ريفيو عن جهاز تنظيف البشرة كلاراسونيك ميا ٢

مساء الخير بنات، 

 اليوم راح اتكلم بالتفصيل عن جهاز الكلاراسونيك ميا تو clarisonic mia 2 وهو جهاز مخصص لتنظيف البشرة. 

في البداية بقولكم نوع بشرتي مختلطة دهنية عند التي زون. وبشرتي ممكن تتحسس بسرعة من اي شي وعشان كذا كنت متخوفة من تجربة الكلاراسونيك. 

الكلاراسونيك ببساطة هي فرشة تجي نوعين فيه للوجه وفيه للجسم، انا اكتفيت باللي مخصصة للوجه وقلت اجربها، صار لي استخدمها اكثر من سنة. في البداية كنت استخدمها يوميآ قبل النوم وبعد اسبوعين تقريبآ صرت استخدمها مرتين إلى ثلاث بالاسبوع كافية. 

_مميزات الجهاز: 

مصمم لتنشيط العناية بالبشرة ومع الاستخدام راح تكون البشرة أصفى وأنعم. 

يتظف اكثر ب ٦ مرات من التنظيف اليدوي العادي وبالتالي يقلل من الأوساخ والترسبات. 

يقلل من المسام الواسعة والرؤوس السوداء. 

يهيأ البشرة للإستفادة من كريمات الترطيب والعناية وتمتصها البشرة بشكل افضل. 

_مكونات العلبة: 

أول ماتشترين الكلاراسونيك راح تحصلين الجهاز مع فرشة خاصة للبشرة الحساسة وعلبة للحفظ، شاحن وغسول. 

الغسول حجمه صغير وبعد مايخلص تقدرين تستخدمين اي غسول يناسبك. 

_طريقة الإستخدام: 

في البداية تزيلين مكياج العيون بالمزيل المناسب وبعدها تبللين الوجه وتحطين كمية بسيطة من غسولك على راس الفرشة وتشغلين الجهاز، 

الجهاز له سرعتين انا شخصيآ مااشوف فيها فرق كبير، الجهاز فيه مؤقت ذاتي مع اهتزاز بسيط مقسم على الشكل التالي ٢٠ ثانية للجبهة + ٢٠ ثانية للذقن والأنف + ١٠ ثواني للخد الأيمن + ١٠ ثواني للخد  الأيسر يعني التوتال دقيقة كاملة.

اذا تعودتي عليه وصار من روتينك الليلي ماراح ياخذ منك وقت. أنا شخصيآ احب اجربه بعد الميك اب الثقيل واذا حسيت بشرتي تعبانة احس بعدها بتنظيف عميق وتستفيد البشرة بعده من مستحضرات العناية. 

الجهاز يحتاج شحن بعد ٣٠ مرة من الاستخدام. 

لكن في البداية اول ماتشترينه خليه يشحن لمدة ٢٤ ساعة وبعدها بيكفيك لمدة شهر من دون شحن ، مناسب للإستخدام في الشور وسهل التنقل. 

وهذي صورة توضح الفرق بين تنظيف البشرة بشكل عادي وبين تنظيفها باستخدام الكلاراسونيك 

الجهاز موجود في سيفورا، سعره حوالي ٧٥٠ 

لكن برأيي اعتبره من أساسيات العناية بالبشرة ومن الأشياء اللي راح تفرق بشرتك معاها. 

هذا فيديو توضيحي لإستخدام الجهاز 

هذا كان بوست اليوم اتمنى تكونون استفدتوا :) 

واللي عندها أي استفسار تكتب لي بالكومنتس 

اشوفكم في بوست جديد. 

مقارنة بين بيوديرما ولوريال ونيفيا

مساء الخير بنات 

اليوم حابة اتكلم عن شي يهمني شخصيآ وجربت أنواع منه، وهو مزيلات الميك اب، اليوم راح أقارن بين ثلاث منتجات من بيوديرما ونيفيا ولوريال. 

في البداية المنتجات الثلاثة هي عبارة عن ماء ميسلر منظف micellar cleansing water

وكلها موجود على العلبة انها خالية من العطور، تنظف المكياج عن الوجه والعيون وممكن تستخدم كتونر وماتحتاج شطف بعدها. 

 طريقتها انك تبللين منها شوي على قطنة وتمسحين فيها الوجه والعيون بلطف بدون دعك قوي.

 

بالنسبة لتجربتي مع بيوديرما صار لي استخدمه سنين ومافكرت اغيره لأن بشرتي ارتاحت معه خفيف وماحسس عيوني لكن يعيبه سعره غالي ومااحصله بأي صيدلية وله رائحة مزعجة . 

لوريال احسه ماينظف زين وسبب لي حساسية وحكة بعيوني مع انه مكتوب مناسب للبشرة الحساسة لكن للأسف ماناسبني مرة. 

نيفيا ممكن يكون الأفضل بعد بيوديرما ينظف كويس وبنفس الوقت خفيف على البشرة، وماله رائحة وموجود بكل الصيدليات والسوبر ماركت.وأسعارها رخيصة مقارنة في بيوديرما.  

اتمنى تكونون استفدتوا من البوست واللي جربتهم تكتب لي يالتعليقات :) 

اشوفكم في بوست جديد. 

زيارتي لمقهى ذا هامبتونز دبي

مساء الخير بنات،، 

كيفكم مع رمضان ان شاء الله تكونون تمام :) 

اليوم البوست مختلف، حبيت اغير عن الميك اب والبيوتي وراح اكتب تجربتي عن مكان مختلف. 

بتكلم عن زيارتي لمقهى ذا هامبتونز في دبي the hamptons cafe 

في البداية المكان مميز بديكوراته وأجوائه الهادية، الديكور مستوحى من منطقة هامبتونز في نيويورك، موقعه على شارع جميرا بيتش.

والمقهى متميز بالماكرون والكوفي، الماكرون جدآ لذيذ وبنكهات متعددة، واخذت منهم كيك تشوكليت وكيكة الجزر والبقان وكانت لذيذة ومتقنة والتقديم رائع، 

يعجبني المكان اللي يهتم بأدق التفاصيل عشان يرضي زباينه، ومع كذا أسعاره معقولة والخدمة ممتازة. 

باختصار اعتبره من الأماكن اللي ممكن أرجع لها في دبي وماأمل منها. 

اتمنى يكون البوست عجبكم واللي سبق لها زيارة المكان تكتب لي تجربتها بالتعليقات، وأترككم مع الصور :) 

تابعوني على تويتر: norah_aa

انستقرام: norah_world11

ريفيو عن فاونديشن نارس الجديد

السلام عليكم 

الله يبلغنا وإياكم رمضان وحنا بصحة وسلامة، ويجعلنا من صوامه وقوامه،، 

اليوم حبيت اتكلم عن شي جديد جربته قبل فترة وحبيت اقولكم عنه وهو فاونديشن نارس الجديد

all day luminous weightless foundation 

 

نارس من ماركات الميك اب المشهورة جدآ لكن للأسف مو موجودة بسيفورا عندنا، والفاونديشن هذا اشتهر بالفترة الأخيرة بين البلوقرز الأجانب خاصة انه اخر فاونديشن نزل من نارس.

الفاونديشن من إسمه مذكور في الموقع انه يطول كل اليوم خالي من الزيوت ويعطي منظر ديوي او مشرق للبشرة ومناسب لجميع الأنواع.علبته زحاجية ومصمم عشان يكون سهل استخدامه بعكس فاونديشنات نارس السابقة كان تعليبها سيء، قوامه خفيف جدا وسائل من طبقة وحده يعطي تغطية خفيفه ووممكن تزيدين على الأماكن اللي محتاجة تغطية أكثر.

 

بالنسبة لي حبيته يعطي لوك طبيعي ومايتكتل أوزعه بالبيوتي بلندر ويعطي تغطية حلوة وبعدها اثبته بأي بودرة خفيفة. والحلو في نارس التنويع في درجات الفاونديشن يعني ممكن تلقين درجتك بسهولة لانه يتضمن درجات الاندتون الاصفر وهو الغالب على بشراتنا العربية بعكس الفاونديشنات الثانية يكون الاندرتون تبعها على وردي وهذا مو مناسب لنا.

انا اخذت الدرجة punjab وتعتبر متوسطة وجدآ ناسبتني.

موجود في سيفورا دبي وسعره ميتين وشوي اتوقع .

اتمنى انكم استفدتوا من الريفيو واشوفكم في بوست جديد :) 

 

منتجات تجميلية ضرورية للصيف

مساء الخير بنات ،، 

بما أن الجو صار صيف والحر مايرحم حبيت اشارككم ببعض المنتجات اللي اعتبرها ضرورية لكل السنة بشكل عام وللصيف خاصة.

قبل كل شي تنظيف الوجه وترطيبه شي مهم ولازم يكون المرطب فيه نسبة حماية من الشمس على الأقل ١٥ بالمئة حتى لو كنتي بالبيت. في الصيدليات انواع كثيرة ومتنوعة حسب نوع بشرتك. انا حاليآ استخدم هذي من صيدلية بوتس وكلها ممتازة.

 

واذا كنتي راح تطلعين بالشمس لابد من كريم واقي او سن بلوك وفيه بعد عدة انواع منه، أهم شي يكون طبي ومن شركة موثوقة وفيه منه للأطفال.

اذا كنتي بتحطين ميك اب وبشرتك دهنية او مختلطة لازم تحطين برايمر قبل تبدين يكون بعد المرطب وقبل الميك اب. وظيفة البرايمر انه يخلي الفاونديشن والباودر تثبت بالجو الحار ومايتغير شكل الميك اب. فيه عدة انواع للبرايمر وكل الشركات صارت تسوي منه. وفيه الغالي وفيه المعقول. أشهر انواع البرايمرز هو من بنيفت بورفشنال وحاليآ نزلو ميك اب فورايفر خمس انوع من البرايمرز وكل نوع له وظيفة للبشرة وكلها ممتازة.  

وعشان تثبتين الميك اب فترة أطول بدون مايبين ثقيل ممكن تستخدمين بودرة شفافة تكون مضغوطة او لوس باودر وفيه منها انواع كثيرة وظيفتها تخفف من شكل الدهون اللي على الوجه وتعطي الميك اب شكل مطفي او مات. فيه من ريميل بودرة مضغوطة تستخدمينها على التي زون والمناطق اللامعة بالوجه تخفف من الدهون وتعطي فنش مات. هذي البودرة جدآ انصح فيها للي تميل بشراتهم للشي هذا خلال الصيف او تكون البشرة دهنية، وفيه بعد من بنيفت بودرة  لها نفس العمل وعلبتها ممتازة ومناسبة للإستخدام خارج البيت.

 

الماسكارا اعتبرها ضرورية لأي لوك وأفضل تكون ووتر بروف او ضد الموية خصوصآ بالصيف عشان تحافظ على شكلها وماتسيح مع الحر. وكثير موجودة أنواع منها في الدرق ستور مثل وايتس وفي بسيفورا، لكن يعيبها صعوبة تنظيفها فلازم تستخدمين مزيل مكياج للعين وتشيلينها قبل النوم. 

وعشان يثبت الميك اب مهما كان اللوك بسيط وناعم انا أفضل استخدم سبراي او بخاخ مثبت للوجه يعطي انتعاش للبشرة ويثبت الميك اب بدون مايتكتل او يسيح، وفيه منه انواع كثيرة من اربن ديكاي وشانيل وأفين وبخاخ فكس بلس المشهور من ماك، حتى لو ماكنتي حاطة فل ميك اب تقدرين تستخدمين البخاخ ينعش الوجه ويرطب البشرة.

وآخر شي حابة اتكلم عنه هو منتج غير تجميلي لكنه ضروري لبشراتنا وصحتنا وحياتنا اليومية وهو الموية. لازم نشرب ع الاقل ٨ أكواب من الماء يوميآ خصوصآ مع الجو الحار والجاف وبتلاحظين الفرق مع الوقت والاستمرار.

هذي أهم المنتجات اللي أحب استخدمها في الصيف وخلال السنة عمومآ، اتمنى انكم تجربونها وتستفيدون واللي عندها منتج تحبه تبلغني بالتعليقات عشان اجربه :)

أشوفكم في بوست جديد .

العناية بالشفايف وترطيبها

السلام عليكم،،

موضوع اليوم جدآ مهم مع إن أغلبية البنات ماتهتم فيه للأسف، وهو عن ترطيب الشفايف والعناية فيها.

الشفايف جزء مهم جدآ في الوجه وممكن إذا أهملناها تسبب مشاكل مثل التشققات والجفاف وتغير اللون للغامق. 

اليوم بتكلم عن منتجات ترطيب الشفايف اللي استخدمتها وطريقة تقشير الشفايف. 

في البداية اتكلم عن كيفية تقشير الشفايف وفايدتها. التقشير مهم في إزالة الجلد الميت ويعطي منظر اجمل للشفايف. ممكن تسوينه قبل النوم وبعدها ترطبين الشفايف، والأفضل يكون مرة بالأسبوع . 

اللي في الصورة السابقة منتج لتقشير الشفايف من ذا فيس شوب، قوامه ناعم وخفيف تقدرين تبللين الشفايف بشوية موية وتحطين كمية بسيطة منه وتفركينها بطريقة خفيفة. وفيه منه عدة انواع وفي عدة محلات مثل ذا بودي شوب، باث اند بودي ولش. 

وفيه أيضآ من ماركة إلف مقشر مثل شكل الروج

وممكن تسوين المقشر بنفسك جدآ سهل تاخذين كميات متساوية من سكر بني وزيت اللوز او زيت الزيتون، وبنفس الطريقة تفركينها بشكل خفيف. 

نجي للترطيب ضروري بعد التقشير. 

فيه عدة منتجات حاليآ لترطيب الشفايف وهذي بعضها 

في الصورة من اليمين مرطب من ديور خفيف ولونه وردي مايعطي لون قوي وترطيبه متوسط موجود في سيفورا.

وبعدها من لوكسيتان ومرطبات ميبلين وسيفورا تجي ستك او مثل الروج، خفيفه ولونها مو قوي حلوة للترطيب اليومي، مرطبات ميبلين موجودة في وايتس وسنتر بوينت ولوكسيتان في محلهم، ومرطبات اي او اس الكيوت كنت أطلبها اون لاين واتوقع الحين موجودة في وايتس، وبعدها فازلين الحجم الصغير جدآ ومرطب كارميكس أعتبرها ثقيلة وأفضل استخدمها قبل النوم، فازلين موجود في وايتس وكارمكس موجود بالتميمي والدانوب.

وهذا مرطب من ماركة كاندي الأمريكية اخذته من وايتس شدني شكله الكيوت، مكتوب انه مكون من النعناع والشوكولا وفيتامين إي. ترطيبه حلو بس مايطول. 

نصائح عامة للإهتمام بالشفايف: 

قبل تحطين الروج ممكن تحطين مرطب للشفايف قبلها بخمس دقايق.

شرب الماء بكثرة خصوصآ في أجواءنا الحارة.

تجنبي لعق الشفايف لان هالشي يسبب الجفاف والتشققات. 

استخدمي منتجات الشفايف اللي تكون موثوقة ومن محلات معروفة لأن الأرواج الرخيصة تسبب سواد للشفايف مع مرور الوقت. 

عدم التعرض للشمس بكثرة وفي هالحالة ممكن تستخدمين واقي للشمس خاص للشفايف موجود في أغلب الصيدليات مثل اللي بالصورة 

أتمنى انكم استفدتوا من الموضوع 

وأشوفكم في مواضيع جاية ان شاء الله :) 

جهاز ايوسايكا الضوئي لإزالة الشعر،(جهاز الليزر المنزلي)

ماهو جهاز ايوسايكا؟

ايوسايكا هو جهاز كوري من مصانع ايوسايكا الكورية، يستخدم لإزالة الشعر بواسطة الليزر او مايسمى بتقنية IPL intensive pulse light وتعني الضوء المركز الخاطف او بالعامية ضوء الفلاش. حاصل على موافقة هيئة الغذاء والدواء السعودية.  

كيف يعمل الجهاز ؟ 

يعمل على إزالة الشعر على البارد بدون ألم وهي نفس التقنية الموجودة في معظم المراكز الطبية. 

هذه التقنية تقوم بتسخين بصيلة الشعر بشكل سريع ومفاجئ وبدون احساس بالألم، الشعر الغامق يمتص حرارة اعلى من الشعر الفاتح. هذه التقنية توقف نمو الشعر مبكرآ في مرحلة (أناجين) وهي مرحلة نمو الشعر لذالك عادة يحتاج الشعر إلى أكثر من اربع جلسات حتى تظهر النتائج مع الإستمرار. 

مزايا الجهاز: 

 تقنية متقدمة و متخصصة للاستخدام المنزلي سهل الاستخدام وعالي الجودة، غير مؤلم ولايسبب حرق او تصبغ في الجلد، وسهل التنقل بسبب وزنه الخفيف، 

يمكن استخدامه على اليدين والرجلين وجميع المناطق الأخرى بالجسم. 

تعليمات قبل الإستخدام:

يفضل عدم نزع الشعر او تشقيره قبل الجلسة ب ٢٠ يوم ولا مانع من إزالته بالموس او الشفرة. ويجب إزالة اي كريم او منتج على البشرة قبل الاستخدام.ويفضل عدم التعرض للشمس قبل الجلسة او بين الجلسات. 

نتائج الإستخدام: 

يتساقط الشعر خلال عشر أيام من استخدام الجهاز وقد يعود الى النمو خلال شهر من بعد الجلسة، ولكن يظهر بشكل أخف وأرفع، قد تحتاج المريضة الى سبع جلسات وسطيآ وتكون المدة المطلوبة بين الجلسات اسبوعين تقريبآ. 

انا شخصيآ اشتريت الجهاز من أربع سنوات تقريبآ وكنت استخدمه على فترات متقطعة ولكني لاحظت النتائج بعد فترة من الإستخدام ولازال الجهاز ممتاز ولكن يحتاجالى تغيير العدسة بعد فترة من الاستخدام.  

الجهاز موجود في محل أعماق الطبيعة في رويال مول او في الانترنت، سعره مايقارب ألف دولار او ٣٧٠٠ ريال .