منتجات تجميلية ضرورية للصيف

مساء الخير بنات ،، 

بما أن الجو صار صيف والحر مايرحم حبيت اشارككم ببعض المنتجات اللي اعتبرها ضرورية لكل السنة بشكل عام وللصيف خاصة.

قبل كل شي تنظيف الوجه وترطيبه شي مهم ولازم يكون المرطب فيه نسبة حماية من الشمس على الأقل ١٥ بالمئة حتى لو كنتي بالبيت. في الصيدليات انواع كثيرة ومتنوعة حسب نوع بشرتك. انا حاليآ استخدم هذي من صيدلية بوتس وكلها ممتازة.

 

واذا كنتي راح تطلعين بالشمس لابد من كريم واقي او سن بلوك وفيه بعد عدة انواع منه، أهم شي يكون طبي ومن شركة موثوقة وفيه منه للأطفال.

اذا كنتي بتحطين ميك اب وبشرتك دهنية او مختلطة لازم تحطين برايمر قبل تبدين يكون بعد المرطب وقبل الميك اب. وظيفة البرايمر انه يخلي الفاونديشن والباودر تثبت بالجو الحار ومايتغير شكل الميك اب. فيه عدة انواع للبرايمر وكل الشركات صارت تسوي منه. وفيه الغالي وفيه المعقول. أشهر انواع البرايمرز هو من بنيفت بورفشنال وحاليآ نزلو ميك اب فورايفر خمس انوع من البرايمرز وكل نوع له وظيفة للبشرة وكلها ممتازة.  

وعشان تثبتين الميك اب فترة أطول بدون مايبين ثقيل ممكن تستخدمين بودرة شفافة تكون مضغوطة او لوس باودر وفيه منها انواع كثيرة وظيفتها تخفف من شكل الدهون اللي على الوجه وتعطي الميك اب شكل مطفي او مات. فيه من ريميل بودرة مضغوطة تستخدمينها على التي زون والمناطق اللامعة بالوجه تخفف من الدهون وتعطي فنش مات. هذي البودرة جدآ انصح فيها للي تميل بشراتهم للشي هذا خلال الصيف او تكون البشرة دهنية، وفيه بعد من بنيفت بودرة  لها نفس العمل وعلبتها ممتازة ومناسبة للإستخدام خارج البيت.

 

الماسكارا اعتبرها ضرورية لأي لوك وأفضل تكون ووتر بروف او ضد الموية خصوصآ بالصيف عشان تحافظ على شكلها وماتسيح مع الحر. وكثير موجودة أنواع منها في الدرق ستور مثل وايتس وفي بسيفورا، لكن يعيبها صعوبة تنظيفها فلازم تستخدمين مزيل مكياج للعين وتشيلينها قبل النوم. 

وعشان يثبت الميك اب مهما كان اللوك بسيط وناعم انا أفضل استخدم سبراي او بخاخ مثبت للوجه يعطي انتعاش للبشرة ويثبت الميك اب بدون مايتكتل او يسيح، وفيه منه انواع كثيرة من اربن ديكاي وشانيل وأفين وبخاخ فكس بلس المشهور من ماك، حتى لو ماكنتي حاطة فل ميك اب تقدرين تستخدمين البخاخ ينعش الوجه ويرطب البشرة.

وآخر شي حابة اتكلم عنه هو منتج غير تجميلي لكنه ضروري لبشراتنا وصحتنا وحياتنا اليومية وهو الموية. لازم نشرب ع الاقل ٨ أكواب من الماء يوميآ خصوصآ مع الجو الحار والجاف وبتلاحظين الفرق مع الوقت والاستمرار.

هذي أهم المنتجات اللي أحب استخدمها في الصيف وخلال السنة عمومآ، اتمنى انكم تجربونها وتستفيدون واللي عندها منتج تحبه تبلغني بالتعليقات عشان اجربه :)

أشوفكم في بوست جديد .