحظت بداية ظهور البيبي هير، استخدامها مرتين في اليوم بعد الوجبة ومثل ماقلت مع الاكثار من شرب الماء.

برايورين اعتبرها من افضل الفيتامينات اللي جربتها خاصة انها ماسببت لي مشاكل بالهضم او تعكير المزاج مثل الانواع الثانية، لكن مثل ماقلت تحتاج وقت، حاليآ طلبت فيتامين البيوتين من آي هيرب ويبي له وقت عشان نحكم. 

كل الانواع اللي ذكرتها موجودة بأغلب الصيدليات، 

هذي تجربتي باختصار مع الفيتامينات اللي جربتها،،  عمومآ كل جسم يختلف من ناحية التقبل والهرمونات والتغذية من شخص لآخر واتمنى ان البوست كان مفيد لكم. 

اشوفكم في بوست جديد 

ولاتنسون الاشتراك بالمدونة

او الانستقرام على @norah_world11

باليت الكونتور والبلش من سليك

مساء الخير بنات

نكمل مع بعض المنتجات اللي جربتها من سليك، اليوم بقولكم عن باليت الكونتور والبلش والهايلايت من سليك، اتوقع انه متوفر بثلاث درجات: light, medium, dark

انا درجتي لايت، 

مثل ماهو واضح بالصورة الباليت حجمه صغير مناسب للسفر والاستخدام اليومي، معه مراية وفيه ثلاث درجات، اللون الأول للكونتور بني مايل للرمادي وينفع برونزر، 

اللون الي بالنص هايلايت يميل للؤلؤي ينفع لإبراز عظمة الخد وأعلى الشفايف ومدمع العين، واللون الأخير بلش يميل للوردي مع شيمر. 

الباليت بشكل عام ينفع للمبتدئات واللي تبي باليت بحجم صغير، جودته ممتازة على سعره المعقول، أخذته من زمان من صيدلية وايتس سعره اتوقع اقل من خمسين ريال. 

باليت مناسب بسعر معقول من سليك

السلام عليكم 

كيفكم بنات !

إستكمالآ لموضوع الايشادوز اليوم حبيت اتكلم عن باليت شريته من فترة من ماركة سليك. اكيد اغلبكم يعرف ان ماركة سليك البريطانية توفرت في صيدلية وايتس قبل فترة وأسعارها معقولة. 

الباليت اللي شريته اسمه vintage romance. الوانه زي ماهو موضح بالصورة فيها شيمر وتتدرج من الذهبي للوردي والموف، وفيه درجة البني المتوسط حلوة للدمج. 

فيه أنواع باليتات ثانية وألوان مختلفة لكن انا اخترت هذا الباليت لان ماعندي الوان كثيرة نفسها واللي تحب درجات البني والناتشورال راح تلقاها. 

الباليت يجي معه مراية وفرشاة لكن مااستخدمتها افضل فرش سيقما او ريل تكنيك للشادو.

ألوانه صبغتها حلوة وتقدرين تزيدينها بالتدريج وثباتها حلو، احب استخدم قبلها كونسيلر زي ماذكرت قبل اي شادو يثبت اللون ويخليه واضح أكثر، ماتوقعتها بهذي الجودة صراحة بس بشكل عام اعجبتني على سعرها الرخيص.

مثل ماذكرت شريتها من صيدلية وايتس، وسعرها بحدود خمسين ريال. 

اللي جربتها تكتب لي،، 

ولاتنسون تتابعون المدونة عشان تشوفون اخر المواضيع او ع الانستقرام norah_world11@

اشوفكم في بوست جديد:) 

مقارنة بين باليت الآيشادو نيكد اربن ديكاي وباليت تشوكلت بار من تو فيسد

السلام عليكم

اليوم حبيت ارجع لبوستات الميك اب بعد ماكنت اكتب عن العناية بالبشرة، 

اليوم حابة اتكلم عن باليت الشدو الشهير نيكد من اربن ديكاي وباليت تشوكلت بار من تو فيسد، حبيت اقارن بينهم لأن الألوان بينهم تتشابه ودايم يسألوني البنات ايها افضل! 

في البداية باليت نيكد اوريجنال كان اول إصدار من أربن ديكاي للآيشادو،علبته مخملية يجي معاه برايمر للشدو وفرشة، اعتبره شخصيآ افضل من نيكد 2 اللي يغلب على ألوانه الشيمر ولمعته قوية، ونيكد 3 ألوانه تميل للوردي البارد وغالبآ مايناسب بشراتنا العربية. 

باليت نيكد احب استخدم قبله كونسيلر يوحد لون الجفن ويثبت الايشادو اكثر، للأمانة ماحبيت البرايمر اللي يجي معاه عشان كذا استغنيت بالكونسيلر،

الباليت فيه مراية ويحتوي على 12 لون، تتدرج من الاوف وايت والبيج الى الذهبي والبني والأسود، الوانه بشكل عام ترابية دافية وتناسب الاندرتون تبعنا، 

اغلب الألوان فيها شيمر وثلاثة منها مطفي،

صار له سنين عندي وماخلص أي لون يعني هذا شي إيجابي مع اني استخدمه بشكل مستمر، 

عيوبه بالنسبة لي ان الألوان تتناثر وممكن تحوس الميك اب كله والعيب الثاني اللي لاحظته خاصة بعد ماجربت باليتات من ماركات ثانية إن الالوان صبغتها خفيفة ولازم تعيدين عليها اكثر من مرة. 

نجي للباليت الثاني تشوكلت بار من تو فيسد، شريته بعد المدح اللي شفته عليه باليوتيوب، علبته معدنية على شكل التشوكلت واحلى شي فيه طبعا ريحته تشوكلت وهذا اول شي جذبني، العلبة فيها مراية و 16 لون للآيشادو تتدرج بين الاوف وايت  للبيج والذهبي واللون الزيتي ولون موف ولون وردي بارد، فيها الشيمر وفيها المطفي، أشوف ان الوانه متنوعة أكثر من نيكد وفيه خيارات أكثر، بالنسبة للجودة اشوف ان جودته وثباته أفضل من نيكد والألوان أقوى وهذي تجربتي الشخصية، 

بالنسبة للباليتات هذي تعتبر قديمة يعني نزلت عندنا من فترة وراح تحصلونها، ونزلت بعدها باليتات اصغر من اربن ديكاي وتو فيسد مريحة للسفر والإستخدام اليومي وراح اكتب عنها قريب في المدونة. 

 

اسعار نيكد وتشوكلت بار ميتين وشوي تقريبآ، متوفرة في سيفورا. 

غسول مناسب للبشرات الدهنية والمختلطة

مساء الخير بنات..

اليوم بقولكم عن شي صار لي اكثر من سنة استخدمه وارتحت معاه وهو هذا الغسول من لاروش بوزيه، هو عبارة عن رغوة منظفة للوجه مناسب للبشرة الدهنية والمختلطة والمعرضة للحبوب، الحلو فيه انه ماينشف الوجه بعد مااغسل فيه مثل معظم غسولات الوجه لانه يحافظ على التوازن الطبيعي للبشرة بدون مايزيد من افراز الدهون. 

أستخدمه مرتين باليوم قبل النوم وأول ماأصحى وبعدها احط الكريم المرطب. خالي من العطور والبارابين والصابون. منتجات لاروش بوزيه عمومآ كلها طبيعية وخالية من البارابين. 

جربت من نفس الشركة بعد واقي الشمس قوامه خفيف ومايترك أثر دهني على الوجه، وجربت واقي الشمس المخصص للأطفال حبيته بما ان منتجاتهم طبية وكنت استخدمه لعيالي اذا كانوا بيتعرضون للشمس فترات طويلة، ماله اي ريحة وقوامه خفيف تمتصه البشرة . 

أخذته من صيدلية بوتس واتوقع متوفر بأغلب الصيدليات. 

الفرق بين الكريم والسيروم وفوائدها للبشرة

السلام عليكم 

كيف حالكم بنات،، 

تكملة لموضوع العناية بالبشرة من ماسكات وتقشير، حبيت أتكلم اليوم عن موضوع فادني انا شخصيآ وحبيت أشارككم فيه بمدونتي. 

بتكلم اليوم عن ترطيب الوجه بالكريم والسيروم ايش الفرق بينهم وليش تعتبر مهمة للبشرة!! 

في البداية الترطيب مهم للبشرة مهما كان عمرك ومهما كانت نوعية بشرتك تحتاجين كريم مرطب وكل مااستخدمتيه بدري من سنوات المراهقة مثلا كل ماكان مظهر بشرتك أفضل وملمسها أنعم ، الكريم المرطب وظيفته يغذي البشرة ويرطبها من الخارج وبالتالي يؤخر ظهور الخطوط وعلامات التقدم في السن، ومثل ماذكرت في بوست سابق البشرة الدهنية تستخدم مرطب أساسه مائي والبشرة الجافة تستخدم مرطب أساسه زيتي.

بالنسبة للسيروم تكون تركيبته اخف من المرطب، قوامه عادةً يكون مثل الجل، لأن جزيئات السيروم اصغر من جزيئات المرطب العادي هذا الشي يسمح له يتغلغل بطبقات الجلد الداخلية وبالتالي يخفف من المشاكل اللي تعانيها البشرة من الأعماق أكثر من سطح الجلد، يستخدم بعد غسل الوجه وممكن بعده تستخدمين مرطبك اليومي، تقدرين تختارين السيروم المناسب لك حسب مشاكل بشرتك يعني في الفترة الأخيرة صارت انواع السيروم كثيرة: فيه منها لتخفيف الحبوب بالوجه،ومنها لتخفيف البقع والكلف ومنها لجفاف البشرة ومنها لتخفيف التجاعيد والخطوط . 

 ومع التقدم بالسن اشوف استخدام كل بنت  للسيروم شي ضروري، انا شخصيآ استخدمت سيروم فيتامين سي وسيروم من لانكوم وحاليآ استخدم من كيلز، وراح اكتب عنها قريبآ في البلوق، استخدمه قبل النوم وأكتفي به كمرطب ليلي لأن بشرتي مختلطة، وفي النهار استخدم الكريم المرطب مع نسبة حماية من الشمس.

اتمنى يكون البوست مفيد لكم بمعلومات جديدة وان شاء الله اشوفكم في بوست جديد:) 

تجربتي مع ماسك الطين الهندي من آي هيرب

السلام عليكم

كيف حالكم بنات.. 

اليوم حبيت اكتب عن واحد من الماسكات اللي جربتها الفترة الأخيرة، اشتهر كثير واكيد أغلبكم يعرفه. 

ماسك الطين الهندي من موقع آي هيرب. 

مذكور على علبته انه اقوى ماسك علاجي للوجه بالعالم ومنظف عميق للمسامات، 

الطين المستخدم في القناع مصنوع من كالسيوم البنتونيت الطبيعي مئة بالمئة، وهذي المادة غنية بالكالسيوم والحديد والصوديوم وبالتالي آمن على البشرة لأن مكوناته طبيعية. 

فوائده: مثل ماذكر على العلبة والموقع انه منظف عميق المسامات، يمتص الدهون والترسبات من داخل المسامات ويشدها وينقيها، مذكور أيضآ انه يستخدم لعلاج البثور وحب الشباب، علاج تشققات القدمين، تضميد الركب، وعلاج لسعات الحشرات. 

شكله مثل ماصورت لكم يكون بودرة لونها يميل للأخضر. 

طريقة استخدامه:

مذكور في الموقع انه يخلط مع خل التفاح العضوي ويدهن به الوجه، لكن انا شخصيآ حسيت الخل قوي على الوجه وماجربته، حطيت ملعقتين من الماسك مع شوي موية فاترة لحد مايتكون مثل العجين واحطه على الوجه، أخليه لحد ماينشف واغسله بموية باردة.

تجربتي معاه لاحظت انه لما ينشف مثل كل ماسكات الطين يشد الوجه كثير بس خليه من عشر دقايق الى ربع ساعة وغسليه. بعد ماغسلته حسيت كأني مسوية فيشال من إحساس النظافة لأن البشرة مشدودة وملمسها أنعم والمسامات مشدودة أكثر، رأيي الشخصي انه من أفضل ماسكات الطين اللي جربتها وأنا جربت كثير منها اللي يعتبر سعرها غالي ومنها المعقولة، سعره رخيص مقارنة بكمية المنتج وجودته، لكن عيبه الوحيد بنظري ان إزالته صعبة فالأفضل تحطينه قبل الشاور وتغسلينه وبعدها تحطين كريمك المرطب.

وطبعآ يفرق عن ماسك الشوكلاته اللي كتبت عنه في بوست سابق لأن هذا اقوى على البشرة ويعتبر منظف عميق عشان كذا أنصح ماتكثرون منه مرة بالأسبوع كافية، بينما ماسك الشوكلاته اشوفه لطيف على البشرة ويرطبها.  

حاولت اطلبه من موقع آي هيرب لكن دايم يكون اوت اوف ستك، ف طلبته من هذا الحساب @pick_your_beauty_thing . 

 أتمنى يكون الموضوع مفيد لكم ولاتنسوون تشتركون بالمدونة .

أشوفكم على خير :)  

مقارنة بين سبراي الوجه فكس بلس من ماك واربن ديكاي

مساء الخير بنات.. 

اليوم حابة اتكلم عن مقارنة بين شيئين مااستغني عنهم في الميك اب، البعض يشوف ان استخدامهم واحد لكن الحقيقة انهم مختلفين عن بعض. 

أولآ: سبراي الوجه فكس بلس من ماك ، عبارة عن بخاخ للوجه من مياه معدنية وفيتامينات،البعض يعتبره مثبت للميك اب لكنه يعتبر فنشنق سبراي وراح اذكر لكم كيف هالشي في بقية البوست، استخداماته كثيرة، راح اذكر لكم بعض الأشياء اللي استخدمه فيهم.

ممكن يستخدم كبرايمر يعني اول خطوة قبل الميك اب، يعطي ترطيب ورفريش للبشرة، 

ممكن يستخدم مع الفاونديشن اذا كان عندك فاونديشن ثقيل وتحبين تخففينه ممكن تبخين من الفكس بلس وتخلطينه مع الفاونديشن تكون تغطيته أخف.

ممكن تبخين من الفكس بلس على البيوتي بلندر يرطبها او على فرشة الفاونديشن قبل الدمج.

اذا كان عندك جل لاينر ونشف تقدرين تبخين من الفكس بلس على الجل يخليه يرجع لقوامه قبل وترجعين تستخدمينه. 

اذا عندك شدو لوس او قلتر تقدرين تاخذين منه مع الفكس بلس يثبته لك. 

اذا عندك اي شدو عادي باودري تقدرين تبخين من الفكس بلس ع الفرشة يطلع معاك اللون اقوى والبقمنت ثابتة أكثر. 

اذا خلصتي ميك اب وبعد ماتحطين الباودو والبلش والكونتور ممكن تبخين من الفكس بلس كآخر خطوة يخلي الميك اب ديوي ويخفف اللوك المغبر من البودرة. 

اصدرت ماك حاليآ عدة روائح منه مثل: اللافندر والروز او موية الورد وجوز الهند. 

لكن طبعآ لسى مانزلت عندنا في اخر مرة سألت عنها. لكن الاوريجنال ممكن تلاقونه بكل فروع ماك. سعره تقريبآ ١٥٠ 

نجي للشي الثاني اللي هو السبراي المثبت من اوربن ديكاي. خالي من العطور والبارابين والزيوت، مناسب للي بشرتها دهنية تقدر تبخ منه كآخر خطوة في الميك اب وراح يثبت الفاونديشن ومايخليه يدهن طوال اليوم. اشوفه يختلف عن سبراي فكس بلس لان استخدامه محدود في هالشي لكنه مفيد بعد. من ناحية ثانية مااقدر استخدمه على البيوتي بلندر لانه ينشف بسرعة وماراح يوزع الفاونديشن او الكونسلر بسلاسة مثل الفكس بلس . 

متوفر في سيفورا ناسية السعر لكن بحدود الميتين تقريبآ. 

اتمنى يكون البوست أفادكم، لاتنسون الإشتراك بالمدونة عشان توصلكم مواضيعي. 

اشوفكم على خير:) 

تجربتي مع ماسك الشوكولاته

السلام عليكم 

كيفكم بنات ! 

اليوم حبيت أتكلم عن العناية بالبشرة ومنتج حبيته بالفترة الأخيرة. 

ماسك الشوكولاته من شركة فارم هاوس فرشfarmhouse fresh. الشركة امريكية منتجاتها طبيعية خالية من السولفات والبارابين. عندهم عدة انواع ف حبيت اجرب هذا لانه بالشوكلاته طبعآ وبما انها خالية من المواد الكيميائية ماراح تتحسس منها البشرة. 

يتكون من الكاكاو والعسل وحليب جوز الهند يمي :) 

 طريقته :

مثل أي ماسك تحطينه على بشرة نظيفة ممكن باستخدام فرشاة خاصة بالماسك او بيدك وتكون نظيفة، تخلينه لحد ماينشف وتشطفينه بموية باردة او تمررين مكعب ثلج عشان يقفل المسام.

مذكور على الموقع انه يساعد على تخفيف المسام ويقلل التجاعيد ويعطي البشرة نعومة ونضارة. 

من تجربتي لاحظت من بعد اول استخدام انه ينعش البشرة اذا كانت متعبة ويعطيها رفريش.

حلو للإستخدام قبل الميك اب او قبل مناسبة. مثل ماقلت عن اي ماسك انه مو سحر وتأثيره وقتي لكن اعتبريه من روتينك الأسبوعي ودلعي بشرتك فيه، البعض يتضايق لان ريحة الكاكاو فيه قوية لكن شخصيآ ماازعجني هذا الشي.

متوفر في موقعهم، انا طلبته من هنا  

@pick_your_beauty_thing

سعره ١٥٠ ريال.

اذا جربتوه اكتبوا لي أرائكم، ولاتنسون تشتركون في المدونة عشان توصلكم كل المواضيع . 

 

اشوفكم على خير :)