الخميس، 20 أغسطس 2015

ماسكات طبيعية ومفيدة من البيت

مساء الخير..

اليوم بتكلم عن الماسكات اللي جربتها لوجهي وفادتني وكلها من مكونات سهلة وموجودة بكل بيت. 


اول ماسك عبارة عن شوفان وزبادي وشوي موية ورد، الشوفان يعمل كمقشر لطيف للبشرة والزبادي يعطي نضارة وترطيب وموية الورد تساعد على توحيد اللون ، نخلطها مع بعض الى ان تتماسك ويكون قوامه ثقيل ندهنه على الوجه ونخليه لحد ماينشف من ١٥ الى ٢٠ دقيقة.



الماسك هذا يفيد البشرة المرهقة وراح تلاحظين نضارة بسيطة بعد الاستخدام ممكن إضافة شوي ليمون للبشرة الدهنية لأن الليمون يساعد على تخفيف افراز الدهون وممكن إضافة العسل للبشرة الجافة لأن العسل يعتبر عنصر ترطيب ممتاز.




 الماسك الثاني عبارة عن مكونين فقط: بياض البيض وعصرة ليمونة نخلطها حتى يتكون مثل الرغوة ولازم نتحمل الريحة:( وندهن الوجه لحد ماينشف ويبدا يتقشر، مفيد في تخفيف الروؤس السوداء والمسام وبتلاحظين النتيجة فورية. 


الماسك الثالث أيضآ من مكونين فقط اللي هي البيكنق صودا او بيكربونات الصوديوم مع شوية موية نخلطهم حتى يكون قوامه مثل العجين وندهن فيه الوجه يصفي البشرة من الحبوب ويخفف المسام. مع العلم ان الماسكات كلها تحتاج للإستمرار عشان تلاحظين نتيجة تستاهل. 

معلومة أخيرة بعد اي ماسك او قناع لاتغسلين وجهك بغسول بس شطفيه بالموية وبعدها غسلي الوجه بموية باردة او مرري مكعب ثلج،


وش فايدة الثلج؟؟؟
ينشط الدورة الدموية للوجه وبالتالي يعطي نضارة طبيعية للبشرة ويشد المسام وبعدها تقدرين تستخدمين مرطبك اليومي.

هذا كان بوست اليوم اتمنى اني افدتكم بشي 
أشوفكم في موضوع جديد:) 

الثلاثاء، 11 أغسطس 2015

ريفيو عن اسفنجة بيوتي بلندر طريقة إستخدامها وتنظيفها

مساء الخير، 
 اشتقت للمدونة والتدوين اللي احسها مساحتي الخاصة. اليوم الريفيو بيكون عن منتج أثار ضجة في عالم الميك واشتهر بشكل كبير ويستاهل صراحة اللي هي اسفنجة بيوتي بلندر beauty blender sponge. 



البيوتي بلندر عبارة عن اسفنجة بيضاوية الشكل وصغيرة خالية من اللاتيكس والعطور وماتسبب حساسية، مصممة خصيصآ عشان تعطي الميك اب فلولس لوك اي مظهر طبيعي خالي من العيوب. تستخدم في دمج الفاونديشن والكونسيلر والمنتجات الكريمية بشكل عام واللوس باودر او البودرة السائبة. تجي في علبة بلاستيكية عشان تحافظ عليها واذا كنتي مهتمة وتنظفينها دايم ممكن تستخدمينها الى ست شهور. 

البيوتي بلندر حصلت على جائزة ألور لعدة أعوام بالضبط من عام ٢٠٠٧ الى ٢٠١٣، وحاصلة أيضآ على براءة إختراع بسبب شكلها البيضاوي اللي يسمح لها بالوصول للمناطق الضيقة بحيث يستخدم الطرف المدبب في توزيع الكونسيلر أسفل العين وجوانب الأنف والطرف الكبير لتوزيع الفاونديشن على كامل الوجه.  

طريقة استخدامها: 
تبللينها كويس بالماء حتى يزيد حجمها وبعدها تعصرين الزائد وتستخدمينها، مصممة عشان تستخدم مبللة وماتستخدمينها ناشفة أبدآ ولا راح تمتص كل المنتج سواء كان فاونديشن او كونسيلر بدون ماتستفيد منه البشرة. 



هذا فيديو استخدمت فيه البيوتي بلندر على كامل الوجه وبكل الخطوات: 



حاليآ صارت متوفرة في سيفورا ويبيعون المنظف الخاص فيها ويكون نوعين: جاف او سائل.



لكن اللي ماعندها المنظف تقدر تستغني عنه بالبار سوب او اي صابون سائل أو شامبو الأطفال.  

وهذا الفيديو يوضح طريقة التنظيف: 


بالنسبة لتجربتي مع البيوتي بلندر اعتبرها من افضل الاختراعات في عالم الميك اب ومااقدر استغني عنها، اللي ماعندها ماادري صراحة كيف توزعون الفاونديشن والكونسيلر يعني باختصار مثل مايقولون life changing :) 

اول مانزلت كانت باللون الوردي وبعدها نزل منها اللون الابيض pure والأسود pro، ماتفرق كثير لكن السوداء يفضلونها الميك اب ارتيست لانها تعطي الميك اب بروفشنال لوك، ونزل منها الحجم الميكرو اللي هو صغير جدا للكونتور او اسفل العين جربتها لكن ماحسيت انها ضرورية يعني البيوتي بلندر الحجم العادي تفي بالغرض وهي الأساس. 




مثل ماذكرت متوفرة في سيفورا او من خلال موقعهم، لكن انتبهوا من التقليد اللي صار بكل مكان والمشكلة مكتوب على العلبة بعد بيوتي بلندر يعني نفس الشكل لكن اذا استخدمتيها تحسين بالفرق عشان كذا خذوها من الأماكن الموثوقة. 

هذا كان البوست لليوم اتمنى انكم استفدتوا مع ان الموضوع معروف من زمان والبيوتي بلندر لها سنين في عالم الميك اب لكن حبيت اكتب عنها في مدونتي وأوثق تجربتي للبنات اللي ماعندهم فكرة. 
أشوفكم في بوست جديد :)  

الأربعاء، 5 أغسطس 2015

مقارنة بين قناع الطين من قلام قلو وذا بودي شوب.

مساء الخير،،

اليوم حبيت أقارن عن منتجين جربتهم وانسألت عنهم كثير، ماسك او قناع الطين الشهير من كاليفورنيا هوليوود قلام قلو وقناع الطين الأيوني من ذا بودي شوب. 



المنتجين مخصصة للبشرة المختلطة والدهنية ومذكور انه يساعد على تخفيف المسامات والرؤوس السوداء ويخفف من إفراز الدهون. 

كل القناعين لونهم غامق وقوامهم ثقيل ولهم رائحة قوية ومن النوع اللي ينشف على الوجه ويشد البشرة لحد ماتغسلينه. 
 

قناع قلام قلو مذكور انه يتكون من الجلايكوليك والساليسيك اسيد اللي لها دور في علاج بعض مشاكل البشرة، مذكور انه يعالج المسام والحبوب والتصبغات والشعر اللي يطلع تحت الجلد وممكن استخدامه لكل الجسم لكن انا جربته للوجه بس . 

قناع الطين الأيوني من ذا بودي شوب نزل مع مجموعة الطحالب البحرية المخصصة للبشرة الدهنية. ماقدرت اعرف عن المكونات كثير لأنها غير مذكورة على العلبة. 

طريقة استخدامها: 
تغسلين وجهك بالغسول اليومي وبعد التجفيف تحطين كمية من الماسك وتوزعينه على كل الوجه مع تجنب منطقة الهالات وحول العين، أول ماتحطينه ممكن يلسع شوي وبعد ١٥ او ٢٠ دقيقة يكون قد نشف تبللين ايدينك بالموية وتسوين له تقشير لحد ماينظف الوجه تمامآ. 

تجربتي مع المنتجين: 
بعد ماانظف الماسك أحس بانتعاش وان البشرة مشدودة لكن لابد من الترطيب بعده لأنها تكون جافة، ممكن يستخدم مرتين بالأسبوع فقط، وكل الماسكات ماراح يكون مفعولها سحري على البشرة او تعالج مشاكل لها سنين لكن تأثيرها وقتي ممكن تستخدمينها قبل المناسبة او جزء من روتينك الأسبوعي.
 
حبيت اكتب عنهم في بوست واحد لأني اشوفهم جدآ يتشابهون كلهم نفس المكونات تقريبآ وكلهم مخصصين لنوع بشرة معين وعطوني نفس النتيجة، مع فرق السعر طبعآ قلام قلو سعره حوالي ٣٥٠ موجود في سيفورا وصيدلية وايتس، وقناع ذا بودي شوب سعره حوالي ٦٠ ريال. 


 اتمنى انكم استفدتوا من موضوع اليوم واللي جربت شي منهم تكتب لي :) 
أشوفكم في بوست جديد. 

الخميس، 30 يوليو 2015

Bobbi Brown products ريفيو عن بعض منتجات بوبي براون

مساء الخير، 

اليوم بتكلم عن منتجات في المكياج جربتها في الفترة الأخيرة وحبيتها، المنتجات من ماركة بوبي براون اللي اعتبرها ماخذت حقها عندنا ومو منتشرة كثير. 



في البداية من هي بوبي براون؟ 
بوبي براون امرأة أمريكية تخرجت من كلية ايمرسون في تخصص الماكياج المسرحي، وانتقلت الى نيويورك بداية الثمانينات وانتشرت أول صور لمكياجها على العارضات في مجلة glamour. وبدت تشتهر في المجلات حتى بداية التسعينات أنتجت اول منتجات للشفايف بإسمها وبعدها كانت اول من ينتج foundation stick أو كريم الأساس اللي يكون على شكل إصبع، وفي عام 1994 ظهرت في برنامج أوبرا وبدت مبيعاتها تشتهر وتزيد، وأصدرت لها عدة كتب وفي 2002 افتتحت أول محل لمستحضرات التجميل الخاصة لها في مدينة نيويورك وصارت براند معروفة في عالم الميك اب، يمكن كل هالكلام خارج موضوع البوست لكن شدتني قصة نجاحها وأعجبت بها وحبيت أشارككم إياها في هذا البوست. 

نجي للمنتجات اللي جربتها وعجبتني، قبل كم سنة شريت عدة منتجات من المحل لكن ماحسيت انها عجبتني كثير أو ماناسبتني يمكن لأني مااخترت صح، وقبل كم شهر مريت المحل وشريت منتجات جديدة وحسيت اني هالمرة اخترت صح فقلت اشارككم. 


أول شي الكوريكتر يجي في علبة لحاله مع مراية ويجي بعدة درجات، وظيفة الكوريكتر ينحط قبل الكونسيلر للي هالاتهم غامقة عشان يلغي السواد، الأفضل يكون على لون خوخي او بيتش، انا عجبني وصرت استخدمه دايم قبل الكونسيلر لأن هالاتي غامقة وأفضله على كوركتر ماك، درجتي bisque.




بعدها باليت الكونسيلر والبودرة حقته، العلبة فيها كونسيلر وبودرة للتثبيت، الكونسيلر حلوة تغطيته من متوسطة الى ثقيلة والبودرة خفيفة، احب استخدمهم بالبيوتي بلندر. 


وبعدها بودرة الوجه، عندهم نوعين من البودرة: وحدة تغطيتها ثقيلة وممكن تحل محل الفاونديشن، والثانية تغطيتها خفيفة تستخدم لتثبيت الفاونديشن وتخفيف الدهون، قبت للبائعة نوع بشرتي ونصحتني بالثلنية وأخذتها وفعلآ بدون مبالغة اعتبرها أفضل بودرة جربتها خفيفة وماتبين مغبرة على الوجه، درجتي في الكونسيلر والبودرة warm natural.


وآخر شي اتوقع هو أكثر شي مشهور عندهم وهو كريم العيون وله نوعين بعد: كريم خفيف اسمه repair eye cream، والثاني النوع الأثقل منه والمكثف extra repair cream. من اسمه يعتبر كريم ثقيل وترطيبه قوي للمنطقة، عشان كذا اذا كنت بستخدمه قبل الميك اب احطه وأخليه فترة قبل ابدا عشان تتشربه البشرة. 

بالنسبة للأسعار مااذكرها لأني شاريتها قبل فترة من دبي، فروعهم في الرياض بنوراما مول ومجمع المملكة.

وهذا كان ريفيو بسيط عن منتجات بوبي براون اتمنى إني عطيتكم فكرة عنها اذا حابيت تشترون شي من المحل. 

أشوفكم في بوست جديد :) 

السبت، 25 يوليو 2015

أخطاء شائعة في عالم الميك اب

أهلين بنات كيف حالكم! 

اليوم بتكلم عن موضوع في بالي من زمان من قبل حتى أبدا بالتدوين، ماراح يكون عن شي معين ولا عن خطوات كثر ماهو سواليف وفضفضة :) ودي اتكلم عن بعض الأشياء اللي يسوونها البنات ممكن تقلب ملامحهم وتغيرهم للأسوأ بدل مايكون العكس.

في البداية انا مو ميك اب ارتيست محترفة ولا دارسة هالشي، لكن الميك اب وتجميع المنتجات اعتبره هواية عندي من كنت صغيرة وكنت احب أجرب وأتعلم ولازلت أتعلم أشياء جديدة من اليوتيوب وقوقل وبنترست ماقصروا :) 

لكن اللي يضايقني لما أشوف بعض البنات ماتعرف تتعامل مع الميك اب وماتعرف تبرز شكلها للأفضل، المكياج مو عشان تخفين ملامحك ولا عشان تشبهين وحدة ثانية، لا بالعكس عشان تبرزين الأشياء الحلوة عندك وتظهرينها للي حولك اشياء خاصة فيك وموجودة فيك انتي بس. 

عشان أكون واضحة بتكلم عن أبرز هذي الأخطاء مثلا: استخدام درجة فاونديشن أفتح من لونك الطبيعي، ترا الفانوديشن مو الغرض انه يفتح لونك لا بالعكس المفروض يكون نفس درجتك او أقرب درجة لك عشان يخفي اي تصبغات او بقع بالوجه ويكون اللون موحد، اذا أخذتي درجة أفتح منك راح يقلب اللون على رمادي وبيكون شكله بشع.والعكس صحيح يعني استخدام درجة اغمق عشان يعطيك مظهر التان او البرونز بالعكس راح يبين شكل الوجه مغبر واذا حبيتي يكون اللوك برونز ممكن تحطين بودرة برونز مع اللمعة آخر خطوة. كتبت عن طريقة اختيار الفاونديشن المناسب في أول تدوينة لي.


وشي ثاني هو المبالغة في رسم الحاجب او استخدام قلم اسود للحاجب، يعطي قسوة للملامح ويبين البنت اكبر من عمرها، حتى لو كان شعرك أسود دائمآ اقول للبنات ارسمي باللون البني الغامق يطلع انعم وطبيعي. 



من الأخطاء بعد تكحيل العين من تحت لأن الشي هذا يصغر العيون ويطلع مو مرتب، إذا حابة تحددين العين من تحت ممكن تستخدمين شدو بني للرموش السفلية وتموهينه بالفرشة يطلع أنعم على العين ويعطيها مدى.
 




نجي للشفايف أكثر شي مااحبه هو تحديد الشفايف بلون اغمق من الروج او المبالغة في رسم الشفايف بغرض تكبيرها وفي كل الحالتين يبين شكلها مو حلو ومصطنع، البديل إنك تحددين الشفايف بنفس لون الروج عشان مايكون فيه فرق بينهم ويخلي اللون يصبت وقت أطول، واذا حابة تكبرينها ممكن ترسمين بقلم محدد نيود او قريب من لون شفايفك الطبيعي وتطلعين عن حدود الشفايف شي بسيط من الوسط وأخر شي تحطين قلوس فاتح او هايلايت نص الشفايف هذا راح يبينها بارزة اكثر بدون المبالغة. 


هذي الصورتين تختصر بعض الأشياء اللي تكلمت عنها، شوفوا الفرق بين الأخطاء وبين الميك اب المرتب وكيف أبرز ملامحهم وطلع طبيعي
 


هذي كانت أكثر الأشياء اللي كنت ابي اشارككم فيها واتمنى انكم استفدتوا :) واللي عندها اي ملاحظة ماذكرتها تشاركني بالكومنتس.

أشوفكم في بوست جديد.. 

الخميس، 23 يوليو 2015

Makeup eraser ريفيو عن منشفة إزالة الميك اب

مساء الخير، 

من باب اني احب اجرب اشياء جديدة في الميك اب والعناية شريت قبل فترة منشفة إزالة الميك اب makeup eraser.  اشتهرت قبل فترة بين اليوتيوبرز الأجانب وشفتها نزلت عندنا في وايتس وحبيت أجربها. اخذتها قبل اكثر من شهر تقريبآ ، سعرها حوالي ٨٠ ريال.







عبارة عن قطعة قماش مصنوعة من البوليستر بنسبة مئة بالمئة، ملمسها ناعم جدآ وحجمها مصمم انها تكون مناسبة للوجه، لها جهتين: جهة تكون أليافها قصيرة للتنظيف وإزالة الميك اب والجهة الثانية أليافها طويلة تستخدم للتقشير كآخر خطوة.








مميزاتها المذكورة على التغليف: 
-توفر المال لأنك ماتحتاجين تشترين مزيل ميك اب او مناديل .
- طبيعية خالية من المواد الكيميائية. 
-تزيل الميك اب بواسطة الماء فقط.
-تزيل الماسكارا المقاومة للماء.
-يمكن غسلها في غسالة الملابس.
-يمكن استخدامها وغسلها الى ١٠٠٠ مرة.
-مناسبة للبشرة الحساسة.







وهذا فيديو توضيحي عنها  




طريقة استخدامها: 
تبللينها بموية دافية وتمسحين الوجه بحركات دائرية وتنظفين فيها الوجه بحركات دائرية، بعد ماشفت فيديوات كثيرة عنها باليوتيوب الأغلب يمدح فيها ويشوف انها حل عملي لتنظيف المكياج.




وهذا فيديو ثاني لأحد اليوتيوبرز اللي استخدمتها



 بالنسبة لتجربتي استخدمتها بعد مابللتها بشوية موية دافية، استخدمها بحركات دائرية مو بالفرك، نظفت مكياج الوجه والشدو كويس لكن لاحظت ان بقايا المسكارا ماراحت، ورجعت امسحها بالبيوديرما بس احيانا تنظفها على حسب نوع المسكارا، باختصار اعتبرها حل سريع ومناسب للسفر او اذا تبين شي سريع. لكن مو من الضروريات، بعد مااخلص منها اغسل مكان البقع بأي صابون سائل واخليها تنشف ، مذكور في الموقع انها ممكن تستخدم اكثر من مرة وبعدها تغسل مرة وحدة اذا اتسخت من جميع الجهات، لكن انا افضل اغسلها بعد كل استخدام وانشفها، وممكن نهاية الاسبوع احطها بغسالة الملابس. 

هذا كان ريفيو اليوم ان شاء الله استفدتوا 
واللي عندها استفسار او تعليق تكتب لي هنا او ع الانستقرام. 
اشوفكم في بوست جديد :) 

الأحد، 19 يوليو 2015

طريقتي في إزالة المكياج وتنظيف البشرة

مساء الخير بنات 
كل عام وانتم بخير وعساكم من عواده، 

بما إن الأيام هذي عيد ومناسبات والأغلب يحطون فل ميك اب حبيت اقولكم عن طريقتي في إزالة المكياج آخر السهرة، مهما كنتي تعبانة وحيلك مهدود حاولي تنظفين بشرتك وترطبينها قبل النوم، مرت علي فترة كنت احيانآ انام بالميك اب من كثر التعب وماكان عندي وقت وللأسف شفت وش كثر بشرتي تعبت وكان اسوأ خطأ سويته بحق بشرتي.

 




بالنسبة لروتيني في تنظيف البشرة اعتمده اذا كنت حاطة فاونديشن وبرايمر ومايكون كل يوم . 
 

في البداية اشيل الميك اب بالمنظف من بيوديرما او حاليآ لوريال لأني شريته قبل فترة وحبيت اجربه وقد كتبت عنهم مقارنة في تدوينة سابقة، ومكياج العيون اشيله بمزيل الميك اب من نيفيا، قوامه زيتي والحلو فيه انه ينظف الماسكرا والشدو من قلب، أشيلهم باستخدام اكياس القطن من ذا بودي شوب ماتتشرب كثير وناعمة على البشرة. 


بعدها يجي دور الكلاراسونيك تنظف البشرة بعمق وتشيل الجلد الميت يعني تغني عن المقشر، استخدمها مع غسولي المفضل سبق وكتبت عنها بوست بالتفصيل في المدونة، اذا ماكان عندك الكلاراسونيك تقدرين تغسلين وجهك بموية دافية وغسولك اليومي،


بعدها تكون المسام مفتوحة عشان كذا تحتاجين تسكرينها إما بموية باردة او بالتونر، انا حاليآ استخدم تونر من أولاي أبلل شوي بالقطنة وأمسح فيها الوجه وأبعده عن العيون. 
الحين يجي دور الترطيب اذا سويتي كل شي ومارطبتي البشرة كأنك ماسويتي شي، لأن الترطيب أشوفه أهم شي يخلي البشرة تتجدد ويعطيها النعومة والنضارة، استخدم مرطب الوجه وكريم العيون من لانكوم، مالاحظت عليها اي شي بس كنت ابي اخلصها هالفترة، وتقدرين تجربين اي مرطب وكريم يناسبك حسب نوع بشرتك، وفي تدوينتي السابقة كتبت عن أنواع البشرات واللي يناسبها، 
مثل ماذكرت سابقآ هالروتين مايكون بشكل يومي بس لما احط ميك اب ثقيل او اذا حسيت ان بشرتي تحتاج عناية،ممكن مرتين بالأسبوع وممكن تشوفون الخطوات كثيرة او مالها داعي لكن بعدها بتحسون ان بشرتكم تحسنت وماراح ياخذ منكم خمس دقايق.

وبكذا نكون دلعنا بشراتنا بعد يوم كامل من الميك اب وخليناها تتنفس، خاصة ان وقت النوم هو اللي تتجدد فيه خلايا البشرة فلازم نستغله:) 

اتمنى يكون البوست فادكم وتشاركونه مع صديقاتكم، أشوفكم في بوست جديد :)