مساء الخير بنات
اليوم حبيت أتكلم عن موضوع مهم ودايم أنسئل عنه وهو اللي راح يقرر الكريمات والميك اب اللي ممكن تشترينه راح يناسبك ولا لا، عشان كذا حبيت أكتب عن أنواع البشرة ويكون مرجع مفيد لكم.
للبشرة أربع أنواع رئيسية : جافة، دهنية، مختلطة، عادية.
في البداية عشان تعرفين نوع بشرتك فيه عدة طرق لكن هذي أبسطها:
اول ماتصحين من النوم وقبل تغسلين وجهك شوفي بشرتك عن قرب، اذا لقيتيها ناشفة وفيها قشور فهي جافة، واذا كان وجهك كله مزيت فهي دهنية، واذا كانت منطقة الأنف فيها زيوت وباقي الوجه عادي فهي مختلطة، واذا كانت مافيها اي زيوت او قشور فهي عادية.
وفيه طريقة ثانية لتحديد نوع بشرتك:
غسلي وجهك ونشفيه بدون ماترطبينه او تحطين اي كريم وخليه ساعة، بعد ساعة تقريبآ جيبي منديل نظيف وحطيه على وجهك اذا طلعت كمية دهون عليه اذاً بشرتك دهنية، اذا كانت الدهون من الأنف والجبهة فقط بشرتك مختلطة، اذا بدت تتقشر وحسيتيها ناشفة تكون بشرتك جافة، اذا كان المنديل مثل ماهو والبشرة ماعليها دهون تكون عادية.
نبدا من اليسار:
البشرة الجافة خالية من اي دهون
ودايم تتكون على سطحها قشور خاصة في فصل الشتاء، وتطلع فيها التجاعيد غالبآ في وقت مبكر، عشان كذا لابد من الإهتمام بترطيبها بالكريمات المكثفة والزيوت المخصصة للوجه والحين صار فيه انواع زيوت كثيرة في الصيدليات مخصصة للبشرة الجافة ، بالنسبة للغسولات لابد من استخدام غسول للوجه حتى لو كانت البشرة جافة يكون لطيف قوامه كريمي عشان ماينشف الوجه زيادة، وبالنسبة للفاونديشن أفضل شي اختيار فاونديشن أساسه زيتي عشان يحفظ الترطيب عادة يكون مكتوب عليها oily base . النوع الثاني :
في الصورة مثل ماهو واضح هي البشرة العادية وهي افضل نوع لأنها ماتفرز دهون على سطح الجلد وبنفس الوقت ماتكون جافة ومتقشرة، اصحاب البشرة العادية لهم حرية الاختيار في المنتجات يعني ممكن يجربون زيوت للبشرة وممكن الكريمات بجميع أنواعها، بشرط الإنتظام على روتين معين يعني غسول وبعده كريم مرطب عشان مايختل توازن البشرة مع الوقت وتحافظ على رطوبتها.
النوع الثالث:
البشرة الدهنية تفرز الدهون على سطحها وتتكون منها المسام والبثور والرؤوس السوداء، وهذي اكثر المشاكل اللي ممكن تتعرض لها البشرة لكن لابد من استخدام المنتجات المناسبة لها، يعني استخدام غسول مناسب للبشرة الدهنية وبعده استخدام تونر بواسطة قطعة قطنية، وظيفة التونر انه يسكر المسام بعد الغسول ويحافظ على توازن الأحماض في البشرة . وهذي بعض أنواع التونر اللي استخدمتها وفيه انواع كثيرة بالصيدلية.
بعد التونر نقدر نحط كريم مرطب الأفضل انه يكون خفيف على البشرة ومخصص للبشرة الدهنية، واللي تعتقد ان البشرة الدهنية ماتحتاج مرطب هذا اعتقاد خاطئ ، كل انواع البشرة تحتاج ترطيب عشان ماتظهر مشاكل ثانية مثل البقع والتجاعيد وغيرها.
بالنسبة للفاونديشن لابد من اختيار فاندويشن خالي من الزيوت للبشرة الدهنية او اساسه مائي ، عادةً يكون مكتوب عليها mattyfing , oil free
النوع الرابع:
البشرة المختلطة تاخذ من صفات البشرة الدهنية في انها تفرز دهون على الجلد، لكن مو كل الوجه، غالبآ يكون افراز الدهون اكثر في منطقة الجبهة والأنف والذقن المعروفة بالتي زون وباقي الوجه يكون عادي، في هذي الحالة نستخدم التونر على المناطق الدهنية وبعدها نستخدم المرطب المناسب.
هذا كان بوست اليوم، اتمنى انه أفادكم
واشوفكم في بوست جديد :)
ليست هناك تعليقات:
إرسال تعليق