مساء الخير
كيفكم مع رمضان مرت الايام بسرعة الله يتقبل منا ومنكم ويجعلنا من عتقائه يارب.
اليوم البوست مختلف عن الميك اب والعناية، حبيت أكتب عن جانب ثاني يهمني وعن أكلة لذيذة وسهلة.
اليوم راح يكون البوست عن وصفة الرافيولي بالأجبان والصلصة البيضاء، انا من عشاق الأكل الإيطالي وهذي الأكلة دايم نشوفها بالمطاعم عشان كذا ليش مانجربها بالبيت أطعم وأسهل من المطاعم وزحمتها.
للي مايعرفون الرافيولي هو نوع من المعجنات الإيطالية يكون فرش ومحشية بالأجبان او السبانخ او غيرها موجودة في ركن الأكل المستورد، تلاقونها بالدانوب والتميمي.
نجي لمكونات الأكلة هذي :
رافيولي، كريمة الطبخ من المراعي او اي شركة تفضلونها، جبن مبشور انا افضل من الشركة هذي أخذت النوع اللي يكون أربع انواع من الجبن وهي: موتزاريلا، رومانو، أسياقو وبروفولون، والاوريقانو او ورق الزعتر وممكن بقدونس مجفف ( اختياري)
وأخيرآ جبن البارميزان اكيد، أنا افضل القوالب وتبشرينها بالبيت ألذ من الجاهزة بالعلب.
نجي للطريقة السهلة:
تسلقين الرافيولي في ماء مغلي من خمس الى سبع دقائق، بعد ماتسلقينها وتصفينها من الموية الحين تسوين الصوص تبعها ، نحط مقدار كوب الى كوب ونصف من كريمة الطبخ ونذوب معاها خليط الجبن حسب الرغبة ونخليها تثقل شوي وبعدها نطفي النار ونضيف الأوريقانو او البهارات الإيطالية ورشة بقدونس، ونضيف عليها الرافيولي ونخلطها مع الصوص ، وبعد مانقدمها في صحن التقديم نرش ع الوجه شوي بارميزان وبس.
جدآ سهلة وطعمها مثل المطاعم وأفضل وماتاخذ اكثر من عشر دقايق، ممكن تضيفين الدجاج او ممكن تقدمينها مع سلطة خضراء وخبز بالثوم وتكون وجبة كاملة، وممكن تستبدلين الرافيولي بالتورتليني وهي أيضآ نوع من المعجنات الايطالية الطازجة وتقدرين تنوعين بالصوص حسب رغبتك وإبداعاتك،
وهذي صورة للتورتليني
اتمنى يكون بوست اليوم عجبكم وان شاء الله تطبقون الوصفة وتعجبكم :)
أشوفكم في بوست جديد.
شكلها سهل ولذيذ ان شاء الله بجربها
ردحذفجربيها وعطيني رايك، عوافي مقدمآ :)
حذف